ބ. ގޮއިދޫގައި ކެންސަރު ބަލި ޖެހޭ މިންވަރު އިތުރުވަމުންދާ ސަބަބު ދެނެގަތުމަށްޓަކައި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާއި އެގްރިކަލްޗާ މިނިސްޓްރީ ގުޅިގެން ދިރާސާތަކެއް ފަށައިފި އެވެ.
މިކަން ހާމަކުރެއްވީ އެގްރިކަލްޗާ މިނިސްޓަރު ޑރ. މަރިޔަމް މާރިޔާ މިއަދު ބޭއްވި ނޫސްވެރިންގެ ބައްދަލުވުމެއްގައެވެ.
މިނިސްޓަރު މާރިޔާ ވިދާޅުވީ ގޮއިދޫގައި ކެންސަރު އާންމުވާ ސަބަބު ހޯދަން އެމްއެފްޑީއޭއިން މިހާރު ޓެސްޓުތައް ހަދައި، ދިރާސާތައް ކުރިއަށްގެންދާ ކަމަށެވެ.
"އެކަމުގައި އަޅުގަނޑުމެން އެމްއެފްޑީއޭއަށް އެއްބާރުލުން ދީ، އަޅުގަނޑުމެންނާ އެކީގައި މަސައްކަތް ކުރަމުން ދަނީ، އިރާދަކުރެއްވިއްޔާ އަވަސް ހައްލެއް ލިބޭނެ،" މިނިސްޓަރު ވިދާޅުވިއެވެ.
ފުޅާދާއިރާއެއްގައި ދަނޑުވެރިކަން ކުރާ ގޮއިދޫގައި ކެންސަރު އިތުރުވާ ކަމުގެ ކަންބޮޑުވުން ފުރަތަމަ ފާޅުކުރީ މިދިޔަ އަހަރުގެ ޑިސެމްބަރު މަހު އެ ރަށުގެ ރައްޔިތެއް ކަމަށްވާ ޝަހުލާ ވަޖީހެވެ. އޭނާ ކަމާބެހޭ އިދާރާތަކަށް ފޮނުވި ސިޓީގައި ބުނެފައިވަނީ، ގާތްގަނޑަކަށް 500 މީހުންގެ އާބާދީއެއް އޮންނަ އެ ރަށުގައި މިދިޔަ ފަސް އަހަރު ތެރޭގައި ނުވަ މީހަކަށް ކެންސަރު ޖެހި، ތިން މީހަކު މަރުވެފައިވާ ކަމަށެވެ.
ޝަހުލާގެ ސިޓީގައި ފާހަގަކޮށްފައިވާ ގޮތުގައި، ރަށުގެ ދަނޑުތަކުގެ 95 އިންސައްތަ ބިދޭސީން ބަލަހައްޓަމުންދާއިރު، ގިނަ ދަނޑުތަކުގައި ހައްދާ ތަރުކާރީއާއި މޭވާއަށް އިންސާނުންގެ ފުރާނައަށް ނުރައްކާވާ މިންވަރަށް ޕެސްޓިސައިޑާއި އެހެނިހެން ކެމިކަލް އަޅަމުންދެއެވެ. މިކަމުގެ ސަބަބުން ރަށުގައި ގައިން ގަޔަށް ނާރާ ބަލިތައް، ހާއްސަކޮށް ކެންސަރު އިތުރުވަމުންދާ ކަމަށް އޭނާ ތުހުމަތުކުރެއެވެ.
ޕެސްޓިސައިޑް ބޭނުންކުރުމާ ގުޅޭގޮތުން މިނިސްޓަރު މާރިޔާ ވިދާޅުވީ، އެކަމާ ގުޅޭ ގާނޫނެއް އޮތް ނަމަވެސް، އޭގެ ދަށުން ހަދަންޖެހޭ ޕޮލިސީތައް ނުހެދި ހުރުމުގެ ސަބަބުން އެ މަސައްކަތް ފެށުނީ މިދިޔަ މަހު ކަމަށެވެ. އަދި ވަރަށް އަވަހަށް މި ޕޮލިސީތައް ތަންފީޒު ކުރަން ފެށޭނެ ކަމަށް އުއްމީދު ކުރައްވާ ކަމަށްވެސް މިނިސްޓަރު ވިދާޅުވިއެވެ.
މި ދިރާސާގެ ސަބަބުން ގޮއިދޫގައި ކެންސަރު ބަލި އިތުރުވާ ސީދާ ސަބަބު ދެނެގަނެވި، ދަނޑުވެރިކަމުގައި ކެމިކަލް ބޭނުންކުރުމުގެ ރައްކާތެރި މިންގަނޑުތައް ކަނޑައެޅިގެންދާނެ ކަމަށް ބެލެވެއެވެ.
