ހަނގުރާމަ ހުއްޓާލުމުގެ ފިޔަވަޅު އެޅުމަށް ފަހު، ޣައްޒާގައި ޙަރަކާތްތެރިވާ އިސްރާއީލާއި ގުޅުން އޮންނަ ގޭންގުތަކުގެ 36 މީހަކު ޙަމާސް އިން މަރައިލައިފި ކަމަށް މަސްދަރަކުން ބުނެފިއެވެ.
ޢަރަބި މަސްދަރުން ބުނީ ޙަމާސް އިން މަރައިލީ އިސްރާއީލުން ފައިސާ އާއި ހަތިޔާރު ދީގެން ޣައްޒާގައި ހަމަނުޖެހުން އުފެއްދުމަށް ގެންގުޅުނު ޕޮޕިއުލާ ގޭންގުގެ މެންބަރުންނާއި އެއާއި ގުޅިފައިވާ މިލިޝިއާގެ މީހުންނެވެ. އޭގެތެރޭގައި ދޮގްމޯޝް ދަރިކޮޅުގެ މެމްބަރުން ކަމަށް ރައްޔިތުންނާއި ހަމާސްގެ މަސްދަރުތަކުން ބުނެއެވެ.
ހަމާސް އާއި އިދިކޮޅު އެންމެ ފާހަގަކޮށްލެވޭ ލީޑަރަކީ ރަފަޙް ސަރަޙައްދުގައި ދިރިއުޅޭ ޔާސިރު އަބޫ ޝަބާބެވެ. އޭނާ އާއި އޭނާގެ ގޭންގުގެ ބައެއް އިސްވެރިން ހިމެނޭހެން ގިނަބަޔަކު ހަތިޔާރާއި އެކު ތިބި ކަމަށް ޝައްކު ކުރެވޭ ޢިމާރާތެއް ވަށާލައިގެން ޙަމާސްގެ މުޖާހިދުން އިއްޔެރޭ ތިބިކަން ފާހަގަ ކުރެވެއެވެ. ޙަމަސްއިން ޙަމަލަދީ މަރައިލީ އެތަނުގެ އެތެރޭގައި ތިބި ބައެކެވެ. ދެފަރާތުން ބަދަލުކުރި ޙަމަލާތަކުގައި ޙަމާސްގެ 4 ނުވަތަ 6 މުޖާހިދުންގެ ފުރާނަ ގެއްލުނު ކަމަށް މަސްދަރަކުން ބުންޏެވެ. މި ޙަމަލާތަކުގައި ޕޮޕިއުލާ ފޯސްގެ ލީޑަރު އަބޫ ޝަބާބުގެ “ނައިބު”އަމީރު ފުސައިޞް (ދަ-ހަންޓާ)ވެސް ވަނީ މަރާލާފައެވެ.
Advertisement
ޣައްޒާގެ ސަލާމަތާއި ބެހޭ އޮފިޝަލާއި ޙަވާލާދީ ބައިނަލްއަޤްވާމީ މަސްދަރަކުން ބުނީ ޣައްޒާ ސިޓީގައި ހިނގި ހަމަނުޖެހުންތަކުގައި ޙަމާސްގެ ސަލާމަތީ ބާރުތަކުން ވަނީ އަބޫ ޝަބާބުގެ "ކަނާތް" މަރާލާފައި ކަމަށާއި އަބޫ ޝަބާބު މަރާލުމަށް މަސައްކަތް ކުރަމުންދާ ކަމަށެވެ.
އިސްރާއީލުން ކޮންޓްރޯލްކުރަމުން ދިޔަ ހުރިހާ ސަރަހައްދުތަކެއްގައި ޚާއްޞަކޮށް ޚާން ޔޫނިސްގައި ޙަމާސް އާއި ދެކޮޅު ގިނަ ބަޔަކު އުޅޭކަން ވެސް ފާހަގަ ކުރެވެއެވެ. ޙަމާސް އިން ރަހީނުން ދޫކޮށްލުމާއި މެދު އެމީހުން ދެކޮޅުހަދައެވެ. އޭގެތެރޭގައި ހިމެނޭ ޖަމާޢަތެއްގެ ވެރިއެއް ކަމަށްވާ ހުސާމް އަލް އަސްތަލް އާދީއްތަ ދުވަހު ވީޑިއޯ މެސެޖެއްގައި ބުނީ، ރަހީނުން ޙަވާލުކޮށްފިނަމަ ޣައްޒާގައި ޙަމާސްގެ ދައުރު ވެސް އަދި ވެރިކަން ވެސް ނިމޭނެ ކަމަށެވެ.
ފަލަސްޠީނުގެ އެނަލިސްޓް ރަޙީމް އައުދާ ވިދާޅުވީ ޙަމާސްގެ މަޤްޞަދަކީ ހަނގުރާމައިގެ ދުވަސްވަރު އިސްރާއީލާއި ގުޅިގެން ޣައްޒާގއ އަމާންކަން ނަގައިލާ، އިސްރާއީލަށް އެހީތެރިވި ޖަމާޢަތްތައް ހުއްޓުވުން ކަމަށެވެ.
