އިންޑޯ-ޕެސިފިކް ސަރަހައްދުގައި އެއް ހަގީގަތެއް ސާފުކޮށް ފެންނަން އެބަހުއްޓެވެ. އެއީ ސަރަހައްދީ އަދި ބައިނަލްއަގުވާމީ ބާރެއްގެ ގޮތުގައި އިންޑިއާ ކުރިއަރަމުންދާ މަންޒަރެވެ. މިކަންމިހާރު ވެފައިވަނީ ދުރު މުސްތަގުބަލަކަށްވުރެ ބޮޑަށް، މިހާރުގެ ހަގީގަތަކަށެވެ. ބޮޑުވަޒީރު ނަރެންދުރަ މޯދީގެ ވެރިކަމުގައި އިންޑިއާގެ އިގުތިސާދު ހަލުވިކަމާއެކު ކުރިއަރައި، އަސްކަރީ ބާރު ގަދަވެ، ބައިނަލްއަގުވާމީ ނުފޫޒު ފުޅާވަމުންދާ މި ދަނޑިވަޅަކީ ދުނިޔޭގެ ޖިއޯޕޮލިޓިކްސްގައި މުހިންމު ދައުރެއް އިންޑިއާ އަދާކުރަމުންދާކަން ހާމަކޮށްދޭ ކަމެކެވެ. ދިވެހިރާއްޖެ ފަދަ ކުޑަ ގައުމަކަށް، އަޅުގަނޑުމެންގެ ސަލާމަތާއި، ރައްކާތެރިކަމާއި، ތަރައްގީ ބިނާވެފައިވަނީ އަޅުގަނޑުމެންނާ އެންމެ ގާތުގައި އޮތް، އަދި އެންމެ ބާރުގަދަ އަވައްޓެރި އިންޑިއާއާ އެކު އަޅުގަނޑުމެންގެ ގުޅުން ބެހެއްޓޭ ގޮތެއްގެ މައްޗަށެވެ.
ދުނިޔޭގައި އެންމެ ބިޒީކޮށް ހަރަކާތްތެރިވާ ކަނޑުގެ ތެރޭގައި ދިވެހިރާއްޖެ ހިމެނޭކަމީ، އަޅުގަނޑުމެންނަށް ބޭރުގެ ފިއްތުންތަކަށް ވަރަށް ބޮޑަށް ހުށަހެޅިފައިވާ ތަނެއްކަން ހާމަކޮށްދޭ ކަމެކެވެ. މި ނާޒުކު ޖިއޯޕޮލިޓިކަލް ސަރަހައްދުގައި، ދިވެހިރާއްޖެއަށް އިންޑިއާގެ ހިމާޔަތް ވަރަށް މުހިއްމެވެ. އިންޑިއާއާއި ގުޅިގެން ކުރިޔަށްދާން އެބަ ޖެހެއެވެ. އެއީ ބޭރުގެ އިސްތިއުމާރީ ބާރުތަކުން ރައްކާތެރިކޮށްދޭ އައްޑަނައެއް ވެސް މެއެވެ.
ކުރީގެ ސިޔާސީ ހީނަރުކަންތަކަށް ފަހު ވެސް، ރައީސް ޑރ. މުޙައްމަދު މުޢިއްޒު އާއި ބޮޑުވަޒީރު މޯދީގެ ދެމެދުގައި އޮތް ގުޅުން ވަރަށް ބޮޑަށް ވަރުގަދަވެފައިވާކަން ފާހަގަކުރެވެއެވެ. މިކަން އެންމެ ސާފުކޮށް ފެނިގެންދިޔައީ 2024 ވަނަ އަހަރުގެ އޮކްޓޫބަރު މަހު ރައީސް ޑރ. މުޙައްމަދު މުޢިއްޒު އިންޑިއާ ސަރުކާރުގެ ދައުވަތަކަށް އެ ގައުމަށް ކުރެއްވި ޝަރަފުވެރި ދަތުރުފުޅާއި އަދި އެއަށްފަހު ރާއްޖޭގެ 60 ވަނަ މިނިވަންދުވަހުގެ ޖަލްސާއަށް ރައީސް ޑރ. މުޢިއްޒުގެ ދައުވަތަކަށް މިއަދު މޯދީ މި ފަސްގަނޑަށް ވަޑައިގަތުމެވެ.
ރައީސް އިންޑިއާއަށް ވަޑައިގެންނެވި ދަތުރުފުޅުގައި އެންމެ ފާހަގަ ކުރެވޭ ކަމަކީ ދެ ލީޑަރުން ސޮއިކުރެއްވި "އިންޑިއާ–މޯލްޑިވްސް ކޮމްޕްރެހެންސިވް އިކޮނޮމިކް އެންޑް މެރިޓައިމް ސެކިއުރިޓީ ޕާޓްނަރޝިޕް" އެވެ. މި އެއްބަސްވުމުގައި ރާއްޖެއަށް ބޭނުންވާ ދިފާޢީ ތަމްރީނާއި، ރާއްޖޭގެ ސަލާމަތާއި، ރާއްޖޭގެ އިގްތިސާދަށް “ތެޔޮ ޖެހުމަށް” އިންވެސްޓްމެންޓާއި، އަސާސީ ހިދުމަތްތައް ތަރައްޤީ ކުރުމުގެ ދާއިރާތަކުން ގުޅިގެން މަސައްކަތް ކުރުން ހިމެނެއެވެ.
އިންޑިއާއަކީ ދިވެހިރާއްޖޭގެ ތަރައްޤީގެ މުހިންމު ބައިވެރިއެއް ވެސް މެއެވެ. ގްރޭޓަރ މާލެ ކަނެކްޓިވިޓީ ޕްރޮޖެކްޓާއި، ހަނިމާދޫ އެއަރޕޯޓް ބޮޑުކުރުމުގެ މަޝްރޫޢުއާއި، ސޯޝަލް ހައުސިންގ ފްލެޓްތައް ބިނާކުރުމުގެ މަސައްކަތްތަކަކީ އިންޑިއާގެ އެހީތެރިކަމެވެ. އަދި އިންޑިއާއިން ވަނީ ދަރަނިތައް ރޯލްއޯވަރ ކޮށްދީ، 800 މިލިއަން ޑޮލަރުގެ ކަރަންސީ ސްވޮޕް ފޯރުކޮށްދީ، އަދި އައު ލައިންސް އޮފް ކްރެޑިޓްތައް ވެސް ދޫކޮށްފައެވެ. މިކަންކަމުން ދިވެހިރާއްޖޭގެ އިޤްތިޞާދު ގިނަގޮންޖެހުންތަކެއް ކުރިމަތިވި ދަނޑިވަޅުގައި ހަމަޖެހުމެއް ހޯދުމަށް ވަރަށް ބޮޑަށް އެހީތެރިވެދިނެވެ.
ދިވެހިރާއްޖޭގެ 60 ވަނަ މިނިވަން ދުވަހުގެ ޖަލްސާއާއި އެއާއި ގުޅިގެން ކުރިޔަށްދާ ހަރަކާތްތަކުގައި ބޮޑުވަޒީރު މޯދީ ބައިވެރިވެވަޑައިގަތުމަކީ ރައީސް ޑރ. މުޢިއްޒުގެ ވެރިކަމުގައި ދުނިޔެއަށް ދައްކައިދޭ ވަރަށް ބާރުގަދަ މެސެޖެކެވެ.
އަޅުގަނޑުމެންގެ މިނިވަންކަން ހިމާޔަތްކޮށް، ހަމަޖެހިގެން ކުރިއަރަން ބޭނުންނަމަ، އަޅުގަނޑުމެން ގަބޫލުކުރަން ޖެހޭ ހަގީގަތަކީ ދުނިޔޭގެ އެންމެ ނުފޫޒުގަދަ ވެރިންގެ “ޓޭބަލަށް އަރާ” އިންޑިއާއަކީ ދިވެހިރާއްޖެއަށް ނުލާހިކު މުހިއްމު ގައުމެކެވެ. އިންޑިއާއިން ދިވެހިރާއްޖެއަށް އިހުތިރާމު ކުރެއެވެ. މިއީ ޖޯގުރަފީ އާއި ޖިއޯޕޮލިޓިކްސްގެ ސަބަބުން “ހުޝިޔާރު” ޑިޕްލޮމަސީއެއްގެ މުހިންމުކަން ހާމަވާ ދުނިޔެއެއްގައި، ދެގައުމުގެ ބާރު ވަރުގަދަ ކުރުމުގެ މުހިންމު ކަމެކެވެ.
