ނ. ހެނބަދޫގެ ބިންހިއްކުމުގެ އަމަލީ މަސައްކަތް މިއަހަރުގެ ނޮވެމްބަރު މަހު ފެށޭނެކަމުގެ ޔަގީންކަން ރައީސުލްޖުމުހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.

ނ. އަތޮޅަށް ރައީސް ކުރައްވަމުންގެންދަވާ ދަތުރުފުޅުގެ ތެރެއިން މިއަދު ހެނބަދޫ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ އެންމެ އަވަހަށް ކޮންޓްރެކްޓް ކުރަން ހުޅުވާލާ މަޝްރޫއުތަކުގެ ތެރޭގައި އެ ރަށުގެ ބިން ހިއްކުމުގެ މަސައްކަތް ހިމެނިގެން ދާނެ ކަމަށެވެ. އަދި އެ މަޝްރޫއުގެ އަމަލީ މަސައްކަތް މި އަހަރުގެ ނޮވެމްބަރު މަހުގައި ފެށުމަށް ރައީސް އޮފީހުން މަޝްވަރާ ކުރަމުންދާކަމަށް ވިދާޅުވި އެެވެ.

ރައީސް ދެއްކެވި ވާހަކަފުޅު ތަކުގެ ތެރޭގައި އެރަށުގެ ސިއްހީ މަރުކަޒަށް ގެންނަން ޖެހޭ ތަރައްގީތަކާއި، ފުޓުބޯޅަ ދަނޑު ތަރައްގީ ކުރުމާއި، މޫދަށް އެރޭ ސަރަހައްދުގެ މަސައްކަތްތައް އަވަސް މުސްތަގުބަލެއްގައި ކުރިއަށް ގެންދާނެކަން ފާހަގަ ކުރެއްވިއެވެ.

ރައީސް ވިދާޅުވީ ހެނބަދޫގައި ބިންހިއްކެން އޮތް އެންމެ ބޮޑުމިނަކީ ހަ ހެކްޓަރުކަށާއި އެއީ ރަށަށް ވަރަށް މުހިންމު ޖާގައެއް ކަމަށެވެ. ބިންހިއްކާ ނިމުމުން ބިމުން ގޯތި ނުވަތަ ހައުސިންއަށާއި ކުޅިވަރު ކުޅުމަށް ބޭނުންކުރެވޭނެ އެންމެ ބޮޑު ޖާގައެއް ލޭންޑް ޔޫސް ޕްލޭން ހަދާ ނިންމާއިރު އޮންނަވަރަށް ހަމަޖެހިގެންދާނެ ކަމަށްވެސް ރައީސް ވިދާޅުވި އެވެ.

ހަމަ އެއާއެކު އެރަށުގެ ކުނި މެނޭޖް ކުރުމުގެ މަސައްކަތްތައް މިހާރު ފެނަކައާއި ހަވާލު ކުރެވިފައިވާކަމަށްވެސް ރައީސް ވިދާޅުވިއެވެ. ރައީސުލްޖުމްހޫރިއްޔާ ވަނީ ހެނބަދޫގެ ކައުންސިލްއާއި ބައްދަލުކުރައްވައި، ކައުންސިލުން ފާހާގަކުރެއްވި ކަންކަން ބައްލަވާނެކަމުގައި ވިދާޅުވެފައެވެ.

އަދި އެމަނިކުފާނު ވައުދުވެވަޑައިގެންނެވި ގޮތަށް ސިއްހީ މަރުކަޒުގެ ހިދުމަތް ރަނގަޅު ކުރުމަށްޓަކައި މުވައްޒަފުން އިތުރުކުރުމުގެ މަސައްކަތް މިހާރު ކުރިއަށްދާ ކަމަށާއި މިއަހަރު ނިމުމުގެ ކުރިން މަދުވެގެން 16 ގަޑިއިރަށް، ހިދުމަތްދެވޭވަރަށް ސިއްހީ މަރުކަޒުގެ ]ހިދުމަތްތައް ގާއިމުކޮށްދޭނެކަމަށް އެ މަނިކުފާނު ވިދާޅުވިއެވެ.

ރައީސްގެ ވައުދުފުޅާ އެއްގޮތަށް ހެނބަދޫގައި މިސްކިތެއް އެޅުމަށްޓަކައި މިއަދު ވަނީ އެ މިސްކިތުގެ ބިންގާއަޅުއްވާފަ އެވެ. މީގެ އިތުރުން ހެނބަދޫގައި ސަރުކާރުން ގާއިމުކުރާ ފިޓްނެސް އެންޑް ރެކްރިއޭޝަން ސެންޓަރުގެ ބިންގާ ވެސް މިއަދު ވަނީ އަޅުއްވާފައެވެ.