މިހާރު ތަރައްގީ ކުރަމުން އަންނަ ބޮޑުތަކުރުފާނު މަގުގެ ފެން ހިންދާ ނިޒާމުގެ މަސައްކަތް މި ހަފްތާގެ ނިޔަލަށް ނިންމާލެވޭނެ ކަމަށް އެ މަސައްކަތް ކުރަމުން އަންނަ މޯލްޑިވްސް ޓްރާންސްޕޯޓް އެންޑް ކޮންސްޓްރަކްޝަން ކޮމްޕެނީ (އެމްޓީސީސީ) އިން ބުނެފި އެވެ.

އެމްޓީސީސީ އިން ބުނެފައިވަނީ އެ މަގުގައި މިހާރު ތަރައްގީ ކުރަމުން އަންނަ ސެގްމެންޓުގެ ފެން ހިންދާ ނިޒާމުގެ މަސައްކަތުގެ 50 އިންސައްތަ މަސައްކަތް ނިމިފައިވާ ކަމަށާއި، ކެރިޖްވޭގެ ސަބްގްރޭޑުގެ މަސައްކަތްތަކާއި ސައިޑްވޯރކްގެ ކޮމްޕެކްޓް ކުރުމުގެ މަސައްކަތްތައް ވެސް ކުރިޔަށްދާ ކަމަށެވެ. އަދި ކޭބަލް ޓްރެންޗު އިންސްޓޯލް ކުރުމުގެ މަސައްކަތުގެ 50 އިންސައްތަ ނިމިފައިވާ ކަމަށް ވެސް އެ އެމްޓީސީސީ އިން ބުނެފައިވެ އެވެ. މީގެ އިތުރުން، އެ ކުންފުނިން ބުނެފައިވަނީ ސަރވިސް ލައިންގެ މަސައްކަތްތައް މި ހަފްތާ ތެރޭގައި ކުރުމަށް ޕްލޭން ކޮށްފައިވާ ކަމަށެވެ.

މި މަސައްކަތުގެ ދަށުން އެންމެ ފުރަތަމަ އަދި އެންމެ ބުރަ މަސައްކަތެއްގެ ގޮތުގައި ކޮށްފައިވަނީ ބަނދަރުގެ އެއްގަމު ތޮށީގެ ކޮންކްރީޓް މަސައްކަތްތަކެވެ. ބޮޑު ތަކުރުފާނު މަގު ތަރައްގީ ކުރަމުން އަންނަނީ ފަސް ސެގްމަންޓަކަށް ބަހާލައިގެންނެވެ. ފުރަތަމަ ސެގްމަންޓަކީ ލޯކަލް މާރުކޭޓް ސަރަހައްދުން ފެށިގެން އިއްޒުއްދީން ފާލަމާ ހަމައަށެވެ. ފަސް ވަނަ ސެގްމަންޓް ނިމޭއިރު ހުޅުމާލެ ފެރީ ޓާމިނަލްއާ ހަމަޔަށް ތާރު އަޅައި ފެން ހިންދާ ނިޒާމު ތަރައްގީ ކުރެވިފައި ހުންނާނެ އެވެ. އެއީ 830 މީޓަރުގެ ސަރަހައްދެކެވެ. އަދި 737 މީޓަރުގެ އެއްގަމު ތޮށީގެ މަސައްކަތްތަކެވެ.

ބޮޑު ތަކުރުފާނު މަގު ތަރައްގީކޮށް ނިމޭއިރު ދުއްވާ އުޅަނދުތަކަށް ހަތަރު ލޭނަކާއި ހިނގާފައި އުޅޭ މީހުންނަށް ހާއްސަ ސަރަހައްދެއް ހުންނާނެ އެވެ. އެހެންކަމުން މި މަގު ތަރައްގީކޮށް ނިމުމުން ޓްރެފިކަށް ވަރަށް ބޮޑު ލުޔެއް ލިބިގެންދާނެ އެވެ.

ބޮޑު ތަކުރުފާނު މަގު ތަރައްގީކުރުމަށް އެމްޓީސީސީއާ ހަވާލުކޮށްފައިވަނީ 144 މިލިއަން ރުފިޔާ އަށެވެ. މާލޭގެ ހުރިހާ މަގެއް ރަނގަޅު ފެންވަރަކަށް ހެދުމަކީ ރައީސުލްޖުމްހޫރިއްޔާގެ އަމާޒެކެވެ.