މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ ހުއްދަ ނެތި އާންމު އެއްވެސް ފިހާރައެއްގައި އެއްވެސް ބޭހެއް ނުވިއްކޭ ގޮތަށް އަލަށް އެކުލަވާލި ބޭހާ ބެހޭ ޤަވާއިދުގެ ދަށުން، ފަލަވާތީ ވެގެން ހިކެން ބޭނުންކުރާ ސަޕްލިމެންޓްތަކާއި ބޭސްތައް ވިއްކުން ވެސް މަނާވެއްޖެއެވެ. ޤަވާއިދާ ޚިލާފުވާ ފަރާތްތައް -/10,000 ރުފިޔާއާއި -/100,000 ރުފިޔާއާ ދެމެދުގެ އަދަދަކުން ޖޫރިމަނާ ކުރާނެއެވެ.
ޞިއްޙީ ޚިދުމަތް ދިނުމުގެ ޤާނޫނުގެ ދަށުން އަލަށް އެކުލަވާލި މި ޤަވާއިދަށް ރަސްމީކޮށް ޢަމަލުކުރަން ފަށާނީ އަންނަ އޮކްޓޫބަރު މަހުގެ 22 ވަނަ ދުވަހުން ފެށިގެންނެވެ.
Advertisement
އާންމު ފިހާރަތަކާއި އޮންލައިން ވިޔަފާރިތަކަށް ބޮޑު ސަމާލުކަމެއް
މިހާރު އާންމުކޮށްފައިވާ ބޭހާ ބެހޭ އައު ޤަވާއިދުގައި ބޭސް އެތެރެކުރުމާއި، ގުދަންކުރުމާއި، އަދި ވިއްކުމުގައި ޢަމަލުކުރާނެ ހަރުކަށި މިންގަނޑުތަކެއް ވަނީ ކަނޑައަޅާފައެވެ. މި ޤަވާއިދުގެ ދަށުން، އެމްއެފްޑީއޭއިން ބޭހެއްގެ ގޮތުގައި ނުވަތަ ސިއްހީ ފައިދާއެއް ހޯދުމަށް ބޭނުންކުރާ "ނިއުޓްރަސޫޓިކަލްސް" ގެ ގޮތުގައި ގިންތިކޮށްފައިވާ އެއްވެސް ބާވަތެއް އެ އޮތޯރިޓީގެ ހުއްދަނެތި އާންމު ފިހާރަތަކުގައާއި ސޯޝަލް މީޑިއާ ޕްލެޓްފޯމްތަކުގައި ބަހައްޓައިގެން ވިއްކުމަކީ މަނާ ކަމެކެވެ.
ޚާއްޞަކޮށް، އަވަހަށް ހިކޭނެ ކަމަށް ބުނެ ސައިންޓިފިކް އެއްވެސް ހެއްކެއް ނެތި އާންމު ފިހާރަތަކާއި އޮންލައިންކޮށް (ޓިކްޓޮކް، އިންސްޓަގްރާމް ފަދަ ޕްލެޓްފޯމްތަކުގައި) ވިއްކާ ސަޕްލިމެންޓްތަކާއި، ޕައުޑަރުތަކާއި، ބޭސްތަކަށް މި ޤަވާއިދުގެ ދަށުން ފިޔަވަޅު އަޅާނެއެވެ. އެމްއެފްޑީއޭއިން މީގެ ކުރިން ވެސް ވަނީ ހުއްދަނެތި އެތެރެކޮށް ވިއްކަމުންދިޔަ ހިކޭ ބޭހާއި ބޮޑީބިލްޑިންގް ސަޕްލިމެންޓްތަކެއް ބްލެކްލިސްޓް ކޮށްފައެވެ.
ޑޮކްޓަރުގެ ލިޔުމެއް ނެތި ދޫކުރާ (OTC) ބޭސްތަކަށް އޮތް ފުރުޞަތު
މި ޤަވާއިދު ބުނާގޮތުން، ޑޮކްޓަރުގެ ލިޔުމެއް ނެތި ދޫކުރާ ބައެއް ބާވަތުގެ ބޭސްތައް (ހާލަތަށް ބަލައި) އެމްއެފްޑީއޭގެ ޚާއްޞަ ހުއްދަ ނަގައިގެން އާންމު ފިހާރަތަކުގައި ވިއްކުމުގެ ފުރުޞަތު އޮވެއެވެ. ނަމަވެސް އެ ހުއްދަ ނުނަގައި އެއްވެސް ފިހާރައެއްގައި ބޭހުގެ އެއްވެސް ބާވަތެއް ބެހެއްޓުމަކީ ބޮޑެތި ޖޫރިމަނާތަކެއް އަންނާނެ ކަމެކެވެ.
އޮކްޓޫބަރު 22 އިން ފެށިގެން މި ޤަވާއިދަށް ފުރިހަމައަށް ޢަމަލުކުރަން ފަށާއިރު، ހުރިހާ ވިޔަފާރިތަކަކުން ވެސް މި މިންގަނޑުތަކަށް ފެތޭގޮތަށް ތައްޔާރުވުމަށް އެމްއެފްޑީއޭއިން އިލްތިމާސްކުރެއެވެ.
