ޔަމަނުގެ ހޫޘީ ޖަމާޢަތުން ރަތް ކަނޑުގައި އެ މީހުންގެ ހަތަރު ވަނަ އޮޕަރޭޝަން ފަށަން އުޅޭ ކަމަށް އިއްޔެ ރަސްމީކޮށް އިޢުލާން ކޮށްފިއެވެ. ހޫޘީން ރަތް ކަނޑުގައި ހިންގާ އޮޕަރޭޝަނަކީ ޣައްޒާގެ ނަސްލު ނައްތައިލުމަށް މަސައްކަތް ކުރަމުންދާ އިޒްރޭލާއި ދެކޮޅަށް ހިންގާ ޙަރަކާތެކެވެ.

_{ރަތްކަނޑުގައި ޔަހޫދީންނާއި ގުޅުން އޮތް ބޯޓަކަށް ހޫޘީން ޙަމަލާދީ ފައްތާލާފައި. (8 ޖުލައި 2025) / ފޮޓޯ: ގެޓީ އިމޭޖްސް}

ޔަމަނުގެ ހޫޘީން މިހާތަނަށް ޖެއްސި އޮޕަރޭޝަންތަކުގެ ސަބަބުން ހުޅަނގުގެ ގިނަ ޤައުމުތަކުން ކަންބޮޑުވެ ހޫޘީންގެ ޢަމަލުތައް ކުށްވެރި ކޮށްފައި ވާއިރު، ހަތަރުވަނަ އޮޕަރޭޝަން އިޢުލާން ކުރުމުން ޗައިނާއިން ދެކޮޅެއް ނެހެދިއެވެ. އެ ޙަމަލާތައް ކުށްވެރި ކުރުމުގެ ބަދަލުގައި ޗައިނާއިން ބުނެފައި ވަނީ ހޫތީންނަށް އެމީހުންގެ އިސްތިޤުލާލު ދިފާޢު ކުރުމުގެ ޙައްޤު ލިބިގެންވާ ކަމަށެވެ.

ރަތްކަނޑުގައި ޔަހޫދީންނަށް މުދާ އުފުލާ އުޅަނދު ތަކަށް ހުރަސް އަޅައި ޙަމަލާ ދިނުމަށް ހަތަރުވަނަ މަރުޙަލާ ހޫޘީން އިޢުލާން ކުރަމުން ބުނީ އިސްރާއީލުގެ ބަނދަރުތަކަށް ކައިރި ކުރުމަށް ނުވަތަ އިސްރާއީލަށް މުދާ ފޯރުކޮށްދިނުމަށް ދަތުރުކުރާ ކޮންމެ ބޯޓަކަށް ޙަމަލާ ދޭނެ ކަމަށެވެ. އަދި އެއީ ކޮންމެ ޤައުުމެއްގެ ދިދަ ޖަހާފައި ހުރި ބޯޓަކަށް ވިޔަސް ދިދަ އަކަށް ނުބަލާނެ ކަމަށެވެ.

އިސްރާއީލުން ޣައްޒާގައި ހިންގާ ޤަތުލުޢާންމާއި ގުޅިގެން އިސްރާއީލަށް ޖެއްސުން ކުރުމުގެ ގޮތުން ނޮވެމްބަރު 2023 އިން ފެށިގެން ހޫޘީން ވަނީ އިސްރާއީލާއި ގުޅުން އޮންނަ 100 އަށް ވުރެ ގިނަ ބޯޓަށް ޙަމަލާދީ ދުނިޔޭގެ އެންމެ ބިޒީ އެއް ކަނޑުގެ ވިޔަފާރި އަށް ބުރޫ އަރުވާފައެވެ. މި އަހަރުގެ ޖުލައި މަހު އެކަނިވެސް ހޫޘީން ދިން ޙަމަލާ ތަކުގައި ލައިބީރިއާގެ ދިދަ ޖަހާފައިވާ ބޯޓަކާއި ގްރީސް އިން ހިންގާ ބޯޓެއް ފައްތާލާފައިވެއެވެ. މި ހަމަލާތަކުގައި މަދުވެގެން ހަތަރު މީހަކު މަރުވެފައި ވާކަމަށް ކަށަވަރު ވެފައި ވާއިރު، ބައެއް މީހުން ގެއްލިފައިވާ ކަމަށް ނުވަތަ ހޫޘީންގެ ބެލުމުގެ ދަށުގައި ބަންދުކޮށްފައިވާ ކަމަށް ވެސް ރިޕޯޓްތައް ބުނެއެވެ.