ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލުން އަންނަ އަހަރު 2.3 ބިލިއަން ރުފިޔާގެ އާމްދަނީއެއް ލިބޭނެ ކަމަށް ލަފާކުރެވޭ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓު މިއަދު ވަނީ މަޖިލީހަށް ހުށަހަޅައިފަ އެވެ. 64 ބިލިއަންގެ އެ ރެކޯޑު ބަޖެޓު ހުށަހެޅުއްވީ ފިނޭންސް މިނިސްޓަރު މޫސާ ޒަމީރު އެވެ.
ބަޖެޓު ހުށަހަޅުއްވަމުން މިނިސްޓަރު ވިދާޅުވި ގޮތުގައި އަންނަ އަހަރު އާމްދަނީއަށް ދައުލަތަށް ލިބޭނެކަމަށް އަންދާޒާ ކުރަނީ 40.2 ބިލިއަން ރުފިޔާ އެވެ. އާމްދަނީ އިތުރުކުރަން ބަޖެޓުގައި އިތުރު ސިޔާސަތުތަކެއް ކަނޑައަޅައިފައި ނުވި ނަމަވެސް ޓެކްސް ނެގުމާއި ބެހޭ ގާނޫނުތަކަށް މިއަހަރު ގެނައި އިސްލާހުތައް ތަންފީޒުވެގެން އަންނައިރު ޓެކުހުގެ އާމްދަނީއަށް 31.3 ބިލިއަން ރުފިޔާ ލިބޭނެކަމަށް ބަޖެޓުގައި ވަނީ އަންދާޒާކޮށްފަ އެވެ. އަދި ޓެކްސް ނޫން ގޮތްގޮތުން ލިބޭ އާމްދަނީ 8.7 ބިލިއަން ރުފިޔާއަށް އަރާނެ ކަމަށްވެސް އަންދާޒާ ކުރެއެވެ.
މިނިސްޓަރު ވިދާޅުވީ މި އަހަރު ހުޅުވި ވީއައިއޭގެ އާ ޓާމިނަލް އަންނަ އަހަރު އެއްކޮށް އޮޕަރޭޝަނަށް ގެނެވުމުން އެއާޕޯޓު ޓެކުހުން ލިބޭނެ އާމްދަނީވެސް އިތުރުވާނެ ކަމަށެވެ. އަދި ރީޖަނަލް އެއާޕޯޓުތައް އިތުރަށް ތަރައްގީވެގެން އަންނަ އިރު ފަތުރުވެރިކަން އިތުރަށް ފުޅާވާނެ ކަަމަށާއި އެ ދާއިރާގެ ޓެކުހުން ލިބޭ އާމްދަނީވެސް އިތުރުވާނެ ކަމަށް މިނިސްޓަރު ވިދާޅުވި އެވެ.
"މި އަހަރު ހުޅުވި ވެލަނާ އިންޓަނޭޝަނަލް އެއަޕޯޓުގެ އާ ޓާމިނަލް އަންނަ އަހަރު މުޅިން އޮޕަރޭޝަނަލައިޒްވެ، ރީޖަނަލް އެއާޕޯޓުތައް އިތުރަށް ތަރައްގީވެ މުޅި ރާއްޖޭގައި ފަތުރުވެރިކަން ފުޅާވެގެން އަންނާނެކަމަށް ބެލެވޭ. ރާއްޖެއަށް ޒިޔާރަތްކުރާ ފަރުތުވެރިން އިތުރުވުމާ އެކު އެއާޕޯޓު ތަރައްގީކުރުމަށް ނެގޭ ފީގެ މަތީ ރޭޓުގެ ފުރިހަމަ އަސަރު އަންނަ އަހަރުގެ ތެރޭގައި ފެނި، އެއާޕޯޓު ތަރައްގީކުރުމަށް ނެގޭ ފީގެ ގޮތުގައި 2.3 ބިލިއަން ރުފިޔާ ލިބޭނެކަމަށް އަންދާޒާކުރެވޭ،" މިނިސްޓަރު ވިދާޅުވި އެވެ.
ޓޫރިޒަމްގެ ތަފާސް ހިސާބުތަކަށް ބަލާއިރު މިނިސްޓަރު ވިދާޅުވީ މި އަހަރުގެ ފުރަތަމަ އަށް މަސް ދުވަހުގެ ތެރޭގައި 1.5 މިލިއަން ފަތުރުވެރިން ރާއްޖެއަށް ޒިޔާރަތްކުރި ކަމަށާއި އެއީ 2024 ވަނަ އަހަރުގެ އެ މުއްދަތާ އަޅާބަލާއިރު 9.4 ޕަސެންޓުގެ ކުރިއެރުމެއް ކަމަށެވެ. މި އަހަރުގެ ބެޑްނައިޓްސް ހިސާބުތަކަށް ބަލާއިރު ޖެނުއަރީން ފެށިގެން އޮގަސްޓު މަހުގެ ނިޔަލަށް 9.5 މިލިއަން ބެޑްނައިޓްސް ރެކޯޑްކޮށްފައިވާއިރު މިއީ 2024 ވަނަ އަހަރުގެ އެ މުއްދަތާ އަޅާބަލާއިރު 6.6 ޕަސެންޓުގެ ކުރިއެރުމެއް ކަަމަށްވެސް މިނިސްޓަރު ފާހަގަކުރެއްވި އެވެ، މި މުއްދަތުގައި ރިސޯޓު ބެޑްނައިޓްސް 7.6 ޕަސެންޓުން ވަނީ ކުރިއަރާފަ އެވެ.
