ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން، ކުދި އަދި މެދު ފަންތީގެ ދަނޑުވެރިކަމުގެ ވިޔަފާރިތަކަށް، ހާއްސަކޮށް އަންހެނުންގެ ބައިވެރިވުން ހިމެނޭ ވިޔަފާރިތަކަށް އަމާޒުކޮށްގެން މާލީ އެހީތެރިކަން ހޯދުމަށް ބޭނުންވާ ފަރާތްތަކުން ޕްރޮޕޯސަލް ހުށަހެޅުމުގެ ފުރުސަތު ހުޅުވާލައިފި އެވެ. މި ފުރުސަތު ހުޅުވާލާފައިވަނީ ކޮމަން ފަންޑް ފޯ ކޮމޯޑިޓީސް (ސީ.އެފް.ސީ) ގެ ފަރާތުން ރާއްޖެފަދަ ތަރައްގީވަމުން އަންނަ ކުދި ޖަޒީރާ ގައުމުތަކަށް އަމާޒުކޮށެވެ.
ވުޒާރާއިން ބުނީ، މި މާލީ އެހީގެ ފުރުސަތު ހާއްސަކޮށްފައިވަނީ ދުނިޔޭގެ އެންމެ ކުރި އަރާފައިނުވާ ގައުމުތަކަށާއި، ރާއްޖެފަދަ ތަރައްގީވަމުން އަންނަ ކުދި ޖަޒީރާ ގައުމުތަކަށް ވެސް ކަމަށެވެ.
މި ފަންޑުން ފައިސާ ދޫކުރާނެ މައިގަނޑު ދާއިރާތަކުގެ ތެރޭގައި ދަނޑުވެރިކަމުގެ އީޖާދީ އައު ޓެކްނޮލޮޖީތައް ތަރައްގީކުރުމާއި، ދެމެހެއްޓެނެވި ދަނޑުވެރިކަމުގެ އުސޫލުތައް ބޭނުންކުރުން ހިމެނެ އެވެ. މީގެ އިތުރުން އިޔާދަކުރަނިވި ހަކަތައިގެ ހައްލުތައް ދަނޑުވެރިކަމުގައި ބޭނުންކުރުމާއި، ޑިޖިޓަލް ދަނޑުވެރިކަމުގެ މަސައްކަތްތައް ކުރިއެރުވުމަށް ވެސް އެހީތެރިކަން ދިނުމަށް ވަނީ ހަމަޖެހިފައެވެ. މޫސުމާއި ރައްޓެހި އުސޫލުތަކަށް ދަނޑުވެރިކަން ބައްޓަންކުރުމަށާއި، ބްލޮކް ޗެއިންފަދަ ޒަމާނީ ޓެކްނޮލޮޖީ ބޭނުންކޮށްގެން އިކުއިޓީ ކަށަވަރުކުރުމަށް އަމާޒުކޮށްފައިވާ ޕްރޮޖެކްޓްތަކަށް ވެސް މި ފަންޑުން އެހީތެރިކަން ލިބިގެންދާނެ އެވެ.
ވުޒާރާއިން އިތުރަށް ބުނީ، ހުށަހަޅާ ޕްރޮޖެކްޓްތައް އޮޕަރޭޝަނަލީ އަދި މާލީގޮތުން ދެމެހެއްޓެނެވިކަމާއެކު، އިގްތިސާދީ، އިޖުތިމާއީ އަދި ތިމާވެށީގެ ގޮތުން ވެސް ދެމެހެއްޓެނެވި ޕްރޮޖެކްޓަކަށް ވާންޖެހޭނެ ކަމަށެވެ.
އެގޮތުން، މި ފަންޑިންއަށް ޕްރޮޕޯސަލް ހުށަހެޅުމުގެ އެންމެ ފަހު ތާރީހަކީ 29 ސެޕްޓެމްބަރު 2025 އެވެ. މި ފުރުސަތަކީ ދިވެހިރާއްޖޭގެ ދަނޑުވެރިކަމުގެ ސިނާއަތް އިތުރަށް ކުރިއެރުވުމަށާއި، ހާއްސަކޮށް އަންހެނުންގެ ބައިވެރިވުން އިތުރުކުރުމަށް ލިބޭ ރަނގަޅު ފުރުސަތެއް ކަމަށް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ފާހަގަކުރި އެވެ. ވުޒާރާއިން ވަނީ މި ފުރުސަތުގެ ބޭނުން ހިފައި، ދިވެހިރާއްޖޭގެ ދަނޑުވެރިކަން ކުރިއެރުވުމަށް މަސައްކަތްކުރާ ފަރާތްތަކުން ޕްރޮޕޯސަލް ހުށަހެޅުމަށް ބާރުއަޅާފަ އެވެ.
