ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި އަނބިކަނބަލުން ސާޖިދާ މުހައްމަދުގެ ދަރިކަލުން އުމައިރު މުހައްމަދު މުޢިއްޒުގެ އަބުރަށް އިދިކޮޅު އެމްޑީޕީގެ އެކްޓިވިސްޓެއް ކަމަށްވާ މަރިޔަމް ޒުބައިރު (މަންދީ) އަރައިގެންފައިވާ ކަމަށް ސިވިލް ކޯޓުން މިއަދު ހުކުމްކޮށްފި އެވެ.

ރައީސްގެ ދަރިކަލުން އުމައިރާ ނިސްބަތްކޮށް ހަގީގަތާ ހިލާފު ވާހަކަތަކެއް މަންދީ ދައްކާފައިވަނީ އެމްޑީޕީން މިދިޔަ މާރިޗު މަހުގެ ތެރޭގައި މާލޭގައި ބާއްވަމުން ދިޔަ ސިލްސިލާ މުޒާހަރާތަކެއްގަ އެވެ. އުމައިރުއަށް ނިސްބަތްކޮށް މަންދީ ދައްކާފައިވާ ވާހަކަތަކުގެ ސަބަބުން އުމައިރުގެ ނަފްސަށާއި ފުރާނައަށް ނުރައްކާވާނޭ ހާލަތެއް މެދުވެރިކުރުވައި، އުމައިރުގެ ކިޔެވުމާއި މުސްތަގުބަލަށް ބޮޑެތި ގެއްލުންތަކެއް ކުރިމަތިކުރުވާނޭ ހާލަތެއް މެދުވެރިކޮށްފައިވާ މައްސަލަ މެޑަމް ސާޖިދާ ވަނީ ސިވިލް ކޯޓަށާއި ފެމިލީ ކޯޓަށް ހުށަހަޅާފަ އެވެ.

އެ މައްސަލާގައި މެޑަމް ސާޖިދާ ކުރައްވާ ދައުވާތަކަށް ޖަވާބު ހުށަހެޅުމަށް ދިން ފުރުސަތުގައި ދައުވާ ރައްދުވާ ފަރާތްތަކުން ޖަވާބު ހުށަހަޅާފައިވަނީ ދިން މުއްދަތު ހަމަވި ފަހުންނެވެ. އެހެންކަމުން މެޑަމް ސާޖިދާ އެދިވަޑައިގަތީ ގައިރު ހާޒިރުގައި ހުކުމްކޮށްދިނުމަށެވެ.

މި މައްސަލަ ސިވިލް ކޯޓަށް ހުށަހެޅުއްވުމަށްފަހު މެޑަމް ސާޖިދާ ވަނީ މަންދީގެ ގައިރު ހާޒިރުގައި ކުރާ ހުކުމުން ތިން ކަމަކަށް އެދިވަޑައިގެންފައެވެ. އެއީ، ގާނޫނުއަސާސީންނާއި ކުޑަކުދިންގެ ހައްގުތައް ރައްކާތެރިކުރުމާ ބެހޭ ބައިނަލްއަގުވާމީ މުއާހަދާއިން ދަރިކަލަށް ކަށަވަރުކޮށްދީފައިވާ ނަމާއި އަބުރު ރައްކާތެރިވެގެންވުމުގެ ހައްގު ނިގުޅައިގެންފައިވާ ކަމަށް ކަނޑައަޅައިދިނުމަށެވެ. އަދި ދަރިކަލަށް ލިބިފައިވާ އަދި ލިބޭނެ ކަމަށް ގަބޫލުކުރެވޭ ގެއްލުމުގެ ބަދަލު ހޯދުމުގެ ހައްގު މެޑަމްއަށް ލިބިގެންވާ ކަމަށް ކަނޑައަޅައިދިނުމަށާއި، ދަރިކަލަށް ނިސްބަތްކޮށް ދެއްކި ވާހަކަތަކަށާއި އޭގެ ސަބަބުން ނުކުމެފައިވާ ނަތީޖާއަށް އާންމުކޮށް މައާފަށް އެދުމަށް ދައުވާ ލިބޭ ފަރާތްތަކަށް ކޯޓުން އެންގުމަށެވެ.

މަންދީ ދެއްކި ވާހަކަތަކުގެ ސަބަބުން އުމައިރުގެ އަބުރަށް އުނިކަން އަންނަކަން ސާބިތުވާކަމަށް ސިވިލް ކޯޓުން ހުކުމް ކުރީ މިއަދު އެވެ.

މި މައްސަލަ ބެއްލެވި ގާޒީ ފައިސަލް އާދަމް ކުރެއްވި ހުކުމުގައި ވަނީ މަންދީގެ ވާހަކަތަކުގެ ސަބަބުން އުމައިރުގެ އަބުރު ރައްކާތެރިވެގެންވުމުގެ ހައްގު ނިގުޅައިގެންދާކަން ސާބިތުވާ ކަމަށެވެ. އެހެންކަމުން މަންދީ އަތުން ގެއްލުމުގެ ބަދަލު ހޯދުމުގެ ހައްގު މެޑަމް ސާޖިދާއަށް ލިބިވަދައިގަންނަވާ ކަމަށާއި، ގެއްލުމުގެ ބަދަލު ހޯއްދަވަން ދައުވާ ކުރެއްވޭނެ ކަމަށް ހުކުމުގައި ވެއެވެ.

މީގެ އިތުރުން މަންދީއާއި އިދިކޮޅު އެމްޑީޕީގެ ޗެއާމަން ފައްޔާޒް އިސްމާއީލް ވެސް ދެއްކެވި ވާހަކަތަކަށް ޒިންމާވާން ޖެހޭކަން ނުވަތަ ނޫންކަން ނިންމޭނީ މުޅި މައްސަލަ ބަލައިގެން ކަމަށް ހުކުމުގައިވެއެވެ. އަދި މާފަށް އެދެން އެންގުމަކީ ރާއްޖޭގެ ގާނޫނުތަކުން ކޯޓުތަކަށް ލިބިގެންވާ ބާރެއް ނޫން ކަމުން، އާޏްމުކޮށް މާފަށް އެދެން އަމުރު ކުރެވޭކަން ނެތް ކަމަށް ކޯޓުގެ ހުކުމުގައި ވެއެވެ.