ދުނިޔޭގެ ރެކޯޑް ފޮތުން ޖާގަ އެއް ހޯދުމަކީ ފަޚުރެކެވެ. އެކި މީހުން ނުވަތަ އެކި ޤައުމުތަކުން ރެކޯޑް ފޮތުން ޖާގަ ހޯދުމަށް އެކި މަސައްކަތްތައް ކުރެއެވެ. ރާއްޖެއިން ވެސް ވަނީ ތަފާތު ރެކޯޑުތައް ހަދާފައެވެ. ޚާއްޞަކޮށް މި ވެރިކަމުގައި، 83 ދުވަހުގެ ތެރޭގައި ދުނިޔޭގެ ދެ ރެކޯޑެއް ހެދިއެވެ.

މި ސަރުކާރުން ފުރަތަމަ ހެދި ރިކޯޑަކީ ބައިނަލްއަޤްވާމީ ނޫސްވެރިންގެ ދުވަހާއި ދިމާކޮށް މި އަހަރުގެ މެއި 3–4 ގައި ހެދި ރިކޯޑެވެ. ނޫސްވެރިންގެ ސުވާލު ތަކަށް ޖަވާބު ދެއްވުމުގެ ގޮތުން ކުރިއަށް ގެންދެވި އެ ބައްދަލުވުމުގައި ގާތްގަނޑަކަށް 14 ގަޑިއިރާއި 54 މިނެޓް ވަންދެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވާހަކަފުޅު ދެއްކެވިއެވެ. އެއީ އެ ދުވަހު (މެއި 3) ގެ ހެނދުނު 10:00 އިން ފެށިގެންނެވެ. ދުނިޔޭގެ ރައީސުންގެ ތެރެއިން ކުރިން އެ ރެކޯޑް އޮތީ ޔޫކްރޭންގެ ރައީސް ވޮލޮޑިމިއާ ޒެލެންސްކީގެ އަތްޕުޅުގައެވެ، އެއީ ގާތްގަނޑަކަށް 14 ގަޑިއިރަށް ވާހަކަފުޅު ދައްކަވައިގެންނެވެ.

އޭގެ ސީދާ 83 ދުވަސް ފަހުން، ރާއްޖޭގެ 60 ވަނަ މިނިވަން ދުވަސް ފާހަގަކުރުމަށް ޖުލައި 26، 2025 ގައި، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް ހުޅުވުމުގެ ރަސްމިއްޔާތުގައި ބޭއްވި ޑްރޯން ޝޯވ އާއި ހަވާ އެރުވުމުގެ އިވެންޓު ވެސް ވަނީ ގިނީސް ވޯލްޑް ރިކޯޑް ފޮތުން ޖާގަ ހޯދާފައެވެ.

^{އާ ޓާމިނަލް ހުޅުވުމުގެ ރަސްމިއްޔާތުގައި ބޭއްވި ޑްރޯން ޝޯވ އާއި ހަވާ އެރުވުމުގެ އިވެންޓަށް ގިނީސް ވޯލްޑް ރިކޯޑް ސެޓްފިކެޓް ލިބިގެން އެމްއޭސީއެލް ބޯޑުގެ ޗެއާމަން ނޫރައިން ޖަނާޙް އެ ސެޓްފިކެޓާއި ޙަވާލުވަނީ: މިއީ 83 ދުވަސްތެރޭ ރާއްޖެއިން ހެދި ދުނިޔޭގެ ދެވަނަ ރެކޯޑް. / ފޮޓޯ: އެމްއޭސީއެލް}

ވެލާނާ އިންޓަރނޭޝަނަލް އެއާޕޯޓު (ވީއައިއޭ)ގެ އާ ޓާމިނަލް ހުޅުވުމަށް ބޮޑު އިވެންޓެއް ބޭއްވިއިރު، މި އެއާޕޯޓަކީ މި ސަރަޙައްދުގައިވާ އެންމެ ފެންވަރު ރަނގަޅު އެއާޕޯޓު ތަކުގެ ތެރެއިން އެއާޕޯޓެކެވެ. ގާތްގަނޑަކަށް 72،000 މީޓަރުގެ މި ޓާމިނަލްގައި 47 ޗެކް-އިން ކައުންޓަރު، 12 ބޯޑިން ބްރިޖު އަދި ހަ ސެލްފް ސާވިސް ކިއޮސްކް ހިމެނޭއިރު، އަހަރަކު 7 އާއި 7.5 މިލިއަން ފަސިންޖަރުންނަށް ޚިދުމަތް ދެވޭނެއެވެ.

ވީއައިއޭގެ ޓާމިނަލް ހުޅުވި އިވެންޓް ދުނިޔޭގެ ރެކޯޑް ފޮތަށް އެރިއިރު، މި އިވެންޓުގައި މާލެ އާއި ހުޅުމާލެ ސަރަޙައްދުގެ ތަފާތު 19 ތަނަކުން އެއްފަހަރާ ހަވާ އެރުވިއެވެ.

ދުނިޔޭގެ ރެކޯޑް ފޮތަށް އެންމެ ފުރަތަމަ ރާއްޖެ އެރީ 2019 ވަނަ އަހަރު އޮކްޓޯބަރު މަހުގެ ފުރަތަމަ ދުވަހުގައެވެ. އެއީ ބަރޮސް އައިލެންޑްގެ ރިސޯޓު ސަރަޙައްދުގައި ބޭއްވި “ނޭވާ” އިވެންޓެވެ. މި އިވެންޓަކީ އެންމެ ގިނަ މީހުން އެއްފަހަރާ ފްރީޑައިވިންގ ކުރި އިވެންޓެވެ. މި ދެންނެވި އިވެންޓުގައި 521 ޑައިވަރުން ބައިވެރިވެ، އިޓަލީގެ ރެކޯޑް މުގުރައިލިތާ މިއަދަށް މިވީ ބަރާބަރު 6 އަހަރެވެ. މި މުއްދަތުގައި ރާއްޖެއިން ހޯދި މިބާވަތުގެ އެންމެ ބޮޑު ކާމިޔާބަކީ 83 ދުވަސްތެރޭ ދުނިޔޭގެ ދެރެކޯޑް މުގުރައިލުމެވެ.