ނަގަންޖެހޭ ހުއްދަ ނުނަގައި ބޭސް އެތެރެކޮށް ވިއްކާ ފަރާތްތަކާ މެދު ފިޔަވަޅު އަޅާނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ، (އެމްއެފްޑީއޭއިން) އިން ބުނެފި އެވެ.
އެމްއެފްޑީއޭއިން މިއަދު ނެރުނު ބަޔާނެއްގައި ބުނީ ވިޔަފާރީގެ ގޮތުގައި ރާއްޖެއަށް ބޭސް އެތެރެކޮށް ވިއްކޭނީ ބޭހާއި ބެހޭ ގަވާއިދުގައިވާ ގޮތުގެ މަތިން އެ އޮތޯރިޓީގައި ބޭސް އެތެރެކޮށް އަދި ވިއްކާ ފަރާތެއްގެ ގޮތުގައި ރަޖިސްޓްރީކޮށް ހުއްދަ ލިބިގެން ކަމަށެވެ. އަދި އެތެރެކުރާ ހުރިހާ ބޭހަކީވެސް އުސޫލުތަކާއި އެއްގޮތަށް ރަޖިސްޓްރީކޮށް ރާއްޖެއަށް އެތެރެކޮށް ވިއްކުމަށް ހުއްދަ ދީފައިވާ ބޭހުގެ ލިސްޓުގައި ހިމެނިފައިވާ ބޭހަކަށް ވާންޖެހޭނެ ކަމަށްވެސް ބުންޏެވެ.
އެމްއެފްޑީއޭއިން އިން ބުނީ ބޭސް އެތެރެ ކުރުމުގައި މިފަދަ ހަރުކަށި ގަވާއިދުތައް ހެދިފައި ހުރި ނަމަވެސް މިހާރަކަށް އައިސް ނަގަންޖެހޭ ހުއްދަތައް ނުނަގައި އެކި ކަންކަމަށް ބޭނުންކުރާ ބޭސް އެތެރެކޮށް ތަފާތު އޮންލައިން ޕޭޖުތަކުގައި އިޝްތިހާރުކޮށް ވިއްކަމުން ގެންދާކަން ފާހަގަވެފައިވާ ކަމަށެވެ.
އެގޮތުން ލޭގައި ހަކުރު ހުންނަ މިންވަރު ދަށް ކުރުމަށް ބޭނުންކުރާ "ސެމަގުލުޓައިޑް" އަކީ ބަރުދަން ލުއިކުރާ ބޭހެއް ކަމަށާއި، ހަމުގެ މައްސަލަތަކުގައި ބޭނުންކުރާ "އެޒޭލެކް އެސިޑް" އަކީ މޫނުގެ ހަންގަނޑު ރީތިކޮށް އަލިކުރާ ބޭހެއް ކަމަށް ބުނެ އޮންލައިން ޕޭޖުތަކުގައި އިޝްތިހާރުކޮށް ވިއްކަމުން ގެންދާކަމަށް އެމްއެފްޑީއޭ އިން ބުންޏެވެ.
އެމްއެފްޑީއޭއިން ބުނީ މިފަދަ ބޭސްތަކަކީ ކޮންމެހެން ބޭނުން ކުރަންޖެހޭ ހާލަތުގައި އެކަމެއްގެ ހާއްސަ ޑޮކްޓަރަކު ލިޔެދިނުމުން ނޫނީ ބޭނުން ކޮށްގެން ނުވާނެ ބޭހެއް ކަމަށެވެ. އަދި ފާމަސީތަކުންވެސް އެފަދަ ބޭސްތައް ދޫކުރެވޭނީ ޑޮކްޓަރުގެ ލިޔުމެއްދީފައިވާ ބޭސް ސިޓީއަށް ކަމަށާއި ޑޮކްޓަރެއްގެ ލަފަޔާއި، އިރުޝާދާއި ނުލައި އެފަދަ ބޭސްތައް ބޭނުން ކުރުމުން ހީވެސް ނުކުރާ ފަދަ ހިތާމަވެރި ހާލަތަކަށް ހުށަހެޅުމަކީ ދުރުގައިވާ ކަމެއްނޫން ކަމަށްވެސް އެމްއެފްޑީއޭއިން ބުންޏެވެ.
އެހެންކަމުން އެ އިދާރާއިން ނަގަންޖެހޭ ހުއްދަ ނުނަގައި ބޭސް އެތެރެކޮށް، ވިއްކާ އަދި އިޝްތިހާރު ކުރާ ފަރާތްތަކާ މެދު ބޭހާއިބެހޭ ގަވާއިދުގެ ދަށުން ފިޔަވަޅު އަޅަމުން ގެންދާނެ ކަމުގެ އިންޒާރު އެމްއެފްޑީއޭއިން ވަނީ ދީފަ އެވެ.
