އިސްރާއީލުގެ އަސްކަރިއްޔާއިން އިއްޔެ އާއި ރޭ ދިން ޙަމަލާތަކުގައި ފަލަސްޠީނުގެ 60 އަށް ވުރެ ގިނަ މީހުން ޝަހީދު ކޮށްލައިފިއެވެ.

މީގެތެރެއިން ގިނަ މީހުން ޝަހީދު ކޮށްލާފައި ވަނީ ނިއުޔޯކުގައި ބޭއްވި އދ. ގެ ޢާންމު މަޖިލީހުގެ 80 ވަނަ ބައްދަލުވުމުގައި އިސްރާއީލުގެ ހައްދުފަހަނައަޅާފައިވާ ބޮޑުވަޒީރު ބެންޖަމިން ނަތަންޔާހޫ ވާހަކަދައްކާވަމުން ގެންދަވަނިކޮށެވެ.ޚަބަރުތައް ބުނާ ގޮތުގައި އިސްރާއީލުން ގެންދަނީ ކޮންމެ އަށްމިނެޓުން ނުވަތަ ނުވަމިނެޓުން ޣައްޒާއަށް ބޮން އަޅަމުންނެވެ. އިއްޔެ ގިނަ މީހުން ޝަހީދުކޮށްލާފައި ވަނީ ޣައްޒާ ސިޓީގައި ކަމަށާއި، މީގެ އިތުރުން އެމެރިކާގެ ކޮންޓުރޯލްގައިވާ އިންސާނީ އެހީދޭ ތަންތަނަށް ވާސިލްވުމަށް މަސައްކަތް ކުރަމުން ދަނިކޮށް އިތުރު 13 މީހަކު ޝަހީދުކޮށްލާފައިވާ ކަމަށް ވެސް މަސްދަރުތަކުން ބުނެއެވެ.

ރޭ އދ. ގައި ނަތަންޔާހޫ ތަޤްރީރުކުރައްވާތީ އޭނާގެ އަޑު ނޭހުމަށް ހޯލުން ގިނަ ޢަދަދެއްގެ ޑިޕްލޮމެޓުން ބޭރަށް ނުކުމެވަޑައިގެންނެވިއިރު، ޓެރަރިސްޓް ކިއްލާގެ ބޮޑުވަޒީރު ވިދާޅުވީ ޣައްޒާގައި "ޖޮބް ނިންމާލާނެ" ކަމަށާއި ޙަމާސް ނައްތާލާނެ ކަމަށެވެ.