ދިވެހިރާއްޖެއަށް ކުރިމަތިވެފައިވާ އެންމެ ބޮޑު އިޖުތިމާޢީ ތިން މައްސަލައަށް ދާއިމީ ހައްލެއް ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ރައީސް ފާހަގަކުރެއްވި ގޮތުގައި، ރާއްޖޭގެ އިޖުތިމާޢީ ފޭރާން ހަލާކުކުރަމުންދާ އެންމެ ބޮޑު ތިން މައްސަލައަކީ މަސްތުވާތަކެތީގެ ވަބާ އާއި ގޭންގު ކުށްތަކާއި މަރާމާރީގެ އިތުރުން ގަވާއިދާ ޚިލާފަށް އުޅޭ ބިދޭސީންގެ މައްސަލައެވެ.
ރައީސުލްޖުމްހޫރިއްޔާ ވިދާޅުވީ، އެމަނިކުފާނު ވެރިކަމާ ހަވާލުވެވަޑައިގެންނެވިއިރު ޤައުމުގެ ހާލަތު އޮތީ އެންމެ ރަނގަޅަކަށް ނޫނެވެ. މިއީ އެތައް ޒަމާނެއް ވަންދެން އަޅާނުލެވި ދޫކޮށްލުމުގެ ސަބަބުން އިންތިހާއަށް ބޮޑުވެފައިވާ މައްސަލަތަކެއް ކަމަށާއި، މީގެ ކުރިން މިކަންކަމަށް މާނަހުރި، ނަތީޖާ ނެރެވޭ ފަދަ މަސައްކަތްތަކެއް ކުރެވިފައި ނެތް ކަމަށް އެމަނިކުފާނު ވިދާޅުވިއެވެ.
Advertisement
ނަމަވެސް، މިހާރުގެ ސަރުކާރުން މި މައްސަލަތަކަށް ދާއިމީ ހައްލެއް ނެރެދެއްވާނެ ކަމުގެ ޔަގީންކަން ރައީސް ދެއްވިއެވެ. އެގޮތުން ޤާނޫނުތަކާއި ގަވާއިދުތަކަށް ގެނެވުނު ހަރުދަނާ އިސްލާހުތަކާއެކު، މިހާރުވެސް މި މައްސަލަތަކަށް އެކަށީގެންވާ ހެޔޮ ބަދަލުތަކެއް އަންނަމުންދާކަން އެމަނިކުފާނު ފާހަގަކުރެއްވިއެވެ.
