ޣައްޒާގައި ހިނގަމުންދާ ހަނގުރާމަ ވަގުތުން ހުއްޓާލުމަށް ގޮވާލައި، އިނގިރޭސިވިލާތާއި، ފަރަންސޭސިވިލާތާއި، ކެނެޑާ އާއި، އޮސްޓްރޭލިއާ އަދި ގިނަ ޔޫރަޕްގެ ގައުމުތައް ހިމެނޭ 25 ގައުމުން ގުޅިފައިވާ ބަޔާނެއް ނެރެފިއެވެ.
މި ބަޔާނުގައި ޣައްޒާގެ އިންސާނީ ހާލަތު ސިފަކޮށްފައިވަނީ "ކާރިސާއެއް"ގެ ގޮތުގައެވެ. އަދި އިޒްރޭލުން އެހީ ދިނުމަށް ގެންގުޅޭ ސިޔާސަތުތަކާއި، އާއްމު ރައްޔިތުންނަށް ދެމުންދާ ގެއްލުންތަކަށް ވަނީ ފާޑުކިޔާފައެވެ.
ގުޅިފައިވާ ބަޔާން ނެރުނު ގައުމުތަކުގެ ޚާރިޖީ ވަޒީރުން ވަނީ "އެހީގެ ކަންކަން މަޑުޖެހިފައިވުން" އަދި ކުޑަކުދިން ވެސް ހިމެނޭ ގޮތަށް އާދަޔާ ޚިލާފަށް ގިނައިން އާއްމު ރައްޔިތުން މަރަމުންދާ ދިޔުން ކުށްވެރިކޮށްފައެވެ.
Advertisement
އިޒްރޭލްގެ ސަރުކާރުގެ އަމަލުތައް ބައިނަލްއަޤްވާމީ އިންސާނީ ގާނޫނާ ޚިލާފުވާ ކަމަށް ވެސް މި ބަޔާނުގައި ބުނެފައިވެއެވެ.
ޙަމާސް އިން ބުނާ ގޮތުގައި 1 ލައްކައަށްވުރެ ގިނަ ފަލަސްޠީނުގެ ރައްޔިތުން ޝަހީދުވެފައިވާއިރު، އެހީ ހޯދަން މަސައްކަތް ކުރި 800 އަށް ވުރެ ގިނަ ފަލަސްޠީނު ރައްޔިތުން ވަނީ ޝަހީދު ކޮށްލާފަ އެވެ.
ހަމާސް އިން 2023 ވަނަ އަހަރުގެ އޮކްޓޯބަރު 7 ގައި ދިން ހަމަލާއަކާ ގުޅިގެން ފެށުނު މި ހަނގުރާމަ މެދުކެނޑުމެއްނެތި ކުރިއަށްދާއިރު، ސުލްހައިގެ މަޝްވަރާތަކަށް އަދިވެސް އެއްވެސް ކުރިއެރުމެއް ލިބިފައެއް ނުވެއެވެ.
މި ބަޔާނުގައި ސޮއިކުރި 25 ގައުމުން ވަނީ ސިޔާސީ ހައްލެއް ހޯދުމަށް ފުރިހަމައަށް ތާއީދުކުރާނެ ކަމަށް ވަޢުދުވެފައެވެ.
