ޣައްޒާ ހަނގުރާމަ ހުއްޓާލައި ޞުލްޙަ ޤާއިމްކުރުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހެޅި 20 ނުކުތާގެ ޕްލޭނަށް އިސްރާއީލްގެ ބޮޑުވަޒީރު ބެންޖަމިން ނަތަންޔާހޫ އެއްބަސްވެއްޖެ ކަމަށް ވައިޓްހައުސްގައި ދާދި ދެންމެއަކު ނަތަންޔާހޫ އާއި އެކު ބޭއްވި ގުޅިފައިވާ ނޫސްވެރިންގެ ބައްދަލުވުމެއްގައި ޓްރަމްޕް ވިދާޅުވެއްޖެއެވެ.
ޓްރަމްޕްގެ ޕްލޭނަށް ނަތަންޔާހޫ އެއްބަސްވިޔަސް، މިއީ ދާއިމީކޮށް ހަނގުރާމަ ހުއްޓާލުމަށް ވުރެ ސިޔާސީ ގޮތުން ކުޅުނު އެއްޗެއް ކަމަށް ބުރަ ވެވޭ ކަމަށް މުޙައްލިލުން ބުނެއެވެ.
ހަނގުރާމަ ހުއްޓަލުމުގެ ޕްލޭނަށް ނަތަންޔާހޫ އެއްބަސްވިކަން ޢާންމުކޮށް އިޢުލާން ކުރިއިރު، މިއީ ހަނގުރާމަ ފެށުނު ފަހުން އެމެރިކާ އިސްވެ އޮވެގެން އިސްރާއީލުން ރަސްމީކޮށް މިފަދަ ގޮތަކަށް ވާހަކަ ދެއްކި ފުރަތަމަ ފަހަރެވެ.
އިސްރާއީލުން ޓްރަމްޕާއި އެކު ގުޅިފައިވާ ނޫސްވެރިންގެ ބައްދަލުވުމެއް ބާއްވައި މެދުއިރުމަތީގައި ޞުލްޙަ ޤާއިމް ކުރުމަށް ޓްރަމްޕް އެކުލަވައިލި 20 ނުކުތާ އަށް މި އެއްބަސްވީ، އިސްރާއީލުން ޞުލްޙަ އަށް ހުރަސް އަޅައިފި ކަމަށާއި އިސްރާއީލުން ޤަޠަރަށް ޙަމަލާ ދިން ފަހުން މިހާތަނަށް އެއްވެސް ހުށަހެޅުމެއް ނުލިބޭ ކަމަސް ޙަމާސް އިން ބުނުމާއި އަދި ޞުލްޙައިގެ މަޝްވަރާތައް ފެށޭނެ މާޞައުލެއް ވެސް ނެތް ކަމަށް ޙަމާސް އިން ބުނިތާ 24 ގަޑިއިރު ނުވަނީސް ކަން ފާހަގަ ކުރެވެއެވެ.
ޓްރަމްޕް ހުށަހެޅި ނުކުތާތަކުގެ ތެރޭގައި ވަގުތުން ދާއިމީކޮށް ހަނގުރާމަ ހުއްޓާލުމާއި، 72 ގަޑިއިރުގެ ތެރޭގައި ރަހީނުކޮށްފައިވާ ހުރިހާ މީހުން އަނބުރާ ގެނައުމާއި، އިސްރާއީލުގެ ޖަލުތަކުގައި ތިބި ފަލަސްޠީނުގެ ރައްޔިތުން ދޫކޮށްލުމާއި، މަރުޙަލާތަކަކަށް ބަހާލައިގެން އިސްރާއީލުން މަޑުމަޑުން ޣައްޒާގެ ބިމުން ފޭބުމާއި، ޣައްޒާގައި ހަތިޔާރު އެޅި ބަޔަކު ނުތިބުމާއި، އިސްރާއީލަށް ގެއްލުން ނުދޭނެ ކަމަށް ބުނާ ޙަމާސްގެ ހަނގުރާމަވެރިންނަށް މަޢާފު ދިނުން ނުވަތަ އެހެން ޤައުމަކަށް ބަދަލުކުރުމާއި، ޣައްޒާގެ ބިމުގައި ވެރިކަން ކުރުމަށް ޙަމާސް އަށް އެއްވެސް މިންވަރެއް ލިބިގެން ނުވުމާއި، ފަލަސްޠީނުގައި އެންމެން ރުހޭ (ޙަމާސް ނުހިމެނޭ) ގޮތަށް ވެރިކަމެއް އުފެއްދުމާއި، އިންސާނީ އެހީ ލިބޭނެ ކަމުގެ ޔަޤީންކަން ފޯރުކޮށްދިނުމާއި، ބޯޑަރުތައް އަލުން ހުޅުވުމާއި، ޣައްޒާ އަލުން ބިނާކުރުމާއި، ޣައްޒާގެ ކޮންޓްރޯލް އިސްރާއީލުން ބެލެހެއްޓުމާއި، ފަލަސްޠީނުގެ ރައްޔިތުން ގަދަކަމުން ގެދޮރުން ނުނެރުމަށާއި، ހުޅަނގު އައްސޭރީގައި ޔަހޫދީންގެ އާބާދީ ފުޅާކުރުމުގެ މައްސަލަ މަޑުޖެއްސުން ފަދަ ކަންތައްތައް ހިމެނެއެވެ.
ޓްރަމްޕްގެ މި 20 ޕޮއިންޓަށް ޙަމާސް އިން އަދި ވަކި އެއްޗެކޭ ނުބުނެއެވެ.
