ޖަރުމަނުގެ މަޝްހޫރު ބްރޭންޑެއް ކަމަށްވާ "ހިޕް" ބްރޭންޑުގެ ކުޑަކުދިންގެ ކާނާގެ ފުޅިއަކުން މީދާ މަރާ ވިހަ ފެނުނު މައްސަލައެއް ފެންމަތިވުމާ ގުޅިގެން، އެ ބްރޭންޑުގެ އުފެއްދުންތައް ބޭނުން ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު އިލްތިމާސްކޮށްފިއެވެ.

މި މައްސަލައަކީ އޮސްޓްރިއާގައި މިހާރު ތަހުގީގު ކުރަމުންދާ މައްސަލައެކެވެ. "ހިޕް" ބްރޭންޑުގެ ކުޑަކުދިންގެ ކާނާ ފުޅިއަކުން ރޮޑެންޓްސައިޑް ނުވަތަ މީދާ މަރަން ބޭނުންކުރާ ވިހަ ފެނުމާ ގުޅިގެން، އެ ކުންފުނިން މިހާރު ވަނީ އޮސްޓްރިއާގެ ބާޒާރުގައި ހުރި އެ ކުންފުނީގެ އުފެއްދުންތައް ބޭނުން ނުކުރުމަށް އަންގައި، ބާޒާރުން އެ ތަކެތި އަނބުރާ ނަގަން ފަށާފައެވެ.

އެ ހާދިސާއާ ގުޅިގެން ޖަރުމަނާއި އޮސްޓްރިއާގެ އިތުރުން ޗެކް ރިޕަބްލިކް އަދި ސްލޮވާކިއާގެ ފުލުހުންވެސް ދަނީ މި ބާވަތުގެ ފުޅިތައް ތަހުގީގަށް ނަގައި އިތުރަށް ބަލަމުންނެވެ. އޮސްޓްރިއާގެ ފުލުހުން މިދިޔަ ހޮނިހިރު ދުވަހު ނެރުނު ބަޔާނެއްގައި ބުނެފައިވާ ގޮތުގައި، ތަހުގީގަށް ނެގި ސާމްޕަލްތައް ލެބޯޓްރީގައި ޓެސްޓުކުރިއިރު އޭގެއިން މީދާ ވިހައިގެ އަސަރު ވަނީ ފެނިފައެވެ.

އެމްއެފްޑީއޭ އިން މިއަދު ނެރުނު ބަޔާނެއްގައި ބުނީ، "ހިޕް" ބްރޭންޑުގެ އެ އުފެއްދުމަކީ އެ އޮތޯރިޓީގައި ރަސްމީކޮށް ރަޖިސްޓްރީކޮށްފައިވާ އުފެއްދުމަކަށް ނުވި ނަމަވެސް، އަމިއްލަ ބޭނުންތަކަށާއި އެ ނޫންވެސް ގޮތްގޮތުން ރާއްޖެއަށް އެތެރެކޮށް ބޭނުންކުރުމުގެ ފުރުސަތު އޮތްކަމަށް ބެލެވޭ ކަމަށެވެ.

އެހެންކަމުން، ރައްކާތެރިކަމުގެ ފިޔަވަޅެއްގެ ގޮތުން އެ ބާވަތުގެ އެއްވެސް އުފެއްދުމެއް ރާއްޖެ އެތެރެ ނުކުރުމަށާއި، ބާޒާރުގައި ވިއްކަން ނުބެހެއްޓުމަށާއި އަދި އެއްވެސް ފަރާތަކުން އެ ބޭނުން ނުކުރުމަށް އެމްއެފްޑީއޭ އިން ވަނީ އާންމުންނަށް އިލްތިމާސްކޮށްފައެވެ. ކުޑަކުދިންގެ ސިއްހަތަށް ނުރައްކާވެދާނެ މިފަދަ ކަންކަމަށް ހާއްސަ ސަމާލުކަމެއް ދިނުމަކީ ކޮންމެހެން މުހިންމު ކަމެއް ކަމަށްވެސް އެމްއެފްޑީއޭއިން ބުންޏެވެ.