މަސްވެރިކަމާއި، ކަނޑުގެ ވަސީލަތްތަކާއި، ދަނޑުވެރިކަމުގެ ދާއިރާއިން ރާއްޖެއަށް ބޭނުންވާ ފަންނީ މީހުން ބިނާކުރުމަށްޓަކައި، ރާއްޖެއިން ބޭރުން މަތީ ތައުލީމު ހާސިލުކުރުމުގެ ފުރުސަތު މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އިން މިއަދު ހުޅުވާލައިފިއެވެ.

މި ސްކޮލަރޝިޕްތަކަކީ ދިވެހި ސަރުކާރާއި ވޯލްޑް ބޭންކް ގުޅިގެން ހިންގާ "ޓްރާންސްފޯރމިންގ ފިޝަރީޒް މެނޭޖްމަންޓް އިން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް" ޕްރޮޖެކްޓްގެ ދަށުން ހުޅުވާލެވިފައިވާ ފުރުސަތުތަކެކެވެ.

މި ޕްރޮގްރާމްގެ ދަށުން ފިޝަރީޒް، މެރިން ސައިންސް، މެރިކަލްޗަރ އަދި އެގްރިކަލްޗަރ ދާއިރާއިން އަންޑަރގްރެޖުއޭޓް (ބެޗްލަރސް ޑިގްރީ) އަދި ޕޯސްޓްގްރެޖުއޭޓް (މާސްޓާސް ޑިގްރީ) ފުރުސަތުތައް ވަނީ ހުޅުވާލާފައެވެ. އޭގެ ތެރޭގައި ސްޓެޓިސްޓިކްސް، މައިކްރޯ ބަޔޮލޮޖީ، ޕްލާންޓް ޕްރޮޓެކްޝަން އަދި ހޯޓިކަލްޗަރ ފަދަ މުހިންމު ދާއިރާތައް ހިމެނެއެވެ.

ސްކޮލަރޝިޕްގެ ތަފްސީލު:

މި ސްކޮލަރޝިޕްތަކުގެ ދަށުން ކިޔެވުމުގެ ފުރުސަތު އޮތީ އޭޝިއާ ސަރަޙައްދާއި، ސައުތު ވެސްޓް އިންޑިއަން އޯޝަން ފިޝަރީޒް ކޮމިޝަންގެ ޤައުމުތަކުގެ އިތުރުން ބައެއް ދާއިރާތަކުން އޯއީސީޑީ ގައުމުތަކުގައެވެ. ސްކޮލަރޝިޕް ކާމިޔާބުކުރާ ފަރާތްތަކުގެ ކޯސް ފީ، ބުކް އެލަވަންސް، އެސްޓަބްލިޝްމަންޓް އެލަވަންސް، ޑިޕާރޗަރ އެލަވަންސް އަދި މަހުން މަހަށް ދޭ ސްޓައިޕަންޑް ސަރުކާރުން ހަމަޖައްސައިދޭނެއެވެ.

ކުރިމަތިލުމުގެ ޝަރުތު:

ބެޗްލަރސް ޑިގްރީއަށް ކުރިމަތިލާ ފަރާތްތަކުން އޯލެވެލް އަދި އޭލެވެލްއިން 'ސީ' އިން ފެށިގެން މަތީ ގްރޭޑް ހާސިލުކޮށްފައިވާންޖެހޭއިރު، މާސްޓާސްއަށް ކުރިމަތިލާ ފަރާތްތަކުން ގުޅުންހުރި ދާއިރާއިން ފުރަތަމަ ޑިގްރީ ހާސިލުކޮށް 2 އަހަރުގެ ތަޖުރިބާ ހުރި ފަރާތްތަކަށް ވާންޖެހެއެވެ. މީގެ އިތުރުން އިނގިރޭސި ބަހުގެ ފެންވަރު ބެލުމަށްޓަކައި IELTS ނުވަތަ TOEFL ހަދާފައި އޮންނަންޖެހެއެވެ.

އެޕްލިކޭޝަން ހުށަހެޅުން:

މި ކޯސްތަކަށް ޝައުގުވެރިވާ ފަރާތްތަކުން 30 ޖުލައި 2026 ވާ ބުރާސްފަތި ދުވަހުގެ 12:00 ގެ ކުރިން އެޕްލިކޭޝަން ހުށަހަޅަންޖެހެއެވެ. ފޯމު ހުށަހަޅާނީ މިނިސްޓްރީގެ ޕްރޮޖެކްޓް މެނޭޖްމަންޓް ޔުނިޓަށް (ހ. ޕަލްމޭރާ، 3 ވަނަ ފަންގިފިލާ) ނުވަތަ އީމެއިލް މެދުވެރިކޮށް transform@fishagriocean.gov.mv އަށެވެ.

މި ސްކޮލަރޝިޕްތަކާ ގުޅޭ އިތުރު މައުލޫމާތު މިނިސްޓްރީގެ ނަންބަރު 3033484 އަށް ގުޅުއްވައިގެން ސާފުކުރެއްވޭނެއެވެ. މި ޕްރޮގްރާމަކީ ސަރުކާރުން ރާއްޖޭގެ މަސްވެރިކަމާއި ދަނޑުވެރިކަމުގެ ސިނާޢަތް ކުރިއެރުވުމަށް ކުރަމުންދާ މަސައްކަތުގެ މުހިންމު ބައެކެވެ.