ދިވެހިރާއްޖޭގެ 61 ވަނަ މިނިވަން ދުވަހުގެ ރަސްމީ ހަރަކާތްތަކުގައި ޝަރަފްވެރި މެހެމާނެއްގެ ގޮތުގައި ބައިވެރިވެވަޑައިގަންނަވާނީ ސައުދީ އަރަބިއްޔާގެ ޝާހީ އާއިލާގެ ބޭފުޅެއް ކަމަށްވާ ޕްރިންސް ޑރ. މަންސޫރު ބިން މުތައިބު ބިން އަބްދުލްއަޒީޒް އަލް ސައުދު އެވެ.

ސައުދީ ރަސްގެފާނުގެ މުޝީރު، ސްޓޭޓް މިނިސްޓަރު އަދި ކެބިނެޓް މެންބަރުގެ މަގާމު ފުރުއްވާ ޕްރިންސް ޑރ. މަންސޫރު ރާއްޖެ ވަޑައިގެންނެވީ، ސައުދީގެ ވަލީއަހުދު އަދި ބޮޑުވަޒީރު މުހައްމަދު ބިން ސަލްމާން ބިން އަބްދުލްއަޒީޒް އަލް ސައުދުގެ ފަރާތްޕުޅުންނެވެ. މި ދަތުރުފުޅަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ޚާއްޞަ ދައުވަތަކަށް ކުރައްވާ ދަތުރުފުޅެކެވެ.

ވެލާނާ އިންޓަނޭޝަނަލް އެއާޕޯޓުން އެމަނިކުފާނަށް މަރުހަބާ ދެންނެވީ ފޮރިން މިނިސްޓަރު އިރުތިޝާމް އާދަމް އާއި ރައީސް އޮފީހުގެ ފޮރިން ރިލޭޝަންސްގެ ޕްރިންސިޕަލް ސެކްރެޓަރީ މުހައްމަދު ނަސީރެވެ. އެމަނިކުފާނު ރާއްޖެ ވަޑައިގަތުމުން މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) ގެ ފަރާތުން ވަނީ އަސްކަރީ ގާޑް އޮފް އޮނާއެއް އަރުވާފައެވެ.

މިނިސްޓަރު އިރުތިޝާމް އާދަމް ވިދާޅުވި ގޮތުގައި ސައުދީ ޝާހީ އާއިލާގެ މި މަތީ ފަންތީގެ ޒިޔާރަތުން ރަމްޒުކޮށްދެނީ ދިވެހިރާއްޖެ އާއި ސައުދީ އަރަބިއްޔާއާ ދެމެދު އޮތް ބަދަހި އަޚުވަންތަ ގުޅުމެވެ. އަދި ދެ ގައުމުގެ ޕާޓްނަޝިޕަށް ދެެ ފަރާތުންވެސް ދޭ ޚާއްޞަ އަހައްމިއްޔަތު މިކަމުން ހާމަވެއެވެ.

ޕްރިންސް ޑރ. މަންސޫރު މި ދަތުރުފުޅުގައި މާދަމާ ބޭއްވުމަށް ހަމަޖެހިފައިވާ މިނިވަން ދުވަހުގެ ރަސްމީ ޖަލްސާއާއި އަސްކަރީ ޕެރޭޑްގެ ހަރަކާތްތައް ޝަރަފްވެރިކޮށްދެއްވާނެއެވެ.