ރާއްޖޭގައި މީގެކުރިން އޮތް ސިޔާސީ ބަދަލުހިފުމުގެ ރޫހުގެ އަޅުވެތިކަމުން ގައުމު މިއަދު މިނިވަންކުރެވިއްޖެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ރޭ ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ. މި ޖަލްސާގައި ރައީސް ވަނީ ރާއްޖެއަށް އެކި ދާއިރާތަކުން މިނިވަންކަން ހޯދުމަށް ސަރުކާރުން ކުރައްވަމުންދާ މުހިންމު މަސައްކަތްތަކުގެ ތަފްސީލް ހިއްސާކުރައްވާފައެވެ.

ރައީސް ޑރ. މުޢިއްޒު ވިދާޅުވީ، ދާހިލީ ގޮތުން ގައުމެއްގައި މިނިވަންކަން އޮންނާނީ ޑިމޮކްރަސީގެ މިނިވަންކަން ފުރިހަމަ ގޮތުގައި ލިބިގެން ކަމަށެވެ. އަދި ރާއްޖޭގެ ތާރީޚުގައިވެސް އަދުގެ ސަރުކާރުން ޑިމޮކްރަސީ މިނިވަންކޮށްދީފައިވާ ވަރަށް، ދުވަހަކުވެސް އެކަން ތަންފީޒު ކުރެވިފައި ނުވާކަމަށް އެމަނިކުފާނު ވިދާޅުވިއެވެ.

ސިޔާސީ ހަރަކާތްތަކަށް އޮތް ފުރުސަތުތަކާ ގުޅޭގޮތުން ވާހަކަފުޅު ދައްކަވަމުން ރައީސް ފާހަގަކުރެއްވީ، މިއަދު ސިޔާސީ ހަރަކާތްތައް ހިންގުމުގައި އެއްވެސް ހުރަހެއް ނެތް ކަމަށެވެ. މީގެކުރިން އިދިކޮޅު ސިޔާސީ ލީޑަރުން ޖަލަށްލުމުގެ ސަގާފަތެއް އޮތް ނަމަވެސް، މި ސަރުކާރުން ވަނީ އެ ފަރާތްތަކަށް ބޭނުންވާ ގޮތަކަށް ހަރަކާތްތެރިވުމުގެ ފުރިހަމަ މިނިވަންކަން ދީފައިވާ ކަމަށް އެމަނިކުފާނު ވިދާޅުވިއެވެ.

"އެއްވެސް ސިޔާސީ ލީޑަރަކު މިހާތަނަށް އާއިރު ހައްޔަރުކޮށްފައި ނުވާނެ. ކުރީގެ ރައީސްކަން ކޮށްފައި ހުރި އެއްވެސް ބޭފުޅަކު ޖަލަށްލާފައި ނުވާނެ. މިއީތޯ މީގެކުރިން މިގައުމުގައި ކަންކަން އޮތް ގޮތަކީ؟ ސަރުކާރެއް ހޮވާތަނުން އަވަސްވެ ގަންނަނީ ކުރީގައި އެންމެފަހުން ވެރިކަމުން ފޭބިމީހާ ޖަލަށްލެވޭތޯ. ބަދަލު ހިފުމުގެ ރޫހު ނޫންކަމެއް ގައުމުގައި ތަންފީޒުކޮށްފައިނުވޭ"

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

ރައީސް އިތުރަށް ވިދާޅުވީ، ސިޔާސީ ވިހަގަދަ ބަދަލުހިފުމުގެ އަޅުވެތިކަމުން ގައުމު ސަލާމަތްކޮށް، އަނިޔާވެރިކަން ނިމުމަކަށް ގެނެސްފައިވާ ކަމަށެވެ. އަދި ޚިޔާލު ފާޅުކުރުމާއި ނޫސްވެރިކަމުގެ މިނިވަންކަންވެސް އެންމެ ފުޅާ ދާއިރާއެއްގައި ކަށަވަރުކޮށްދެއްވާފައިވާނެ ކަމަށް ވިދާޅުވިއެވެ. ނަމަވެސް މި މިނިވަންކަމުގެ ބޭނުން ހިފާއިރު، ގާނޫނުއަސާސީއާއި އިސްލާމްދީނުގެ އިންތަކަށް ތަބާވާންޖެހޭނެކަން އެމަނިކުފާނު ހަނދާންކޮށްދެއްވިއެވެ.

މީގެ އިތުރުން، ޝަރުއީ ދާއިރާގެ މިނިވަންކަން ކަށަވަރުކުރުމަށްޓަކައި ކޯޓުތަކުގެ ބަޖެޓު ބޮޑުކޮށް، ޖާގަ ތަނަވަސް އިމާރާތްތައް ހޯދައިދިނުމުގެ މަސައްކަތް ކުރިއަށްދާކަންވެސް ރައީސް ފާހަގަކުރެއްވިއެވެ. އެގޮތުން ހުޅުމާލޭގައި އަޅާ ރާއްޖޭގެ އެންމެ ބޮޑު ކޯޓު ކޮމްޕްލެކްސްގެ މަސައްކަތް ނިމުމުން، ޝަރުއީ ދާއިރާއަށް ހަގީގީ މިނިވަންކަން ލިބިގެންދާނެ ކަމަށް ރައީސް ވިދާޅުވިއެވެ.