ފަލަސްޠީނުގެ މުޤައްދަސް ބިމުގައި ޒަޔަނިސްޓުން ހިންގާ ޤަތުލުޢާންމުގައި މިހާތަނަށް ޝަހީދުކޮށްލާފައިވާ މުސްލިމުންގެ ޢަދަދުތައް އިސްރާއީލާއި އެމެރިކާއިން ގުޅިގެން އޮޅުވާލަމުންދާ ކަމަށް ޙަމާސް އިން ބުނެފިއެވެ.

ޙަމާސްގެ ޚަބަރުތައް ގެނެސްދޭ ނުރަސްމީ ޗެނަލަކުން މިއަދު ބުނީ، 2023 ވަނަ އަހަރުގެ އޮކްޓޯބަރު މަހުން ފެށިގެން ހުޅަނގުގެ ތާއީދާއި އެކު ޣައްޒާގައި ހިންގަމުންގެންދާ ޤަތުލުޢާންމުގައި ކޮންމެ ދުވަހަކު 100 އެއްހާ މީހުން ޝަހީދުކޮށްލާއިރު ވެސް އަދިވެސް ޔޫއެންގެ ހިސާބުތަކުން ޝަހީދުވީ މީހުންގެ ޢަދަދު 58000 ކަމަށް ދެއްކުމަކީ ޖޯކެއް ކަމަށާއި، އަސްލު ޢަދަދު 130،0000 އަށްވުރެ މަތިވެއްޖެ ކަމަށެވެ.

ޙަމާސް އިން ވަނީ އެކި ދުވަސްތަކުގައި ޝަހީދުކޮށްލި މީހުންގެ ޢަދަދު ވެސް ހާމަކޮށްފައެވެ. އެ ހިސާބުތަކަށް ބަލާއިރު “ނަސްލު ނައްތާލުމުގެ ޖަރީމާ”ގެ ފުރަތަމަ ދުވަހު އެކަނިވެސް އިސްރާއީލުން ވަނީ ޣައްޒާގެ 700 މީހުން ޝަހީދުކޮށްލާފައެވެ. ދެވަނަ ދުވަހު 650 މީހުން ޝަހީދުކޮށްލިއިރު 3 ވަނަ ދުވަހު 600 މީހުން ޝަހީދުކޮށްލި ކަމަށް ހަމާސް އިން ބުންޏެވެ. ނަމަވެސް އދ. އިން ބުނީ 3 ވަނަ ދުވަހު ޝަހީދުވީ 490 މީހުންނެވެ. ހަމާސް އިން ބުނީ މިއީ އޮޅުވާލުމެއް ކަމަށާއި ޣައްޒާގައި ހިންގާ ޖަރީމާތަކުގެ އެންމެ ފުރިހަމަ ޙަޤީޤަތް ދުނިޔެއަށް ނޭނގޭ ކަމަށެވެ.

ޙަމާސް އިން ތުހުމަތުކުރާ ގޮތުގައި ޝަހީދުންގެ ޢަދަދުތައް ހާމަކުރާއިރު އދ. އިން އިޢުލާންކުރާ ނަމްބަރު ތަކަކީ އެމެރިކާ އާއި އިސްރާއީލާއި ގުޅުންހުރި ޖަމާޢަތްތަކުން ދޭ ޙަޤީޤަތާއި ޚިލާފު ނަމްބަރުތަކެވެ.

^{އިސްރާއީލުގެ ޒަޔަނިސްޓް ޓެރަރިސްޓުން ޝަހީދުކޮށްލާފައިވާ ޣައްޒާ މުސްލިމުންގެ ޖަނާޒާއެއްގެ ގެތެރެއިން / ފޮޓޯ: އޭއެފްޕީ}

ޙަމާސް އިން ވަނީ ކޮންމެ މަހަކު ޝަހީދުކޮށްލާ މީހުންގެ ޢަދަދު ވެސް ހާމަކޮށްފައެވެ. ޤަތުލުޢާންމު ފެށި މަހުގައި (2023 އޮކްޓޯބަރުގައި) 27000 މީހުން ޝަހީދުކޮށްލި ކަމަށާއި ނަމަވެސް ބައިނަލްއަޤްވާމީ ފަރާތްތަކާއި ޙަވާލާދީ އދ. އިން ޢާންމުކުރި ހިސާބުގައި ވަނީ އެންމެ 18000 މީހުން ކަމަށް ޙަމާސް އިން ބުންޏެވެ.

މީގެއިތުރުން ޙަމާސް އިން ބުނީ އެ އަހަރުގެ ނޮވެމްބަރުގައި 8000 އަށްވުރެ ގިނަ މީހުން ޝަހީދުވިއިރު އދ ގެ ހިސާބުތަކުބައި ވަނީ 1500 އަށްވުރެ ގިނަ މީހުން އުނިކޮށްލާފައި ކަމަށާއި އަދި އެއަހަރުގެ ޑިސެމްބަރުގައި 5،000 އަށް ވުރެ ގިނަ މީހުން ޝަހީދުކޮށްލިއިރު އދ އިން ބުނީ 4،200 މީހުން ޝަހީދުވި ކަމަށެވެ.

ޙަމާސްއިން ބުނީ ޔަހޫދީ ޒަޔަނިސްޓުންގެ ޙަމަލާތައް އެތައް ގުނައެއް ވަރުގަދަކޮށް، މި އަހަރުގެ ޖެނުއަރީން ފެށިގެން މާރޗް މަހުގެ ނިޔަލަށް އެވްރެޖްކޮށް ދުވާލަކު 200 މީހުން ޝަހީދުކުރި ކަމަށެވެ. އެ މުއްދަތުގައި މުޅިއެކު 20,000 އަށް ވުރެ ގިނަ މީހުން ޣައްޒާގެ އެކި ހިސާބުތަކުން ޝަހީދުކޮށްލާފައިވާ ކަމަށާއި ނަމަވެސް ބައިނަލްއަޤްވާމީ ފަރާތްތަކޭ ބުނާ ފަރާތްތަކުން ޢާންމުކުރި ހިސާބުގައި ވަނީ 15 ހާހެއްހާ މީހުން ޝަހީދުވި ކަމަށް ޙަމާސް އިން ބުންޏެވެ.

ޙަމާސްއާއި ބެހޭ ޚަބަރުތައް ގެނެސްދޭ އެ ޗެނަލުން ބުނީ އެމީހުންގެ ޙައްޤުގައި މަސައްކަތްކުރާ ކަމަށް ބުނެ މުޅި ދުނިޔޭގައި ޢަރަބި ބޮޑެތި މުސްލިމު ޤައުމުތަކުން ދައްކަނީ މާނައެއް ނެތް ބޭކާރު ވާހަކަތަކެއް ކަމަށެވެ. ނަމަވެސް ޔަމަނުގެ ހޫޘީންނާއި ޔަމަނުގެ ރައްޔިތުން އިސްތިސްނާ ކޮށްފައި ވެއެވެ.

ހަމާސްގެ ވާހަކަތައް ސާފެވެ. ޔޫރަޕުން ވެސް އަދި ދުނިޔޭގެ އެހެން ޢަރަބި ޤައުމުތަކުން ވެސް ބަޔާނެއް ނެރެ ނުވަތަ މީޑިއާގައި ބުނެލާ ބަހަކީ ދުނިޔޭގެ ލަދަށް ބުނެލާ ބަހެއް ކަމަށާއި، އެކަން މުސްލިމު ޢަރަބި ވެރިންނަށް ވެސް ހަމަ ރަނގަޅަށް އެނގޭނެ ކަމަށް މުޙައްލިލުން އިއްތިފާޤުވެ އެވެ. އެކަމުގެ މިސާލަކަށް، މި ފަހުން އިންޑިއާ އާއި ޕާކިސްތާނާއި ދެމެދު ހިނގި ހަނގުރާމަ ހުއްޓުވުމަށް ހުޅަނގުގެ ޤައުމުތަކުން “ލޮލުފިޔަ ނުޖަހައި ކުރި މަސައްކަތް” ފުދެއެވެ.

އެމެރިކާ އާއި ޔޫރަޕްގެ ތާއީދާއި އެކު ޣައްޒާގައި ކުރިޔަށް ގެންދާ ޤަތުލުޢާންމުގައި ޝަހީދުވި މީހުންގެ ޢަދަދުތައް ކުރުކޮށް: ޙަމާސް

2023: 40,000

2024: 30,000

2025: ޖުލައި މަހާއި ހަމަޔަށް 60,200

މި ހިސާބުތަކުން ފެންނަން ހުރީ 7 އޮކްޓޯބަރު 2023 އިން ފެށިގެން ޣައްޒާގައި ޝަހީދުކޮށްލި މީހުންގެ ޢަދަދުތަކެވެ. ނަމަވެސް އދ. އިން ޢަދަދު ހާމަކުރާއިރު ބޮޑުތަނުން ތަފާތެވެ.