އިނގިރޭސިވިލާތާއި ރާއްޖޭގެ ގާނޫނު ހަދާ މަޖިލީހުގެ މެންބަރުންގެ މައްޗަށް އެކުލަވާލާފައިވާ އޯލް ޕާޓީ ޕާލިމެންޓަރީ ގްރޫޕް (އޭޕީޕީޖީ)ގެ ބައްދަލުކުރެއްވުމެއްގައި ރައީސް ޑރ. މުހައްމަދު މުއިއްޒު މިއަދު ބައިވެރިވެވަޑައިގަންނަވައިފި އެވެ.
މަތީ ފަންތީގެ ބައްދަލުކުރެއްވުންތަކަކާއި ހަރަކާތްތަކެއްގައި ބައިވެރިވެވަޑައިގަތުމަށް ރައީސް މިވަގުތު ގެންދަވަނީ އިނގިރޭސިވިލާތަށް ދަތުރުފުޅެއް ކުރައްވަމުންނެވެ.
ރައީސް އޮފީހުން ބުނީ އޭޕީޕީޖީގެ މެމްބަރުންނާއެކު ބޭއްވި ބައްދަލުކުރެއްވުމުގައި މިދިޔަ 60 އަހަރުގެ ތެރޭގައި ރާއްޖެ އާއި އިނގިރޭސިވިލާތުގެ ޒަމާންވީ ގާތްގުޅުމުގެ މައްޗަށް އަލިއަޅުއްވާލައްވާފައިވާ ކަމަށެވެ.
އޭޕީޕީޖީގެ ކޯ-ޗެއާ، ޔާސްމީން ގުރެއިޝީ އެމްޕީ، އެ ބައްދަލުވުން ފައްޓަވައިދެއްވަމުން ދެއްކެވި ވާހަކައިގައި ތަރައްގީވަމުން އަންނަ ކުދި ޖަޒީރާ ގައުމުތަކަށް ކުރިމަތިވެފައިވާ ގޮންޖެހުންތައް ހައްލުކުރުމަށް ބައިނަލްއަގުވާމީ ފަރާތްތަކަށް އޮތް ޒިންމާގެ މައްޗަށާއި އެފަދަ ގައުމުތަކަށް ފޯރުކޮށްދޭންވާ މާލީ އަދި ފަންނީ އެހީތެރިކަމާއި ބައިނަލްއަގުވާމީ އެއްބާރުލުމުގެ މައްޗަށް އަލިއަޅުއްވާލައްވާފައިވާ ކަމަށް ރައީސް އޮފީހުން ބުންޏެވެ.
ދެ ގައުމުގެ މެދުގައި އޮތް ބަދަހި ގުޅުމަކީ އިހުތިރާމާއި އުސޫލުތަކެއްގެ މައްޗަށް ބިނާވެފައިވާ ގުޅުމެއް ކަމަށާއި އެ ގުޅުންތައް އިތުރަށް ހަރުދަނާކުރުމަށް ރާއްޖެއިން އިސްކަންދެއްވާނޭ ކަމުގައި ރައީސް ވިދާޅުވި ކަމަށް ވެސް ރައީސް އޮފީހުން ބުންޏެވެ.
ރައީސް އޮފީހުން ބުނި ގޮތުގައި، ރާއްޖޭގެ އަދުލު އިންސާފުގެ ދާއިރާ އާއި ޑިމޮކްރަސީ ހަރުދަނާކުރުމާއި މޫސުމީ ބަދަލުތަކަށް ވިލުންތެރިވުމާއި ދިފާއީ ދާއިރާ ހަރުދަނާކުރުމާއި އެ ދާއިރާތަކުން ކެޕޭސިޓީ އިތުރުކުރުމުގައި އިނގިރޭސިވިލާތުން ފޯރުކޮށްދެމުން އަންނަ އެހީތެރިކަމަށް ރައީސް ޝުކުރު އަދާކުރެއްވި އެވެ.
ތައުލީމާއި ސަގާފީ ރޮގުން ދެ ގައުމުގެ މެދުގައި އުފެދިފައިވާ ގުޅުމުގެ މައްޗަށް ވެސް ރައީސް ބައްލަވާލެއްވި ކަމަށާއި ދެ ގައުމުގެ ގުޅުން އިތުރަށް ހަރުދަނާކުރުމުގައި އޭޕީޕީޖީ އިން އަދާކުރަމުން އަންނަ ދައުރަށް ފުރިހަމަ އިތުބާރު އޮތް ކަމަށް ވެސް ރައީސް ވިދާޅުވި ކަމަށް ވެސް ރައީސް އޮފީހުން ބުންޏެވެ.
