ނ. ހެނބަދޫގައި އަލަށް ގާއިމުކުރާ މިސްކިތުގެ ބިންގާ އަޅައިފި އެވެ.

އެ މިސްކިތުގެ ބިންގާ އަޅާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި މިއަދު ހެނބަދޫއަށް ވަޑައިގެން ބޭއްވި ހާއްސަ ރަސްމިއްޔާތެއްގަ އެވެ.

ހެނބަދޫގައި އަލަށް ގާއިމްކުރާ މި މިސްކިތުގެ މަސައްކަތް ހަވާލުކޮށްފައިވަނީ ފެނެކަ ކޯޕަރޭޝަން ލިމިޓެޑާއެވެ.

އިސްލާމީ ކަންތައްތަކާ ބެހޭ ވުޒާރާއިން ބުނީ މި މަޝްރޫއު ފެނަކައާ ހަވާލުކޮށްފައިވަނީ 11،616،359.76 ރުފިޔާއަށް، އެއް އަހަރު ދުވަހުގެ ތެރޭގައި ނިންމުމަށް ކަމަށެވެ.

500 މީހުންގެ ޖާގައިގެ މި މިސްކިތުގައި ލައިބްރަރީއާއި ކްލާސްރޫމް ގާއިމްކުރެވިގެންދާނެ ކަމަށް ވުޒާރާއިން ބުނެފައިވެ އެވެ. އަދި އޭސީއާއި ސޯލަ ޕެނަލް ހަރުކުރެވޭނެ ކަމަށް ވެސް ވުޒާރާއިން ބުނެފައިވެ އެވެ.

މި ރަސްމިއްޔާތުގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު ވެސް ބައިވެރިވެވަޑައިގެންނެވި އެވެ.

ވަޒީރު ވިދާޅުވީ މިއީ ރައީސްގެ މެނިފެސްޓޯގެ ތަސައްވުރާ އެއްގޮތަށް އަލަށް ޑިޒައިން ކުރެވިގެން ރާއްޖޭގެ ކަންކޮޅުތަކުގައި ބިނާ ކުރެވޭ މިސްކިތްތަކުގެ ތެރެއިން މިސްކިތެއް ކަމަށެވެ.

އެންމެ ގިނައިން މިސްކިތް ބިނާކުރާ އަހަރަށް މި އަހަރު ވެގެންދާނެ ކަމަށް ރައީސް ވަނީ މިދިޔަ މެއި މަހު ވިދާޅުވެފައެވެ. އަދި މި އަހަރު ތެރޭ އަތޮޅު ތެރޭގެ 11 މިސްކިތާއި ދެ އިސްލާމީ މަރުކަޒު ހުޅުވުމަށް ނިންމާފައިވާ ކަމަށް ވުޒާރާއިން ވަނީ ބުނެފަ އެވެ.