ސަރުކާރުގެ މިނިސްޓްރީތަކަށް ގެންނެވި ބަދަލުތަކުގެ ތެރެއިން، މިނިސްޓްރީ އޮފް އެގްރިކަލްޗާ އަދި މިނިސްޓްރީ އޮފް ފިޝަރީޒް އެއްކޮށްލައި، އެ މިނިސްޓްރީގެ މިނިސްޓަރުގެ މަގާމަށް އަހްމަދު ޝިޔާމް އައްޔަންކުރައްވާ ކަމަށް މައުލޫމާތު ލިބެ އެވެ.

މައުލޫމާތު ލިބޭގޮތުގައި މި ދެ މިނިސްޓްރީ އެއްކޮށްލުމަށްފަހު، އެ މިނިސްޓްރީގެ ނަން ވަނީ "މިނިސްޓްރީ އޮފް ފިޝަރީޒް، އެގްރިކަލްޗާ އެންޑް އެނިމަލް ވެލްފެއާ" އަށް ބަދަލުކޮށްފަ އެވެ. މި ބަދަލު ގެންނެވުމާ ހަމައަށް އެގްރިކަލްޗާ މިނިސްޓަރުގެ މަގާމުގައި ހުންނެވީ ޑރ. މަރިޔަމް މާރިޔާ އެވެ. ނަމަވެސް، މިއަދު އޭނާ ވަނީ އެ މަގާމުން އިސްތިއުފާ ދެއްވާފަ އެވެ.

މާރިޔާގެ އިތުރުން ސަރުކާރުގެ ކެބިނެޓުގެ 9 މިނިސްޓަރަކު މިއަދު ވަނީ މަގާމުން އިސްތިއުފާ ދެއްވާފަ އެވެ. މިއީ ސަރުކާރުގެ ހިންގުމަށް ބޮޑެތި ބަދަލުތަކެއް ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ނިންމެވުމަކާ ގުޅިގެން އައި ބަދަލުތަކެކެވެ.

ރައީސް އޮފީހުން ހާމަކޮށްފައިވާ ގޮތުގައި، މިނިސްޓަރުން އިސްތިއުފާ ދެއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގުމުގައި ރައީސް މުއިއްޒު ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެ ގޮތުންނެވެ.

މި ބަދަލުތަކާއެކު، ކުރިން އޮތް 20 މިނިސްޓްރީގެ އަދަދު މިހާރު ވަނީ 15 މިނިސްޓްރީއަށް މަދުކުރެވިފައެވެ. އައު ވަޒީރުން މިހާރު ވަނީ މަގާމުގެ ހުވައި ކުރައްވައި، ރަސްމީކޮށް މަސައްކަތްޕުޅު ފައްޓަވާފައެވެ.