މަސައްކަތްތެރިންގެ ހައްގުތައް ހިމާޔަތްކުރުމާއި ގުޅޭގޮތުން މަޝްވަރާކުރެއްވުމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާއި ބެހޭ ވުޒާރާގެ ވަޒީރު، ޑރ. އަލީ ހައިދަރު އަހްމަދު އަދި ދާހިލީ ސަލާމަތާއި ފަންނިއްޔަތާއި ބެހޭ ވުޒާރާގެ ވަޒީރު، އަލީ އިހުސާން ބައްދަލުކުރައްވައިފި އެވެ.
މަތީ ތައުލީމާއި ބެހޭ ވުޒާރާއިން ބުނީ މި މަޝްވަރާ ބައްދަލުވުމުގެ މައިގަނޑު މަގުސަދަކީ މަސައްކަތްތެރިންގެ ހައްގުތައް ހިމާޔަތްކުރުމަށް ކުރައްވާ މަސައްކަތްތަކުގައި ދެ ވުޒާރާއިން ގުޅިގެން މަސައްކަތްކުރުން ކަމަށެވެ. އެގޮތުން، މަސައްކަތްތެރިންގެ ހައްގުތައް ހިމާޔަތްކުރުމަށް ބޭނުންވާ ގާނޫނާއި ގަވާއިދުތަކުގެ މައްޗަށް މި ބައްދަލުވުމުގައި އަލިއަޅުވާލާފައިވާ ކަމަށް ވުޒާރާއިން ބުންޏެވެ. އަދި ލޭބަރ އިންސްޕެކްޝަންގެ މަސައްކަތްތަށް ހަރުދަނާ އިންތިޒާމަކާއިއެކު ކުރިއަށްގެންދިޔުމަށް ދެ ވުޒާރާ އިން ގުޅިގެން މަސައްކަތްކުރުމަށް އެއްބަސްވެފައިވާކަމަށް މައުލޫމާތުދީފައިވެ އެވެ.
ވަޒީފާގެ ރައްކާތެރިކަން އިތުރުކޮށްދިނުމާއި، ކުރެވޭ މަސައްކަތްތަށް އެކަށީގެންވާ އުޖޫރާ ދިނުމަކީ ސަރުކާރުގެ ސިޔާސަތުތަކުގެ ތެރޭގައި ހިމެނޭކަމެކެވެ. މި ސިޔާސަތަށް އަމަލުކުރުމަށް ބޭއްވުނު މަޝްވަރާ ބައްދަލުވުމުގައި މަސައްކަތްތެރިންގެ ހައްގުތައް ހިމާޔަތްކުރުމަށް ދެ ވުޒާރާ ގުޅިގެން މަސައްކަތްކުރުމަށް ވަނީ އެއްބަސްވެފަ އެވެ.
