ޖެހޭނީ ތިމަންނާމެން ބުނާ ގޮތަކަށް ހަދަން ކަމަށާއި، އެކަމަށް ޙަމާސް އަށް ލިބޭނޭ 3-4 ދުވަސް ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ. 

ދުނިޔޭގެ ޞުލްޙައިގެ އިނާމު ހޯދުމަށްޓަކައި މަސައްކަތް ކުރަމުންދާ ޓްރަމްޕް މިހެން ބުނީ ރޭ އޭނާގެ އައުވާނު ކަމަށްވާ ހައްދުފަހަނަ އެޅި ޒައެނިސްޓް ބޮޑުވަޒީރު ނަތަންޔާހޫ އާއި އެކު ވައިޓްހައުސްގައި ނޫސްވެރިންގެ ކުރިމަތީގައެވެ. އެ ދެމީހުން ގުޅިގެން ބޭއްވި ނޫސްވެރިންގެ ބައްދަލުވުމުގައި ޓްރަމްޕު ބުނީ، އޭނާ ހުށަހަޅަފައިވާ ކަންކަން ޙަމާސް އަށް ޖެހޭނީ ޤަބޫލުކުރާށެވެ. އެހެން ނޫންނަމަ ނިމުން ވަރަށް ހިތިވާނެ ކަމަށް ބުނެ އިންޒާރުދިނެވެ.

ޙަމާސް އިން ޤަބޫލުވާން ޖެހޭނެއޭ އޭނާ އެ ބުނާ ކަންކަމަކީ އިސްރާއީލަށް މެދުއިރުމަތީގައި ރައްކާތެރިކަން ހޯދައިދީ ޣައްޒާގެ ފުލް ކޮންޓުރޯލް އިސްރާއީލަށް ދިނުމަށްޓަކައި އޭނާ ހުށަހަޅަފައިވާ 21 ނުކުތާގެ ޕްލޭނެވެ. ބައެއް ޚަބަރުތަކުގައި ބުނާ ގޮތުން އޭގައި ވަނީ މައިގަނޑު 20 ނުކުތާއެވެ. އަލްޖަޒީރާ އިން ވެސް ބުނެފައި ވަނީ އޭގައި ވަނީ މައިގަނޑު 20 ނުކުތާ ކަމަށާއި ނަމަވެސް ތަފްޞީލެއް ނެތް ކަމަށެވެ. ކޮންމެޔަކަސް، ވައިޓް ހައުސްގައި ވާހަކަ ދައްކަމުން ޓްރަމްޕް ބުނީ އިސްރާއީލާއި ޢަރަބި ލީޑަރުން މިހާރު ވެސް އެ ޝަރުޠުތަކަށް އެއްބަސްވެފައިވާ ކަމަށާއި އެހެންކަމުން ޙަމާސް ވެސް ޖެހޭނީ އެއަށް އެއްބަސް ވާށެވެ.

ޢަރަބި ލީޑަރުން ޓްރަމްޕްގެ މި ހުށަހެޅުމަށް އެއްބަސް ވެއްޖެ ކަމަށް ބުނެ ޓްރަމްޕް ހެދީ ސީދާ ބޮޑު ދޮގެކެވެ. ތުރުކީވިލާތާއި، މިޞްރާއި، ސައުދީ ޢަރަބިއްޔާ އާއި، އުރުދުން އާއި، ޔޫއޭއީ އަދި ޤަޠަރު ފަދަ ބައެއް ޤައުމުތަކުން މަރްޙަބާ ކިޔާފައި ވަނީ ހަނގުރާމަ ހުއްޓާލުމާއި ރަހީނުން ބަދަލުކުރުމާއި އިސްރާއީލުގެ ޖަލުތަކުގައި ތިބި ފަލަސްޠީނުގެ ރައްޔިތުން މިނިވަން ކުރުމަށެވެ. ފަހަރެއްގައި ވެސް އޭނާގެ މުޅި ޕްލޭން ޢަރަބިން ބަލައެއް ނުގަނެއެވެ.

ހުޅަނގުގެ ބައެއް މަސްދަރުތައް ބުނާ ގޮތުގައި ޙަމާސްގެ މަޝްވަރާ ޓީމުތަކުން ދަނީ ޓްރަމްޕުގެ ހުށަހެޅުންތައް ދިރާސާ ކުރަމުންނެވެ. ފާހަގަކޮށްލަން ޖެހޭ ކަމަކީ ޓްރަމްޕު ހުށަހެޅި ކަރުދާހުގައި ޙަމާސް އިން ޖެހޭނީ ހަތިޔާރު ދޫކޮށްލަން ކަމަށް ބުނެފައި ވެއެވެ. އަދި ޙަމާސްގެ އެއްވެސް ބާރެއް ޣައްޒާގައި އޮވެގެން ނުވާނެ ކަމަށް ވެސް ބުނެފައި ވެއެވެ.