ކޮރަޕްޝަނުގެ ހާއްޔަކަށް ހަދައިގެން ނިމިދިޔަ ސަރުކާރުން ހިންގަމުން އައި ފެނަކަ ކޯޕަރޭޝަނާއި ގުޅޭ 161 މައްސަލަ ތަހުގީގުކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
ފެނަކައިގެ ތެރެއިން 2021 އިން 2023 އަށް ހިންގާފައިވާ ބޮޑު ވައްކަން އެ ކުންފުނީގެ އޮޑިޓް ރިޕޯޓުން ހާމަވެފައިވާއިރު އެ ރިޕޯޓާއި ގުޅިގެން އޭސީސީން ވަނީ މިއަދު ބަޔާނެއްް ނެރެފަ އެވެ.
އޭސީސީގެ ބަޔާނުގައި ބުނީ ފެނަކައިގެ އޮޑިޓް ރިޕޯޓުގައި ފާހަގަކޮށްފައިވާ މައްސަލަތަކުގެ ތެރެއިން އެ ކޮމިޝަނުގެ ތަހުގީގުކުރުމުގެ އިހްތިސާސްއަށް ފެތޭ މައްސަލަތަކަކީ ކޮބައިކަންބަލައި އަޅަންޖެހޭ ފިޔަވަޅުތައް އެޅުމުގެ މަސައްކަތް ފަށާފައިވާ ކަމަށެވެ.
އަދި އޮޑިޓާ ޖެނެރަލްގެ އޮފީހުގެ އޮޑިޓް ރިޕޯޓްގައި ފާހަގަކޮށްފައިވާ ގިނަ މައްސަލަތަކަކީ އޭސީސީން މިހާރުވެސް ތަހުގީގު ކުރަމުންދާ މައްސަލަތަކެއް ކަމަށާއި އެގޮތުން ފެނަކަ ކޯޕަރޭޝަންގެ 161 މައްސަލަ އެ ކޮމިޝަނުން މިހާރުވެސް ތަހުގީކުރަމުންދާއިރު އޭގެތެރެއިން 13މައްސަލައެއްގައި ޕީޖީ އޮފީހާއެކު ޑިއުޓީ ޕްރޮސިކިއުޝަން މަރުހަލާ ފަށާފައިވާކަމަށް ބުނެފައިވެ އެވެ.
އަދި 2022 ވަނަ އަހަރުން ފެށިގެން ފެނަކަ ކޯޕަރޭޝަނަށް ނިސްބަތްވާ ނުވަ މައްސަލައެއްގައި އެކި ފަރާތްތަކުގެ މައްޗަށް ދައުވާކޮށްދިނުމަށް އެދި ޕީޖީ އޮފީހަށް ފޮނުވާފައިވާނެ ކަމަށާއި އޭގެ ތެރެއިން ބައެއް މައްސަލަތަކުގައި ދައުވާކުރެވި މިހާރު ހުކުމްކޮށްފައިވާ ކަމަށްވެސް އެ ބަޔާނުގައި ވަނީ ބުނެފަ އެވެ.
އޭސީސީން ބުނީ މިހާތަނަށް ފެނަކައާ ގުޅޭ ގޮތުން އެކި މައްސަލަތައް ތަހުގީގު ކުރުމަށްފަހު، އެ މައްސަލަތަކާ ގުޅިގެން، 21،458،280.86 (އެކާވީސް މިލިޔަން ހަތަރުސަތޭކަ ފަންސާސް އަށް ހާސް ދުއިސައްތަ އަށްޑިހަ ރުފިޔާ އަށްޑިހަ ހަ ލާރި) އަނބުރާ ހޯދުމަށް އެ ކުންފުންޏަށް އަންގާފައިވާނެ ކަމަށެވެ.
މީގެ އިތުރުން، ފެނަކައާ ގުޅޭ އެކި މައްސަލަތަކުގައި 96 ކަމެއް އިސްލާހުކުރުމަށް ވާނީ އެ ކުންފުންޏަށް އަންގާފައި ކަމަށާއި އެކަންކަމުގެ ތެރޭގައި؛ ކުންފުނި ހިންގުމާ ގުޅޭ ކަންކަން ކުރިއަށްގެންގޮސްފައިވާ ގޮތުގެ 49 ކަމަކާއި، ކުންފުނީގެ ސިޔާސަތުތަކާ ގުޅޭ 26 ކަމަކާއި، ކޮރަޕްޝަންގެ އަމަލުތަކުގެ ސަބަބުން ކުންފުންޏަށް ގެއްލިފައިވާ ފައިސާ އަނބުރާ ހޯދުމާ ގުޅޭ 10 ކަމަކާއި، ކުންފުނިން ބަލައި ތަހުގީގުކުރުމަށް އަށް ކަމަކާއި އަދި އިތުރު ކަންކަންވެސް ހިމެނޭ ކަމަށް އޭސީސީން ބުންޏެވެ.
