ދިވެހިރާއްޖެ އިނގިރޭސިވިލާތުގެ ހިމާޔަތުން ނިކުމެ، ފުރިހަމަ މިނިވަން ދައުލަތަކަށް ބަދަލުވިތާ 61 ވަނަ އަހަރު ފުރޭ މިނިވަން ދުވަހުގެ މުނާސަބަތު މާދަމާ (26 ޖުލައި) މުޅި ރާއްޖޭގައި ކުލަގަދަކޮށް ފާހަގަކުރަން ތައްޔާރުވެއްޖެއެވެ.

މި މުނާސަބަތާއި ގުޅިގެން ރާއްޖެއާއި ރާއްޖޭއިން ބޭރުގައި ހުރި ޑިޕްލޮމެޓިކް މިޝަންތަކުގައި ތަފާތު ހަރަކާތްތައް ދަނީ ބާއްވަމުންނެވެ. އެގޮތުން ސްރީލަންކާގައި ހުންނަ ދިވެހި ހައިކޮމިޝަނުން އިސްނަގައިގެން ކޮލަމްބޯގައި ވަނީ ޚާއްޞަ ރަސްމިއްޔާތެއް ބާއްވާފައެވެ.

^{ކޮލޮމްބޯގައި ބޭއްވި ރަސްމިއްޔާތުގެ ތެރެއިން.}

މި ރަސްމިއްޔާތުގައި ބޮޑުބެރާއި ދިވެހި ސަގާފީ ނެށުންތައް ހުށަހަޅާފައިވާއިރު، ލަންކާގެ ސަރުކާރުގެ އިސްވެރިންނާއި ބޭރުގެ ސަފީރުން ބައިވެރިވެވަޑައިގެންނެވިއެވެ.

މާދަމާގެ ރަސްމީ ހަރަކާތްތަކަށް ވެރިރަށް މާލެއާއި ހުޅުމާލެ ވަނީ ދިވެހި ގައުމީ ދިދައިގެ ކުލަތަކުން ދިއްލާލާފައެވެ. މި އަހަރުގެ މިނިވަން ދުވަހުގެ އުފަލުގައި ހައުސިންގ ޑިވެލޮޕްމަންޓް ކޯޕަރޭޝަނުން ދަނީ ކާނިވަލަކާއި، ކާބޯތަކެތީގެސްޓޯލްތަކާއި، ކުޑަކުދިންގެ ކުޅިވަރުތައް ހިމެނޭ ބޮޑު ހަރަކާތެއް ހުޅުމާލޭގައި ކުރިއަށްގެންދަމުންނެވެ.

މީގެ އިތުރުން، މިނިވަން ދުވަހުގެ ރަސްމީ ޖަލްސާއާއި ހަރަކާތްތަކުގައި ބައިވެރިވެވަޑައިގަތުމަށް ސައުދީ އަރަބިއްޔާގެ ޝާހީ އާއިލާގެ ބޭފުޅަކުވެސް ރާއްޖެ ވަޑައިގެންފައި ވެއެވެ. މާދަމާ ހެނދުނު ޖުމްހޫރީ މައިދާނުގައި ބާއްވާ ދިދަނެގުމުގެ ރަސްމިއްޔާތަށްފަހު، ސިފައިންނާއި ކެޑޭޓުންގެ ޕެރޭޑްތަކާއި އެކި ސަގާފީ ކުޅިވަރުތައް ރާއްޖޭގެ އެކި ކަންކޮޅުތަކުގައި ކުރިއަށްދާނެއެވެ.

ދިވެހިރާއްޖެއަށް ފުރިހަމަ މިނިވަންކަން ލިބުނީ 26 ޖުލައި 1965 ގައި، އޭރުގެ ބޮޑުވަޒީރު އިބްރާހީމް ނާޞިރާއި އިނގިރޭސި ސަރުކާރާ ދެމެދު ސޮއިކުރެވުނު އެއްބަސްވުމެއްގެ ދަށުންނެވެ.