ނ. ހޮޅުދޫގައި ޒަހަމްތަކަކާއި އެކު މަރުވެފައި އޮއްވާ ފެނުނު ޒަކިއްޔާ މޫސާގެ އާއިލާއާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ބައްދަލުކުރައްވައިފި އެވެ.
ޒަކިއްޔާގެ އާއިލާގެ އަރިހަށް ރައީސް ވަޑައިގެންނެވީ ނ. އަތޮޅުގެ މީހުން ދިރިއުޅޭ ރަށްތަކަށް އެމަނިކުފާނު މިހާރު ކުރައްވަމުންގެންދަވާ ދަތުރުފުޅުގެ ތެރެއިން މިއަދު ހޮޅުދޫއަށް ވަޑައިގެންނެވުމަށްފަހު އެވެ.
ރައީސް ޒަކިއްޔާގެ އާއިލާއާ ބައްދަލުކުރެއްވުމުން އާއިލާގެ ފަރާތުން ހުރި ކަންބޮޑުވުން އެމަނިކުފާނާ ހިއްސާކުރެއްވި އެވެ. އެގޮތުން ޒަކިއްޔާގެ މަރަށް 342 ދުވަސް ފާއިތުވެފައިވާއިރު އަދިވެސް އެ މަރަށް އިންސާފު ލިބިފައި ނުވާ ކަމަށާއި އިންސާފު ހޯދުމަށް ސަރުކާރުގެ އެކި ލެވެލްތަކުގެ ބޭފުޅުންނާއި ބައްދަލުކޮށް ވާހަކަދައްކައިގެންވެސް އިންސާފެއް ނުލިބޭތީ އާއިލާއިން ވަނީ ކަންބޮޑުވުން ފާޅުކޮށްފަ އެވެ.
އަދި މާޅޮހުގައި މީހަކަށް އަނިޔާކޮށް މަރާލުމާއި ގުޅިގެން ތަހުގީގަށް އެރަށް ބަންދުކުރި ނަމަވެސް ޒަކިއްޔާގެ މަރުގެ ތަހުގީގަށް ހޮޅުދޫ ބަންދު ނުކުރިކަމުގެ ޝަކުވާވެސް ޒަކިއްޔާގެ އާއިލާއިން ރައީސްގެ އަރިހުގައި ވަނީ ކޮށްފައެވެ.
އާއިލާގެ ފަރާތުން ރައީސްއަށް ދެންނެވީ ޒަކިއްޔާގެ ގާތިލު ހޯދައި ދިނުމަށެެވެ. އެ މަރާއި ގުޅިގެން މިހާތަނަށް މީހަކު ހައްޔަރުކޮށްފައި ނުވި ނަމަވެސް އާއިލާއިން ތުހުމަތުކުރަނީ ޒަކިއްޔާ މަރާލީ ކަމަށެވެ. މީގެ އިތުރުން ޒަކިއްޔާގެ މަރުގެ މައްސަލާގައި ކުރި މުޒާހަރާތަކުގެ ތެރެއިން ފުލުހުންގެ ބެލުމުގެ ދަށަށް ގެންދިޔަ ފަރާތްތަށް ދޫކޮށްދިނުމަށްވެސް އާއިލާއިން ރައީސްގެ އަރިހުން ވަނީ އެދިފަ އެވެ. އާއިލާއިން ބުނީ އެ ފަރާތްތަކުން ފުލުހުންގެ ޒިންމާއަށް ހުރަސްއެޅުނީ ޖަޒުބާތުގައި ކަމަށެވެ.
ޒަކިއްޔާގެ އާއިލާއާއި ބައްދަލުކުރެއްވި ވަގުތު އާއިލާއިން ވަނީ ހިމޭން އިހުތިޖާޖެއްވެސް ކޮށްފަ އެވެ. އަދި ބައްދަލުުރެއްވުމުން އާއިލާގެ ފަރާތުން ވަނީ ރައީސް އަށް ޝުކުރު އަދާކޮށްފަ އެވެ. އަދި އާއިލާއިން އުއްމީދުކުރަނީ ޒަކިއްޔާގެ މަރަށް އިންސާފު ލިބޭނެ ކަމަށެވެ.
ނ. ހޮޅުދޫ، ނިއުލައިފް ގޭގައި ދިރިއުޅެމުން އައި އުމުރުން 50 އަހަރުގެ ޒަކިއްޔާ މޫސާ މަނިކު މަރުވެފައި އޮއްވާ ފެނުނީ މިދިޔަ އަހަރުގެ ސެޕްޓެމްބަރު މަހުގެ 10 ވަނަ ދުވަހުއެވެ. ފުލުހުންގެ ފަރާތުން ކުރިން ހާމަކޮށްފައިވާ މައުލޫމާތު ތަކަށް ބަލާއިރު، ޒަކިއްޔާ މަރުވެފައި އޮތްވާ ފެނުނީ އޭނާ ދިރިއުޅޭ ގޭގެ ގުދަނެއްގެ ތެރޭގައި ވެއްޓިފައި އޮއްވައެވެ. އޭނާގެ ހަށިގަނޑުގައި ޒަހަމްތަކެއް ފެންނަން ހުރި ކަމަށާއި، އޭނާ އޮތް ދިމާލުގައި ވަޅިއެއް ވެސް އޮތް ކަމަށް ފުލުހުން ބުންޏެވެ.
