މިނިވަން ދުވަހުގެ ބޮޑު ރަސްމިއްޔާތުގައި ބައިވެރިވެވަޑައިގަތުމަށް އިންޑިޔާގެ ބޮޑުވަޒީރު ނަރެންދުރަ މޯދީ ރާއްޖެ ވަޑައިގަންނަވާނެ ކަމަށް އިއުލާން ކުރައްވައިފި އެވެ.
ރާއްޖޭގެ މިނިވަންކަމަށް 60 އަހަރު ފުރުން ފާހަގަކުރުމުގެ ގޮތުން، މިނިވަން ދުވަހުގެ "ބޮޑު ކާނިވާގައި" ބައިވެރިވެވަޑައިގަތުމަށް، ރައީސް ޑރ. މުހައްމަދު މުއިއްޒުގެ ދައުވަތަކަށް، އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެ ވަޑައިގަންނަވަނީ މި މަހުގެ 25 ވަނަ ދުވަހުގަ އެވެ.
މި ބޮޑު ރަސްމިއްޔާތު ދިމާވަނީ ދެގައުމުގެ ސިޔާސީ ގުޅުމަށްވެސް 60 އަހަރު ފުރޭ ދުވަހާ އެވެ.
އިންޑިއާގެ ބޮޑުވަޒީރު މޯދީ، އެކްސް ގައި ލިޔުއްވާފައިވަނީ، މި ތާރީހީ ޖަލްސާގައި ބައިވެރިވެވަޑައިގަތުމަކީ އެމަނިކުފާނަށް ލިބިވަޑައިގަންނަވާ "ފަހުރެއް" ކަމަށެވެ. އަދި ރައީސް ޑރ. މުހައްމަދު މުއިއްޒާ އެކު ކުރައްވާ މަޝްވަރާތަކުގެ ސަބަބުން ތަފާތު ދާއިރާތަކުން ދެގައުމުގެ ގުޅުންތަކަށް "އާ އުސްމިންތަކަކަށް" އަރައިގެންދާނެ ކަމުގެ ޔަގީންކަން ދެއްވި އެވެ.
މިދަތުރުފުޅަކީ ރައީސް ޑރ. މުހައްމަދު މުއިއްޒު 2023 ވަނަ އަހަރުގެ ނޮވެމްބަރު މަހު ވެރިކަމާ ހަވާލުވެވަޑައިގަތީއްސުރެ، ބޮޑުވަޒީރު މޯދީ ރާއްޖެއަށް ކުރައްވާ ފުރަތަމަ ރަސްމީ ދަތުރުފުޅެވެ. ދެ ސަރުކާރުގެ ހާރިޖީ ސިޔާސަތުތަކުގައި ކުރީކޮޅު ތަފާތުތަކެއް ހުރިނަމަވެސް، ފަހަކަށް އައިސް ދެ ގައުމުގެ ވެރިންގެ މެދުގައި ވަރަށް ރަނގަޅު ޑިމޮކްރެޓިކް ގުޅުމެއް އޮންނަކަން ފާހަގަ ކުރެވެ އެވެ.
ބޮޑުވަޒީރު މޯދީގެ ވެރިކަމުގެ ދަށުން އިންޑިއާ އަކީ މާލީ އެހީތެރިކަމާއި، ތަރައްގީގެ މަޝްރޫއުތަކަށް އެހީވުމާއި، ކޮވިޑް ބަލިމަޑުކަމުގެ ތެރޭގައި ކުއްލި އެހީތެރިކަން ފޯރުކޮށްދިނުން ފަދަ އެހީތެރިކަން ދިވެހިރާއްޖެއަށް ދެމުން އައިސްފައިވާ ގައުމެކެވެ.
ރައީސް މުއިއްޒުގެ ވެރިކަމުގައި ދެ ގައުމުގެ މަތީ ފެންވަރުގެ ބައްދަލުވުންތައް ބާއްވަމުންދާއިރު، އިންޑިއާއަކީ ރާއްޖޭގެ އެންމެ މުހިންމު އިގުތިސާދީ އަދި ތަރައްގީގެ ބައިވެރިންގެ ތެރޭގައި ހިމެނޭ ގައުމެއްކާން ފާހަގަ ކުރެވެ އެވެ.
