އިންޑިއާގެ އާބާދީގައި ހިމެނޭ "ޖެން-ޒީ" ނުވަތަ ޒުވާނުންނާ އޮންނަ ގުޅުން ބަދަހިކުރުމުގެ މަގުސަދުގައި އެ ގައުމުގެ ބޮޑުވަޒީރު ނަރެންދުރަ މޯދީ ސޯޝަލް މީޑިއާ ބޭނުންކުރައްވާ އުސްލޫބަށް ބޮޑު ބަދަލެއް ގެންނަވައި، އާންމު އާދައިގެ ވީޑިއޯތައް ހިއްސާކުރައްވަން ފައްޓަވައިފިއެވެ.
އާންމުގޮތެއްގައި ވަރަށް ތައްޔާރުވެވަޑައިގެން ރަސްމީ ތަގުރީރުތަކާއެކު ކެމެރާގެ ކުރިމައްޗަށް ވަޑައިގަންނަވާ އުމުރުން 74 އަހަރުގެ މޯދީ، ދާދިފަހުން ވަނީ އިންސްޓަގްރާމްގައި "ސެލްފީ" ވީޑިއޯތަކާއި، ޓްރެންޑިން "ގެޓް ރެޑީ ވިތު މީ" (GRWM) އުސްލޫބުގެ ރީލްސްތައް އާންމުކުރައްވަން ފައްޓަވާފައެވެ. އަދި މި ވީޑިއޯތަކުގައި ޒުވާނުންނަށް "ފްރެންޑްސް" ގެ ނަމުން މުޚާތަބުކުރައްވައި ޚާއްސަ މެސެޖުތައް ވެސް ގެންދަވަނީ ހިއްސާކުރައްވަމުންނެވެ.
މޯދީގެ ސިޔާސީ މުއާމަލާތުގެ ވައްޓަފާޅިއަށް މި ބޮޑު ބަދަލު އައިސްފައިވަނީ މި އަހަރުގެ ކުރީކޮޅު އިންޑިއާގެ ޒުވާނުން އިސްނަގައިގެން ބޭއްވި އިހުތިޖާޖުތަކަށްފަހުގައެވެ. އިންޓަނެޓް މީމްސް އާއި އިންސްޓަގްރާމް ރީލްސް ބޭނުންކޮށްގެން އޮންލައިންކޮށް ފެށި މި ހަރަކާތްތައް ވަނީ ސަރުކާރަށް ކުރިމަތިވި ސިޔާސީ ބޮޑު ފިއްތުމަކަށް ބަދަލުވެގެން ގޮސްފައެވެ. ވަރުގަދަ ޑިޖިޓަލް ނެޓްވޯކެއް އޮންނަ މޯދީގެ ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ) އަށްވެސް މިކަން ވެގެންދިޔައީ ހީވެސްނުކުރާފަދަ ކަމަކަށެވެ.
Advertisement
ޒުވާނުންގެ ސަމާލުކަން ހޯދުމުގެ މަސައްކަތުގެ ތެރެއިން، މިހާރު ވަނީ ވަޒީރުންގެ ސޯޝަލް މީޑިއާ ހަރަކާތްތައް ވަޒަންކުރާ "ރިޕޯޓް ކާޑެއް" ވެސް ތައްޔާރުކުރަން ފައްޓަވާފައެވެ. އިންޑިއާގެ ނޫހެއް ކަމަށްވާ "އިންޑިއާ ޓުޑޭ" އިން ރިޕޯޓުކޮށްފައިވާ ގޮތުގައި، މި ރިޕޯޓް ކާޑު މިހާރު ވަނީ ކެބިނެޓް ބައްދަލުވުމަށް ވެސް ހުށަހަޅާފައެވެ. މި ވަޒަންކުރުމުގައި ބަލާފައިވާ ކަންތައްތަކުގެ ތެރޭގައި ވަޒީރުން ކުރެއްވި ޕޯސްޓްތަކުގެ އަދަދާއި، ލިބުނު އިންޓަރެކްޝަން ނުވަތަ އެންގޭޖްމަންޓާއި، ލައިކްސްގެ އިތުރުން އިންސްޓަގްރާމް، އެކްސް އަދި ފޭސްބުކްގައި ފޮލޯވަރުން އިތުރުވި މިންވަރު ހިމެނެއެވެ. މި ލިސްޓުގެ އެންމެ ކުރީގައި އުޅުއްވަނީ ބޮޑުވަޒީރު ނަރެންދުރަ މޯދީއެވެ.
އިންޑިއާގެ އާބާދީގެ 60 އިންސައްތައަށްވުރެ ގިނައީ އުމުރުން 35 އަހަރުން ދަށުގެ މީހުންނެވެ. އެހެންކަމުން، ކުރިއަށް އޮތް 2029 ވަނަ އަހަރުގެ އާންމު އިންތިޚާބުގައި ޖެން-ޒީ ވެގެންދާނީ އެންމެ ނުފޫޒުގަދަ އަދި ނަތީޖާ ބަދަލުކޮށްލަނިވި ވޯޓިން ބްލޮކަށެވެ. ސިޔާސީ މާހިރުން ފާހަގަކުރާ ގޮތުގައި، މި ޖީލާ ހަމައަށް ސިޔާސީ މެސެޖުތައް އެންމެ ފުރިހަމައަށް ފޯރުކޮށްދެވޭނީ އިންސްޓަގްރާމް ފަދަ ޕްލެޓްފޯމްތަކުގައި ރަސްމީ އުސޫލުތަކުން ބޭރުން، އެމީހުންގެ ޝައުގުވެރިކަން ދަމައިގަންނަ ފަދަ ޒަމާނީ ކޮންޓެންޓް މެދުވެރިކޮށެވެ.
ޒުވާނުންނާ އޮންނަ ގުޅުން ވަރުގަދަކުރުމުގެ މަސައްކަތް ހަމައެކަނި ސޯޝަލް މީޑިއާއަކުން ނުނިމެއެވެ. އިންޑިއާ ސަރުކާރުން މިހާރު ވަނީ "ވަން-ޑޭ، ވަން-ޔުނިވާސިޓީ" ގެ ނަމުގައި ޚާއްސަ ޕްރޮގްރާމެއް ފަށަން ތައްޔާރުވެފައެވެ. މި ޕްރޮގްރާމުގެ ދަށުން ވަޒީރުން ގައުމުގެ އެކި ކަންކޮޅުތަކުގައިވާ ޔުނިވާސިޓީތަކަށް ވަޑައިގެން ދަރިވަރުންނާ ސީދާ ބައްދަލުކުރައްވައި، އެ މީހުންގެ ކަންބޮޑުވުންތައް އަޑުއައްސަވާނެއެވެ.
މާހިރުން ދެކޭގޮތުގައި ޒަމާނީ ސޯޝަލް މީޑިއާގެ ޒަރީއާއިން ޒުވާނުންގެ ސަމާލުކަން ހޯދުމަކީ ފަސޭހަކަމަކަށް ވިޔަސް، އެ މީހުންގެ އިތުބާރު ހޯދައި، އެކަން ވޯޓަކަށް ބަދަލުކުރުމަކީ ސަރުކާރަށް އޮތް އެންމެ ބޮޑު ގޮންޖެހުމެވެ. އެހެންކަމުން ސޯޝަލް މީޑިއާގެ އިތުރުން ސީދާ ބައްދަލުވުންތަކަކީވެސް މުހިންމު ފިޔަވަޅެކެވެ.
