ސްޓޫޑަންޓް ލޯނަށް ޝަރުތު ހަމަވި ހުރިހާ ކުދިންނަށް ލޯނު ހަމަޖެއްސުމަށް ކަމާބެހޭ އިދާރާތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދަންނަވައިފިއެވެ.
ރައީސްގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވީ ރާއްޖެއާއި ރާއްޖެއިން ބޭރުން މަތީ ތައުލީމު ހާސިލު ކުރުމަށް ދޫކުރާ ލޯނު ސްކީމަށް މިއަހަރު ކުރިމަތިލާ، ޝަރުތުހަމަވާ ހުރިހާ ދަރިވަރުންނަށް ލޯނު ދޫކުރުމަށް ކަމާބެހޭ ވުޒާރާތަކަށް ދަންނަވާފައިވާ ކަމަށެވެ.
ރާއްޖެއާއި ރާއްޖެއިން ބޭރުން މަތީ ތައުލީމު ހާސިލުކުރުމަށް ދޫކުރާ ލޯނު ސްކީމަށް މިއަހަރު 806 ދަރިވަރަކު ޝަރުތު ހަމަވެއެވެ.
މި ލޯނަށް 1،338 މީހުން ކުރިމަތިލި ކަމަށް މަތީ ތައުލީމާއި ބެހޭ ވުޒާރާއިން ބުނެފައިވެއެވެ.
ލޯނާ ގުޅޭ ގޮތުން ޝަކުވާ ހުށަހެޅުމުގެ ފުރުސަތު ހުޅުވާލާފައިވަނީ މިއަދުން ފެށިގެން އަންނަ އޮގަސްޓް މަހުގެ ތިންވަނަ ދުވަހުގެ ނިޔަލަށެވެ. ވުޒާރާއިން ބުނީ ލޯނަށް ޝަރުތު ހަމަނުވާ ސަބަބު ވުޒާރާގެ ވެބްސައިޓުގައި އާންމުކޮށްފައިވާނެ ކަމަށެވެ.
މި ލޯނު ސްކީމަށް ކުރިމަތިލުމުގެ ފުރުސަތު ހުޅުވާލީ މިދިޔަ މާޗު 28 ގައެވެ. ލޯނަށް އެދި ކުރިމަތިލުމަށް މަހެއްހާ ދުވަހުގެ މުއްދަތެއް ދީފައިވެއެވެ.
