އައްޑޫ ސިޓީގައި ވަކި ކައުންސިލުތަކަށް ހެދުމާއިމެދު ފޭދޫ، ހުޅުދޫ އަދި މީދޫ ރައްޔިތުންގެ ހިޔާލު ހޯދުމަށް ނަގާ އާންމު ވޯޓު މާލެ އާއި އައްޑޫސިޓީގައި މާދަމާ ހެދުނު ފަށަން ތައްޔާރުވެފައިވާއިރު ވޯޓަށް ކެމްޕެއިންކުރަން ހުޅުވާލި ފުރުސަތު މިއަދު ހަވީރު 6:00 އަށް ހަމަވެއްޖެ އެވެ.

މިއީ އައްޑޫ ސިޓީ ކައުންސިލް އެކުލެވިފައިވާ ގޮތަށް ބަދަލުގެނައުމަށްޓަކައި، އައްޑުއަތޮޅު ހުޅުދޫއާއި އައްޑުއަތޮޅު މީދޫއާއި އައްޑުއަތޮޅު ފޭދޫގެ ގިނަ ޢަދަދެއްގެ ރައްޔިތުންގެ ފަރާތުން، އެ ރަށްރަށުގައި ރައްޔިތުންނަށް ހިދުމަތް ދިނުމަށް ރަށު ކައުންސިލް އުފެއްދުމަށް ސަރުކާރަށް ހުށަހަޅާފައިވާތީ، އެ ރަށްތަކުގެ ރައްޔިތުން ދެކޭގޮތް ބަލައި، ހިޔާލު ހޯދުމަށް ނަގާ އާންމު ވޯޓެކެވެ. މި ވޯޓު ނެގުމަށް ހަމަޖެހިފައިވަނީ އައްޑޫ ސިޓީގެ ފޭދޫ، ހުޅުދޫ އަދި މީދޫގެ އިތުރުން މާލެ ސިޓީގަ އެވެ.

މާލެ އާއި އައްޑޫގެ ތިން ރަށުގައި 18 ވޯޓު ފޮށި ބަހައްޓާނެ އެވެ. އެއީ ހުޅުދޫގައި ތިން ފޮށި، މީދޫގައި ތިން ފޮށި، ފޭދޫގައި ފަސް ފޮށި އަދި މާލޭގައި ދިރިއުޅޭ އެ ތިން ރަށުގެ މީހުންނަށް ހަތް ވޯޓު ފޮއްޓެވެ. މާލޭގައި ވޯޓުފޮށިތައް ބަހައްޓަން ހަމަޖެހިފައިވަނީ ކަލާފާނު ސްކޫލުގަ އެވެ.

މާދަމާ ހެދުނު 8:00 އިން ހަވީރު 4:00 އަށް ކުރިއަށްގެންދާ މި ވޯޓުލުމުގެ ހައްގު ލިބިގެންވަނީ 9،576 މީހުންނަށެވެ. އެއީ ފޭދޫން 4،355 މީހުންނާއި ހުޅުދޫން 2،874 މީހުންނާއި މީދޫން 2،347 މީހުންނެވެ.

އިލެކްޝަންސް ކޮމިޝަނުން ނިންމާފައި ވަނީ މާދަމާގެ ވޯޓު ގުނައި ނިމުމުން އެ ވޯޓު ފޮއްޓެއްގެ ކައިރީގައި އެ ފޮއްޓެއްގެ ވޯޓުގެ ނަތީޖާ އިއުލާން ކުރަމުން ގެންދާ ގޮތަށެވެ. ދާއިމީ ނަތީޖާ އިއުލާން ކުރާނީ އަންނަ އާދިއްތަ ދުވަހު އެވެ.