އިސްރާއީލުން ގްލޯބަލް ޞުމޫދު ފްލޮޓިލާ ހުއްޓުވުމުން ޙަމާސް އަށާއި ފަލަސްޠީނަށް ތާއީދުކޮށް، އަދި ޚާއްޞަކޮށް ފަލަސްޠީނުގެ ކުށެއް ނެތް މައުސޫމް ކުޑަކުދިންގެ ޙައްޤުގައި އިޓަލީގައި އިއްޔެ މުޒާހަރާތައް ފެށުމުގެ ސަބަބުން ދަތުރުފަތުރާއި ޞިއްޙީ ޚިދުމަތްތަކާއި ސްކޫލްތައް ހުއްޓި “ޕެރެލައިޒް” ވެއްޖެ އެވެ.
އިޓަލީގެ ޓްރޭޑް ޔޫނިއަންތަކުން ބުނީ ރޭލް، ވައިގެ ދަތުރުތައް އަދި މެޓްރޯގެ ޚިދުމަތްތައް ހުއްޓުވައި، މިލާން އާއި އެހެން ބޮޑެތި ސިޓީތަކުގެ ހައިވޭތައް ބަންދުކޮށް، ބައެއް ބަނދަރުތައް ވެސް ބަންދުކޮށްފައިވާ ކަމަށެވެ.
މިއަދުވެސް އިޓަލީގައި މުޒާހަރާތައް ކުރިޔަށްދާއިރު މިލިއަނަކަށް ވުރެ ގިނަ މީހުން ނުކުމެ އަޑު އުފުލަނީ “ފްރީ ފަލަސްޠީން، އަދި ހަނގުރާމަ ހުއްޓައިލުމަށެވެ.
އިޓަލީގައި ކުރިޔަށްދާ މުޒާހަރާތަކުގެތެރެއިން / ފޮޓޯ: އަލްޖަޒީރާ
ބޮޑުވަޒީރު ޖިއޮޖިއާ މެލޯނީގެ ސަރުކާރަށް ފާޑުކިޔުންތަކެއް ކުރިމަތިވިއިރު، މުޒާހަރާގެ ބައިވެރިން ބުނަމުން ދިޔައީ ހަމާސް ބާކީކޮށްފިނަމަ ފަލަސްތީނުގެ ދައުލަތެއް ބަލައިގަތުމަށް ވައުދުވުމަކީ ބަލައިގަނެވޭނެ ކަމެއް ނޫން ކަމަށެވެ.
އެއްބައިވަންތަކަމުގެ މުޒާހަރާތައް މުޅި ދުނިޔޭގައި ފެތުރިފައިވާއިރު، އިސްރާއީލުގެ ޕްލޭނާއި އެއްގޮތަށް ހަމާސްގެ އަތުން ޣައްޒާ “ފެލައިލުމުގެ މަސައްކަތް” އިނގިރޭސީވިލާތް އަޑީގައި އޮވެގެން އެނދަނީ ކުރިޔަށެވެ. ބެލެވޭ ގޮތުގައި ޓްރަމްޕުގެ ޞުލްޙައިގެ ޕްލޭނަކީ ސީދާ ނަތަންޔާހޫގެ ކަރުދާހެކެވެ. އެ ޕްލޭނުގައި އިސްރާއީލުން ޣައްޒާގެ ބިން ދޫކޮށްލައި އަދި ފަލަސްޠީނުގެ ރައްޔިތުންނަށް ރައްކާތެރިކަން ލިބޭނެކަން ކަށަވަރުނުވާއިރު، އެއަށް ތަބާނުވެއްޖެނަމަ ޣައްޒާއަށް ވަރަށް ނުރައްކާތެރި ޙާލަތެއް މެދުވެރިވާނެ ކަމަށް ބުނެ ޓްރަމްޕް ވަނީ މީގެ ކުރިން އިންޒާރު ދީފައެވެ.
އެހެންކަމާއި އެކު ޙަމާސް އިން މިހާރު ވަނީ ޓްރަމްޕްގެ ޕްލޭނުގެ އެއްބަޔަށް ތާއީދުކޮށް، ޣައްޒާގެ ސަރުކާރުގެ ހިންގުން ޓްރަމްޕް ކަނޑައަޅާ ނުވަތަ ބައިނަލްއަޤްވާމީ ބާރުގެ ދަށުން ހިންގާ ޖަމާޢަތަކާއި ޙަވާލުކުރަން ނިންމާފައެވެ.
