ޣައްޒާގެ މުސްލިމު ރައްޔިތުން ފަލަސްޠީނު ބިމުން ގަދަކަމުން ނެރެގެން އިތިއޯޕިއާ އަށް ގެންދިޔުމަށް ހައްދުފަހަނައެޅި ބޮޑުވަޒީރު ނަތަންޔާހޫ އާއި އެމެރިކާގެ ރައީސް ޑޮނަލްޑް ޓްރަމްޕް މަޝްވަރާ ކުރައްވައިފިކަން ހާމަވެއްޖެއެވެ. ރިޕޯޓުތައް ބުނާ ގޮތުގައި ޓްރަމްޕަށް މިކަން ހުށަހެޅީ ބެންޖަމިން ނަތަންޔާހޫ އެވެ. އެ މީހުން ބޭނުންވަނީ އިތިއޯޕިއާގެ އުތުރުގެ ސަރަޙައްދަށް ޣައްޒާ ރައްޔިތުން ބަދަލުކުރުމަށް ކަމަށް ވެސް ނުރަސްމީ ބައެއް ރިޕޯޓްތައް ބުނެއެވެ.
އިތިއޯޕިއާ އަކީ އެފްރިކާގެ އެންމެ ދުވަސްވީ އެއް ޤައުމެވެ. ހުޅަނގުން ވަނީ އެކި ފަހަރު މަތިން އިތިއޯޕިއާ އަށް އަތްގަދަކޮށް އެ ޤައުމުގެ މުއްސަނދިކަން ފޭރިގަނެފައެވެ. 1936 އިން 1941 އަށް އިތިއޯޕިއާގެ މުއްސަނދިކަން ފޭރިގަތީ އިޓަލީންނެވެ. އެއަށްފަހު 2020 އިން 2022 އަށް ހުޅަނގުން އަޑީގައި އޮވެ އިތިއޯޕިއާ ދާޚިލީ ހަނގުރާމައަކަށް ވައްޓާލައި 600،000 އަށް ވުރެ ގިނަ މީހުން މަރާލައި އުތުރުގެ ސަރަހައްދުތައް ފަނާކޮށްލިއެވެ.
ރިޕޯޓްތަކުން ހާމަވާ ގޮތުގައި ޣައްޒާ ރައްޔިތުން ބަލިކަށި ޖަނަވާރުންތަކެއް ފަދައިން އެ މުޤައްދަސް ބިމުން ނެރެ އެއްލައިލަން ނަތަންޔާހޫ ޕްލޭން ކޮށްފައި ވަނީ އިތިއޯޕިއާ އާއި އިންޑޮނޭޝިއާ، އަދި ލީބިޔާ ފަދަ ގައުމުތަކަށެވެ.
މިހާރު، ވޮޝިންޓަންގައި ހުންނަވާ މޮސާޑްގެ ވެރިޔާ ޑޭވިޑް ބާނިއާ ވިދާޅުވީ މި ޕްލޭނާއެކު ފެބުރުއަރީ މަހުން ފެށިގެން ޣައްޒާގެ ރައްޔިތުން ބަލައިގަތުމަށް އެކި ޤައުމުތަކާއި އެކު މަޝްވަރާ ކޮށްފައިވާ ކަމަށެވެ.
ޣައްޒާ ރައްޔިތުން މިޞްރާއި ލީބިއާ ފަދަ ޤައުމުތަކަށް ބަދަލުކުރަން އުޅޭ ޚަބަރު ލިބުމާއެކު މިޞްރުން ވަނީ އެކަމަށް ފާޅުގައި ދެކޮޅު ހަދާފައެވެ.
ޣައްޒާ ރައްޔިތުން އެ ބިމުން ބާލައި އެތަން އިޒްރޭލަށް މިލްކު ކޮށްދިނުމަށް ނަތަންޔާހޫ ދަނީ ކެނޑިނޭޅި އާދޭސް ކުރަމުންނެވެ. އިނާމެއްގެ ގޮތުން، ދުނިޔޭގެ ޞުލްޙައިގެ ނޮބެލް އިނާމު ޓްރަމްޕަށް ހޯދައިދިނުމަށް މަސައްކަތް ކުރައްވާނެ ކަމަށް ނަތަންޔާހޫ ވަނީ ބުނެފައެވެ.
