ދުންފަތުގެ އިސްތިއުމާލު ނުކުރާ ރަށްތަކަށް އިނާމު ދިނުމާ ގުޅޭގޮތުން އާންމުންގެ ހިޔާލު ހޯދުމަށް ދިރާސާ ކުރަން ފަށައިފި އެވެ.
ދުންފަތުގެ އިސްތިއުމާލުކުރުން އެއްކޮށް ހުއްޓާލާ ރަށްރަށުގެ އާބާދީގެ ކޮންމެ ރައްޔިތަކަށް ފައިސާގެ އިނާމެއް ދިނުމާ ގުޅޭ ދިރާސާ ކުރަން ރައީސް މުހައްމަދު މުއިއްޒު ނިންމަވާފައިވަނީ މިދިޔަ ޖޫން މަހު އެވެ.
މި ދިރާސާ ކުރަން ފަށާފައިވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިންނެވެ.
އެޗްޕީއޭއިން ބުނީ މި ދިރާސާގެ މަގުސަދަކީ ދުންފަތުގެ އިސްތިއުމާލުކުރުން އެއްކޮށް ހުއްޓަލާ ރަށްރަށުގެ އަބާދީގެ އެންމެނަށް ފައިސާގެ އިނާމެއް ނުވަތަ އިނާޔަތެއް ދިނުމާ ގުޅޭގޮތުން އާންމުންގެ ހިޔާލު ހޯދުން ކަމަށެވެ. އަދި މުޖުތަމައު ހޭލުންތެރިކުރުމާ ގުޅޭ ގޮތުންނާއި، ތަންފީޒުކުރުމުގައި ދިމާވާ ގޮންޖެހުންތަކާމެދު އާންމުން ދެކޭގޮތާއި، ކުރިއަށް އޮތްތަނުގައި ރަގަނޅު ކުރުމަށް ފެންނަ ކަންތައްތައް ދެނެގަތުން ކަމަށް އެޗްޕީއޭއިން ބުންޏެވެ.
އޮންލައިން ފޯމެއް މެދުވެރިކޮށް ކުރިއަށްގެންދާ މި ދިރާސާގައި ފޯމު ފުރިހަމަ ކުރާ އެއްވެސް ފަރާތެއްގެ މައުލޫމާތު ހާމަ ނުކުރާނެ ކަމަށް އެޗްޕީއޭއިން ބުންޏެވެ. އަދި މި މައުލޫމާތުތައް ބޭނުން ކުރާނީ ރާއްޖޭގައި ދުންފަތުގެ އިސްތިއުމާލު ކުރުން މަދުކުރުމަށް ކުރަމުންދާ މަސައްކަތްތަކުގައާއި އެކަމާ ގުޅުންހުރި ސިޔާސަތުތައް އެކުލަވާލުމުގައި ކަމަށް އެޗްޕީއޭއިން ބުންޏެވެ.
މިކަމާ ގުޅޭ ގޮތުން ރައީސް މީގެ ކުރިން އެކްސްގައި ކުރެއްވި ޕޯސްޓެއްގައި ވިދާޅުވީ މިއީ ދުންފަތުގެ އިސްތިއުމާލު ކުރުމުން ދުރުހެލިވެފައިވާ ދުޅަހެޔޮ މުޖުތަމައު އަކަށް ހެދުމަށް ކުރެވޭ މަސައްކަތުގެ ތެރެއިން ކުރާ ކަމެއް ކަމަށެވެ.
ދުންފަތުގެ އިސްތިއުމާލުކުރުން އެއްކޮށް ހުއްޓާލާ ރަށްރަށުގެ އާބާދީގެ ކޮންމެ ރައްޔިތެއްގެ ބޭންކް އެކައުންޓަށް ޖަމާކޮށްދޭ ފައިސާގެ އިނާމެއް ނުވަތަ އިނާޔަތެއް ދިނުމާ ގުޅޭ ގޮތުން ދިރާސާއެއް ހެދުމަށްފަހު އެކަމާގުޅޭ ކަރުދާހެއް ތައްޔާރުކުރައްވައި ހުށަހެޅުއްވުމަށް ކަމާ ބެހޭ ވަޒީރުންނަށް އަންގަވާފައިވާކަމަށް ރައީސް އޭރު ވިދާޅުވި އެވެ.
ދުންފަތުގެ އިސްތިއުމާލު ކުރުމުން ދުރުހެލިވެފައިވާ މުޖުތަމައުއެއް ބިނާކުރުމަށް ސަރުކާރުން އަންނަނީ ފިޔަވަޅުތަކެއް އަޅަމުންނެވެ. މީގެ ތެރޭގައި ރާއްޖޭގައި ވޭޕް ބޭނުންކުރުމާއި ރާއްޖެއަށް ވޭޕް އެތެރެކުރުން މަނާކުރުމާއި، 21 އަހަރު ނުފުރޭ މީހުންނަށްވެސް ދުންފަތް ވިއްކުން މަނާކުރުމާއި، 2007 އިން ފެށިގެން އުފަންވި އަދި އުފަންވާ ކުދިންގެ ޖީލަށް ދުންފަތް މަނާކުރުމުގެ އިތުރުން ދުންފަތާއި ސިނގިރޭޓުން ނަގާ ޓެކްސް ބޮޑުކުރުން ހިމެނެ އެވެ.
