ދައުލަތުގެ ތަފާތު މުއައްސަސާތަކާ ބެހޭ ސައްހަ މައުލޫމާތު އާންމުންނަށް ފަސޭހަކަމާއެކު އެއްތަނަކުން ފޯރުކޮށްދިނުމުގެ މަގުސަދުގައި، ދައުލަތުގެ މުއައްސަސާތަކުގެ ހާއްސަ ޑިރެކްޓަރީއަކާއި އެއަށް ހާއްސަ ވެބްސައިޓެއް ރައީސުލްޖުމްހޫރިއްޔާގެ އޮފީހުން އިފުތިތާހު ކުރައްވައިފިއެވެ.
މި ޑިރެކްޓަރީއަކީ ސަރުކާރުގެ "މޯލްޑިވްސް 2.0" ގެ ތަސައްވުރާ އެއްގޮތަށް، ދައުލަތުގެ އިދާރީ ހިންގުން އިތުރަށް ހަރުދަނާކޮށް، ދެފުށް ފެންނަ، ހާމަކަން ބޮޑު ގޮތެއްގައި ސަރުކާރުގެ މަސައްކަތްތައް ބައްޓަންކުރުމަށްޓަކައި ކުރެވެމުންދާ މުހިންމު މަސައްކަތްތަކުގެ ތެރެއިން ގާއިމުކުރެވުނު ވަސީލަތެކެވެ. މި ޑިރެކްޓަރީގެ ވެބްސައިޓް އެޑްރެހަކީ [directory.presidency.gov.mv] އެވެ.
މި ޑިރެކްޓަރީގައިވާ މައުލޫމާތުތައް އަބަދުވެސް އެންމެ ފަހުގެ މައުލޫމާތަށް އަދާހަމަކޮށް ބެލެހެއްޓުމަށްޓަކައި ހާއްސަ އިންތިޒާމުތަކެއް ވަނީ ހަމަޖައްސަވާފައެވެ. އެގޮތުން، މުއައްސަސާގެ އިސްވެރިޔާގެ ގޮތުގައި ކަނޑައަޅާ ފަރާތުގެ ނަމާއި، އެޑްރެސް، މުވާސަލާތީ މައުލޫމާތު ނުވަތަ ސޯޝަލް މީޑިއާ ލިންކުތަކަށް އެއްވެސް ބަދަލެއް އަތުވެއްޖެނަމަ، ވެބްސައިޓުގައިވާ މައްސަލަ ހުށަހަޅާ ފޯމު ނުވަތަ އީމެއިލް މެދުވެރިކޮށް އެކަން ރައީސުލްޖުމްހޫރިއްޔާގެ އޮފީހަށް އެންގެވުމަށް ވަނީ އެދިވަޑައިގެންފައެވެ.
Advertisement
ދައުލަތުގެ އިދާރާތަކުން ބޭނުންކުރާ ރަސްމީ ލިޔެކިޔުންތަކާއި، މަތުބާތަކާއި، ޑޭޓާބޭސްތަކުގެ އިތުރުން ވެބްސައިޓްތަކާއި ސޯޝަލް މީޑިއާ ވަސީލަތްތަކުގައި މުއައްސަސާތަކުގެ ނަންތައް ދިވެހިބަހުންނާއި އިނގިރޭސިބަހުން ލިޔުމުގައި، މި ޑިރެކްޓަރީގައި ހިމެނޭ ގޮތަށް ބޭނުންކުރުމަށް ސަރުކާރުން ވަނީ އަންގަވާފައެވެ.
