ފޯމިއުލާ ވަންގެ 7 ފަހަރުގެ ޗެމްޕިއަން ލުއިސް ހެމިލްޓަން، ޣައްޒާއަށް ފޮނުވާ އިންސާނީ އެހީގެ މަސައްކަތްތައް ބައްލަވާލެއްވުމަށްޓަކައި މިސްރުގެ ރަފާހް ބޯޑަރު ސަރަހައްދަށް ޒިޔާރަތްކޮށްފިއެވެ.
އުމުރުން 41 އަހަރުގެ އިނގިރޭސި ރޭސިންގ ޑްރައިވަރު، މިސްރުގެ ނޯތު ސިނާއީ ސަރަހައްދަށް ކުރި މި ޒިޔާރަތުގައި ރަފާހް ބޯޑަރު ހުރަސްކުރާ ސަރަހައްދުގެ އިތުރުން އެލް-އާރިޝްގައި ހުންނަ އިޖިޕްޝަން ރެޑް ކްރެސެންޓްގެ ލޮޖިސްޓިކްސް ގޯޑައުންތަކަށް ވަނީ ގޮސްފައެވެ. މި ގޯޑައުންތަކަކީ ޣައްޒާއަށް ފޮނުވާ އިންސާނީ އެހީގެ ތަކެތި އެއްކޮށް، ބަންދުކޮށް، ރައްކާކުރުމުގައި މުހިންމު ދައުރެއް އަދާކުރާ މަރުކަޒުތަކެކެވެ.
ހެމިލްޓަން މިސްރަށް އައުމުން އޭނާއަށް މަރުހަބާ ދެންނެވީ ނޯތު ސިނާއީގެ ގަވަރނަރު ހާލިދު މެގާވަރެވެ. ގަވަރނަރު ވަނީ ފަލަސްތީނުގެ ރައްޔިތުންނަށް އިންސާނީ އެހީ ފޯރުކޮށްދިނުމަށް މިސްރުން ކުރަމުންދާ މަސައްކަތްތަކުގެ ތަފްސީލު ހެމިލްޓަންއާ ހިއްސާކުރައްވާފައެވެ. އަދި އެހީގެ ތަކެތި ތައްޔާރުކޮށް، ސީދާ ޣައްޒާއަށް ފޮނުވުމާ ހަމައަށް ކަންކަން ކުރިއަށްދާ ގޮތުގެ މައުލޫމާތުވެސް ވަނީ ދީފައެވެ.
Advertisement
ބޯޑަރު ސަރަހައްދަށް ކުރި ޒިޔާރަތުގައި ހެމިލްޓަން ވަނީ އެހީގެ މަސައްކަތުގައި އުޅޭ މުވައްޒަފުންނާއި ދައުލަތުގެ ވެރިންނާ އަރަބި ބަހުން "އައްސަލާމު އަލައިކުމް" ވިދާޅުވެ ސަލާމް ކުރައްވާފައެވެ. އަދި އިންސާނީ އެހީ ފޯރުކޮށްދިނުމުގައި ހަރަކާތްތެރިވާ ބޭފުޅުންނާއެކު ވާހަކަދައްކަވާފައެވެ.
ޣައްޒާއަށް އެއްގަމާއި، ވައިގެ މަގުން އަދި ކަނޑުމަގުން އެތެރެކުރާ ބައިނަލްއަގްވާމީ އެހީގެ މައި ހަބަކަށް ނޯތު ސިނާއީ ވެފައިވާއިރު، މިސްރުން ދަނީ މި ކަމުގައި އެންމެ އިސް ދައުރެއް އަދާކުރަމުންނެވެ. ނަމަވެސް، އެކި އެކި ހުރަސްތަކާއި އަސްކަރީ ހަރަކާތްތަކުގެ ސަބަބުން އެހީގެ ތަކެތި ފޯރުކޮށްދިނުމަށް ބޮޑެތި ގޮންޖެހުންތަކާ ވަނީ ކުރިމަތިވެފައެވެ.
