ސަރުކާރު ހިންގުމުގެ އޮނިގަނޑަށް ގެންނެވި ބޮޑު ބަދަލާއެކު، މިނިސްޓަރ އޮފް ފިޝަރީޒް، އެގްރިކަލްޗާ އެންޑް އޯޝަން ރިސޯސަސްގެ މަގާމަށް އަލްފާޟިލް އަހްމަދު ޝިޔާމް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އައްޔަންކުރައްވައިފި އެވެ.
މި މަގާމަށް ޝިޔާމް އައްޔަންކުރައްވައި، މަގާމުގެ ފަތްކޮޅު ދެއްވުމުގެ ރަސްމިއްޔާތު އޮތީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގަ އެވެ. މި ރަސްމިއްޔާތުގައި ވަޒީރުންގެ މަޖިލީހުގެ މެންބަރުކަމުގެ ހުވައި ޝިޔާމްއަށް ލައިދެއްވީ ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޒު އަބްދުﷲ ހަމީދު އެވެ. ހުވައި ކުރެއްވުމަށްފަހު، ވަޒީރުންގެ މަޖިލީހުގެ މެންބަރުންގެ ހުވައިގެ އިގްރާރުގައި އެމަނިކުފާނު ވަނީ ސޮއިކުރައްވާފަ އެވެ.
މި ދެ މިނިސްޓްރީ އެއްކޮށްލައި މިނިސްޓްރީއަށް ޝިޔާމް އައްޔަންކުރައްވާނެ ކަމަށް ކުރިން ވެސް އޮތީ ބެލެވިފަ އެވެ.
މި ބަދަލަކީ މީގެކުރިން ވަކި ދެ މިނިސްޓްރީއެއްގެ ގޮތުގައި ހިންގެވި ފިޝަރީޒް މިނިސްޓްރީއާއި އެގްރިކަލްޗާ މިނިސްޓްރީ އެއްކޮށްލުމަށް ރައީސުލްޖުމްހޫރިއްޔާ ނިންމެވުމާ ގުޅިގެން ގެނައި ބަދަލެކެވެ. މީގެކުރިން އެގްރިކަލްޗާ މިނިސްޓަރުގެ މަގާމުގައި ހުންނެވީ ޑރ. މަރްޔަމް މާރިޔާ އެވެ. ނަމަވެސް، އެކަމަނާއާއެކު ޖުމުލަ 10 ވަޒީރަކު ވަނީ އިއްޔެގެ ވަގުތެއްގައި މަގާމުން އިސްތިއުފާ ދެއްވާފަ އެވެ.
ރައީސް އޮފީހުން މައުލޫމާތު ދެއްވި ގޮތުގައި، މި ބަދަލުތަކަކީ ރައްޔިތުންގެ ވިންދާ އެއްގޮތަށް ސަރުކާރު ހިންގުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެ ގޮތުން ގެންނެވި ބަދަލުތަކެކެވެ.
ސަރުކާރުގެ އޮނިގަނޑަށް ގެނައި މި ބަދަލާއެކު، ވަޒީރުންގެ މަޖިލީހުގައި ދެން ހިމެނިވަޑައިގަންނަވާނީ ބަންޑާރަނައިބު އަލްއުސްތާޒު އަހްމަދު އުޝާމްއާއި، އިތުރު ދެ މިނިސްޓްރީއެއްގެ މިނިސްޓަރުން ހިމެނޭހެން ޖުމުލަ 15 ބޭފުޅުންނެވެ. މި ބަދަލަކީ ދައުލަތުގެ ހަރަދުތައް ކުޑަކޮށް، މަސައްކަތުގެ ދުވެލި ހަލުވިކުރުމަށް އެޅުއްވި ފިޔަވަޅެއް ކަމަށް ބެލެވެ އެވެ.
