ކައިރި މުސްތަޤްބަލެއްގައި އުފާވެރިޚަބަރެއް ލިބޭނެ ކަމަށް ޒަޔަނިސްޓުންގެ ރައީސް އީޓްސްހާކް ހެރްސޮގް ބުނެފިއެވެ. އޭނާ މިހެން ބުނީ އިއްޔެ ޣައްޒާގައި ތިބި އިސްރާއީލުގެ ސިފައިންނާއި ބައްދަލުކޮށެވެ.

އޭނާ ބުނީ ޣައްޒާގައި ތިބި މުސްލިމުންނަށް ކާނާ ފޯރުކޮށްދިނުމުގައި އިސްރާއީލުން އެއްވެސް ގޯހެއް ނަހަދާ ކަމަށާއި، ވަރަށް ރަނގަޅަށް އިސްރާއީލުގެ ސިފައިންނާއި އިދާރާތަކުން ޣައްޒާގައި ޢަމަލުކުރަމުންދާ ކަމަށެވެ.

މުސްލިމު އެތައް ކުޑަކުދިންނާއި އަންހެނުންނެއްގެ ގަޔަށް ބޮން އަޅައި އެތައް ހާސް ބަޔަކު ޝަހީދުކޮށްލުމަކީ ފަޚުރެއް ކަމަށް ދޭހަވާ ގޮތަށް އޭނާ އިސްރާއީލުގެ ސިފައިންނާއި ވާހަކަ ދެއްކިއެވެ. މުޅި ޣައްޒާ ސުންނާފަތިކޮށްލިއިރު އޭނާ ބުނީ އިސްރާއީލުން ގޯހެއް ނަހަދާ ކަމަށެވެ.

ޒަޔަނިސްޓު ރައީސް ހެރްސޮގް ބުނީ، ޙަމާސް ޖަމާޢަތުން ރަހީނުކޮށްފައިވާ އިސްރާއީލުގެ އަސީރުން މިނިވަންކުރުމަށް ފުޅާ ދާއިރާއެއްގައި މަޝްވަރާތައް ކުރިއަށްދާ ކަމަށެވެ. އޭނާ އެ ބުނާ އުފާވެރި ޚަބަރަކީ އެއީ އެވެ. ނަމަވެސް ޙަމާސް އަކުން ހުރިހާ ރަޙީނުންތައް ދޫކޮށްލާނެ ކަމަށް ބުނެ ބަޔާނެއް އަދި ނެރެފައެއް ނުވެ އެވެ.

ހެރްސޮގް ޣައްޒާއަށް ދިޔައީ، އެ ތަނުގެ 2.3 މިލިއަން ރައްޔިތުން ބަނޑަށް ޖައްސައި އެ ބިމުން ބޭރުކުރުމަށް މަޖުބޫރުކުރުވުމުގެ ގޮތުން 2023ވަނަ އަހަރުގެ އޮކްޓޯބަރު 7ވަނަ ދުވަހުން ފެށިގެން ހިންގަމުންދާ ޖަރީމާތަކުގެ ޔެރެއިން ޣައްޒާއަށް ކާބޯތަކެއްޗާއި، ބޭހާއި، އިންސާނީ އެހީގެ ސާމާނު އެތެރެކުރުމަށް ހުރަސް އަޅާފައި އޮއްވަ އެވެ. އަދި ހޮސްޕިޓަލްތަކަށް ކަރަންޓު ފޯރުކޮށްދިނުމަށް ބޭނުންވާ ތެލަށްވެސް ހުރަސްތައް ވަނީ ކުރިމަތިކޮށްފަ އެވެ.

ޣައްޒާގެ ރައްޔިތުން ގަސްދުގައި ބަނޑަށް ޖެއްސުމަށް ހިންގާ މި ހަނގުރާމައިގައި ބަނޑަށް ޖެހިގެން ޝަހީދުވި މީހުންގެ އަދަދު 111އަށް އަރާފައިވާއިރު، ޖުލައި 22ވަނަ ދުވަހު އެކަނިވެސް 15 މީހުން ޝަހީދުވި އެވެ. އޭގެ ތެރޭގައި ހަތަރު ކުޑަކުދިން ހިމެނެ އެވެ.

ޣައްޒާއަށް މިހާރު ކާބޯތަކެތި އެތެރެކުރާ ހަމައެކަނި ޖަމުޢިއްޔާއަކީ ޣައްޒާ ހިޔުމެނިޓޭރިޔަން ފައުންޑޭޝަން (ޖީއެޗްއެފް) އެވެ. އދއިން ބުނާ ގޮތުގައި، މި ޖަމުޢިއްޔާގެ މަރުކަޒުތަކުން ކާބޯތަކެތި ހޯދަން ދިޔަ 1،000އަށް ވުރެ ގިނަ މީހުންނަށް ޔަހޫދީ ސިފައިން ހަމަލާދީ ޝަހީދުކޮށްލާފައިވެ އެވެ.

އދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވަނީ މި ކަމާ މެދު ކަންބޮޑުވުން ފާޅުކުރައްވާފަ އެވެ.