ރާއްޖެއަށް ބޭސް އެތެރެކުރުމާއި، ބޭސް ރައްކާކުރުމާއި އަދި ބޭސް ވިއްކުމާ ގުޅޭގޮތުން އަލަށް އެކުލަވައިލި "ބޭހާބެހޭ ގަވާއިދު" (2026/R-64) މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން އާންމުކޮށްފިއެވެ. މި ގަވާއިދާ ހިލާފުވާ ފަރާތްތައް 10،000 ރުފިޔާއާއި 100،000 ރުފިޔާއާ ދެމެދުގެ އަދަދަކުން ޖޫރިމަނާކުރުމަށް ވަނީ ނިންމާފައެވެ.
ސިއްހީ ހިދުމަތް ދިނުމުގެ ގާނޫނުގެ ދަށުން އެކުލަވައިލި މި ގަވާއިދު ތަންފީޒުކުރާނީ ނޭޝަނަލް ފާމަސޫޓިކަލް ބޯޑުގެ ލަފާގެ މަތިން އެމް.އެފް.ޑީ.އޭ އިންނެވެ. މި ގަވާއިދުގެ ދަށުން، ގަވާއިދާ ހިލާފުވާ ފަރާތްތަކުގެ ލައިސަންސް 14 ދުވަހާއި އެއް އަހަރާ ދެމެދުގެ މުއްދަތަކަށް ހިފެހެއްޓުމުގެ ނުވަތަ ދާއިމީކޮށް ބާތިލުކުރުމުގެ އިހްތިޔާރު އެމް.އެފް.ޑީ.އޭ އަށް ލިބިގެންވެއެވެ.
މި ގަވާއިދުގެ ދަށުން އިންސާނުން ބޭނުންކުރުމަށް ކަމުނުދާ، ފޭކު، މުއްދަތު ހަމަވެފައިވާ، ނުވަތަ ދުނިޔޭގެ ސިއްހަތު ޖަމްއިއްޔާ (ޑަބްލިއު.އެޗް.އޯ) އިން މަނާކޮށްފައިވާ ބޭސް އެތެރެކުރުމާއި ވިއްކުމަކީ މަނާކަމެކެވެ. އަދި ރާއްޖޭގައި ރަޖިސްޓްރީކޮށްފައިވާ ބޭހުގެ ދަފްތަރުގައި ނުހިމެނޭ ބޭސް އެތެރެކުރުމަކީވެސް މަނާކަމެކެވެ.
Advertisement
އަލަށް އަމަލުކުރަން ފަށާ އުސޫލުތަކުގެ ތެރޭގައި:
- އެމް.އެފް.ޑީ.އޭ ގައި ރަޖިސްޓްރީ ނުކޮށް ފާމަސީ ނުވަތަ ބޭސް ގުދަން ހިންގުން މަނާވުން.
- އިންޓަރނެޓް ނުވަތަ ޕޯސްޓް މެދުވެރިކޮށް ވިޔަފާރީގެ ބޭނުމަށް ބޭސް އެތެރެކުރުން މަނާވުން.
- ޑޮކްޓަރެއްގެ ޕްރިސްކްރިޕްޝަން ނެތި، އާންމުކޮށް ވިއްކަން ހުއްދަ ބޭސް ފިޔަވައި އެހެން ބޭސްތައް ވިއްކުން މަނާވުން.
- ހޯލްސޭލްކޮށް ބޭސް ވިއްކާ ތަންތަނުން ރީޓެއިލްކޮށް ބޭސް ނުވިއްކުން.
މި ގަވާއިދަށް އަމަލުކުރަން ފަށާތާ 30 ދުވަހުގެ ތެރޭގައި އެމް.އެފް.ޑީ.އޭ އިން ހުއްދަދެވިފައިވާ ބޭސްތަކުގެ ދަފްތަރެއް ޝާއިއިކުރަންވާނެއެވެ. މީގެ އިތުރުން، ރާއްޖޭގެ ސިއްހީ ނިޒާމަށް ކޮންމެހެން ބޭނުންވާ "އެސެންޝަލް މެޑިސިން" ލިސްޓެއް އެކުލަވައިލައި، ފާމަސީތަކުން އެ ބޭސްތައް އަބަދުވެސް ހުންނަކަން ކަށަވަރުކުރަންޖެހެއެވެ.
ގަވާއިދާ ހިލާފަށް އެތެރެކުރާ ބޭސްތައް އެއްވެސް ބަދަލަކާ ނުލައި ހިފަހައްޓައި ނައްތާލުމުގެ ބާރު އޮތޯރިޓީއަށް ލިބިގެންވެއެވެ. އަދި ދޮގު މައުލޫމާތު ހުށަހަޅައިގެން ރަޖިސްޓްރީ ކުރާ ފަރާތްތައް ބްލެކްލިސްޓް ކުރެވޭނެއެވެ.
މި ގަވާއިދު ސަރުކާރުގެ ގެޒެޓުގައި ޝާއިއުކުރާތާ 90 ދުވަހުގެ ތެރޭގައި އަމަލުކުރަން ފަށާނެއެވެ. މިހާރު ހިނގަމުންދާ ތަންތަނަށް އައު ގަވާއިދަށް ފިތުމަށް 6 މަސްދުވަހުގެ މުއްދަތެއް ދެވޭނެއެވެ. މި ގަވާއިދަށް އަމަލުކުރަން ފެށުމާއެކު 2014 ވަނަ އަހަރުން ފެށިގެން އަމަލުކުރަމުން އައި ބޭހާބެހޭ ގަވާއިދު އުވޭނެއެވެ.
