އީރާނުން އަނެއްކާވެސް ކާމިޔާބުކަމާއެކު ޖައްވަށް ރޮކެޓެއް ފޮނުވައިފިއެވެ.
މިފަހަރު އީރާނުގެ ޖައްވީ އިދާރާއިން ފޮނުވައިލީ ބަރު އަދި ގިނަ ސެޓެލައިޓްތައް އެއްފަހަރާ ޖައްވަށް ފޮނުވުމުގެ ޤާބިލުކަން ހުންނަ ޒަމާނީ ކެރިއަރ ރޮކެޓެކެވެ.
މި މިޝަން ފެށީ ހުޅަނގުގެ ޤައުމުތަކުން އީރާނަށް އަޅާފައިވާ ހަރުކަށި ދަތިކުރުމުގެ ފިޔަވަޅުތަކުގެ ތެރޭގައި، އީރާނުގެ ދިރާސީ ޖައްވީ ޓެކްނޮލޮޖީ ކުރިއެރުވުމަށް ހިންގި ތަޖުރިބާ މިޝަންއެއްގެ ގޮތުގައެވެ. ރަސްމީ ފަރާތްތަކުން ބުނެފައިވާ ގޮތުގައި މި ރޮކެޓްގައި މިހާރު ތަރައްޤީކުރަމުންދާ އައު ޓެކްނޮލޮޖީތައް ހިމެނެއެވެ.
މީގެ ކުރިން އީރާނުން އެއް ރޮކެޓުން ތިން ސެޓެލައިޓް ޖައްވަށް ފޮނުވާފައި ވެއެވެ. ނަމަވެސް، މި މިޝަންގެ މަޤުސަދަކީ ސްޓްރަކްޗަރަލް، ފިއުލް އަދި ސޮފްޓްވެއަރ ރަނގަޅުކުރުމުގެ ތަޖުރިބާކޮށް އެ ޤާބިލުކަން އިތުރުކުރުމެވެ. މި މިޝަން ވަރަށް ކާމިޔާބު ކަމަށް ޖައްވީ އިދާރާއިން ސިފަކޮށްފައިވެއެވެ.
އެމެރިކާ އަދި ޔޫރަޕުން އީރާނަށް ދަތިކުރުމުގެ ފިޔަވަޅުތައް އަޅާފައިވާއިރު، އީރާނުން ދަނީ އެ ޤައުމުގެ އަމިއްލަ އުފެއްދުންތަކަށް ބަރޯސާވެ ކުރިއަރަމުންނެވެ. މިއީ އީރާނުން ސެޓެލައިޓާ ގުޅޭގޮތުން ހިންގި ހަތްވަނަ މިޝަންއެވެ. މި ކާމިޔާބީއާއެކު، އީރާނަކީ އަމިއްލަ ރޮކެޓް ސިސްޓަމް ބޭނުންކޮށްގެން ސެޓެލައިޓް އުފައްދާ އަދި ޖައްވަށް ފޮނުވުމުގެ ޤާބިލުކަން ލިބިފައިވާ ހަމައެކަނި އިސްލާމީ ޤައުމެވެ. މިއީ މެދުއިރުމަތީގައި ހިނގަމުންދާ ޖައްވީ ރޭހުގައި އީރާނަށް ލިބުނު ވަރަށް މުހިންމު ކުރިއެރުމެކެވެ.
