މަނަދޫއާއި އުނގޫފާރާ ދެމެދު، ދެމެހެއްޓެނިވި ގޮތެއްގައި ސީދާ ދަތުރުކުރެވޭނޭ ގޮތަށް، މި އަހަރުގެ ނޮވެންބަރު މަހު އާރުޓީއެލް ފެރީގެ ހިދުމަތްތައް ފައްޓަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ނ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި މަނަދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.
ނ. އަތޮޅުގައި އާރުޓީއެލްގެ ހިދުމަތް މިހާރު ގާއިމްކުރެވިފައިވާކަން ފާހަގަކުރައްވާ ރައީސް ވިދާޅުވީ ބޭސް ފަރުވާގެ ކަންކަމުގައި ނ. އަތޮޅުގެ ވަރަށް ގިނަ ރައްޔިތުން އުނގޫފާރަށް ދާން ޖެހޭ ކަމަށެވެ. އެހެންކަމުން މަނަދޫއިން އުނގޫފާރަށް ސީދާ ދަތުރުތައް ކުރުމަށް އާރުޓީއެލްގެ ފެރީއެއް ހަމަޖެއްސުމުގެ މަަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ.
ރައީސް ވިދާޅުވީ އުނގޫފާރުގައި ޓާޝަރީ ހޮސްޕިޓަލެއް ހެދުމުގެ މަސައްކަތް ކުރަމުން އަންނަ ކަމަށާއި، އެ ހޮސްޕިޓަލަކީ މުޅި ސަރަހައްދަށްވެސް އަންނަ ހޮސްޕިޓަލެއް ކަމުން، އުނގޫފާރަށް ސީދާ ދަތުރުކުރާނެ ނިޒާމެއް ބޭނުންވާ ކަމަށެވެ. އަދި އެގޮތުގެ މަތިން ނޮވެމްބަރު މަހު، ދެމެހެއްޓެނިވި ގޮތެއްގައި މަނަދޫއާއި އުނގޫފާރާ ދެމެދު އާރުޓީއެލްގެ ހިދުމަތް ފެށިގެންދާނެ ކަަމަށް ރައީސް ވިދާޅުވި އެވެ.
ސަރުކާރުގެ އަމާޒަކީ މި އަހަރު ނިމުމުގެ ކުރިން ރާއްޖޭގެ ހުރިހާ އަތޮޅެއްގައި އާރުޓީއެލް ފެރީގެ ހިދުމަތް ފެށުމެވެ.
ސަރުކާރުން އެމްޓީސީސީއާ ހަވާލުކޮށްގެން ހިންގާ މި މުހިންމު މަޝްރޫއުއަށް 800 މިލިއަން ރުފިޔާ ހަރަދުކުރެއެވެ.
