އުއްތަމަފަނޑިޔާރު މުއުތަސިމް އަދުދާނު މާދަމާ މަގާމުން ރިޓަޔާކުރައްވާތީ ސުޕްރީމް ކޯޓު ހިންގެވުން އެ ކޯޓުގެ ފަނޑިޔާރު އަބްދުﷲ ހަމީދުއާ ހަވާލުކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ޖޭއެސްސީން ބުނީ އުއްތަމަފަނޑިޔާރު މުއުތަސިމް މާދަމާއިން ފެށިގެން ފަނޑިޔާރުކަމުން ޝަރަފުވެރިކަމާއެކު ރިޓަޔާކޮށް ދިނުމަށް ކޮމިޝަނުން ނިންމަވާފައިވާ ކަމަށެވެ.

އެ މަގާމަށް ބޭފުޅަކު ހަމަޖައްސަންދެން ސުޕްރީމް ކޯޓު ހިންގެވުން އެ ކޯޓުގެ ފަނޑިޔާރު ހަމީދުއާ ހަވާލުކުރުމަށް މި މަހުގެ 17 ވަނަ ދުވަހު ބޭއްވި އެ ކޮމިޝަނުގެ 26 ވަނަ ޖަލްސާގައި ނިންމާފައިވާ ކަމަށް ޖޭއެސްސީން ބުންޏެވެ.

އުއްތަމަފަނޑިޔާރުގެ ހައިސިއްޔަތުން އަދި ރާއްޖޭގެ ސުޕްރީމް ކޯޓުގެ ފަނޑިޔާރެއްގެ ހައިސިއްޔަތުން މުއުތަސިމް ވަނީ 9 އަހަރާއި 7 މަހާއި 12 ދުވަހު ޝަރުއީ ދާއިރާއަށް ހިދުމަތްކުރައްވައިފަ އެވެ.

ދާދި ފަހުން ސުޕްރީމް ކޯޓަށް އައްޔަންކުރެއްވި ފަނޑިޔާރު ހަމީދަކީ 2007 ވަނަ އަހަރުން ފެށިގެން 2022 ވަނަ އަހަރާ ހަމައަށް ހައި ކޯޓުގެ ފަނޑިޔާރުކަން ކުރެއްވި ބޭފުޅެކެވެ. މަދަނީ ކޯޓުގެ ގާޒީކަން ވެސް އޭނާ ކުރެއްވި އެވެ.

ހައި ކޯޓުގެ ފަނޑިޔާރުކަމުން 2022 ވަނަ އަހަރު ހަމީދު ވަކިކުރެއްވީ 2015 ވަނަ އަހަރު ސަރުކާރުން ފަނޑިޔާރުންނަށް ފްލެޓްތަކެއް ދޭން ނިންމުމުން އޭގެ ތެރެއިން ފްލެޓަކާ އޭނާ ހަވާލުވި ކަމަށް ބުނެ އެވެ.