ދިވެހިރާއްޖޭގެ އުފެއްދުންތެރި އިގްތިސާދަށް ފަހުރުވެރި ވަގުތެއްގައި، ފިލްމް ހަދާ ފަރާތެއް ކަމުގައިވާ ރަވީ ފާރޫގު ފިލްމް އުފެއްދުމުގެ ދާއިރާއަށް ދިވެހިރާއްޖޭގެ ސަމާލުކަން ގެނެސްދީފިއެވެ.
އިގްތިސާދީ ތަރައްގީއާއި ވިޔަފާރިއާ ބެހޭ ވުޒާރާއިން ބުނީ ވޯލްޑް އިންޓެލެކްޗުއަލް ޕްރޮޕަޓީ އޯގަނައިޒޭޝަން (ވައިޕޯ) ގެ ވެބްސައިޓުގައި ރަވީގެ ވާހަކަ ފާހަގަކޮށްފައިވާ ކަމަށެވެ. އަދި ރަވީގެ ވާހަކަ ވަނީ ސުވިޓްޒަލޭންޑުގެ ޖެނީވާގައި ބޭއްވުނު ވައިޕޯގެ 66 ވަނަ އެސެމްބްލީތަކުގެ ސިލްސިލާގައި (ޖުލައި 8-17، 2025) ވެސް ތައާރަފްކުރެވިފައި ކަމަށާއި، މިއީ ދިވެހިރާއްޖެއަށާއި ރާއްޖޭގެ އުފެއްދުންތެރިންނަށް ލިބުނު މުހިންމު ކުރިއެރުމެއް ކަމަށް ވުޒާރާއިން ބުންޏެވެ.
އެ ވުޒާރާއިން ބުނީ ރަވީއަކީ ވައިޕޯގެ "އައި.ޕީ ފްރޮމް ދަ ގްރައުންޑް އަޕް: ވަޗުއަލް ޗެޓް" ސިލްސިލާގައި ދިވެހިރާއްޖެ ތަމްސީލުކުރުމަށް ވުޒާރާގެ ފަރާތުން ހޮވިފައިވާ ފަރާތް ކަމަށެވެ. މި މަޝްރޫއަކީ ވުޒާރާއިން ވައިޕޯ އާއި ކޮރެއާ ޖުމްހޫރިއްޔާގެ މިނިސްޓްރީ އޮފް ކަލްޗާ، ސްޕޯޓްސް އެންޑް ޓޫރިޒަމް އާ ގުޅިގެން ކުރިއަށް ގެންދާ މަޝްރޫއެއް ކަމަށް ވުޒާރާއިން ބުންޏެވެ.
ވުޒާރާއިން ބުނީ މި މަޝްރޫއުގެ މަގްސަދަކީ އޭޝިއާ ސަރަހައްދުގެ އުފެއްދުންތެރި ފަރާތްތަކުގެ މަސައްކަތް ރައްކާތެރިކޮށް އަދި ފުޅާކުރުމަށް އިންޓެލެކްޗުއަލް ޕްރޮޕަރޓީ ބޭނުންކުރާ ގޮތް ފާހަގަކޮށް ހާމަކުރުން ކަމަށެވެ.
އުފެއްދުންތެރި ޕްރޮޑިއުސަރު ޝާމިން ނިޒާމްއާ އެކު، ރަވީ އުފައްދާފައިވާ، އެޕިސޯޑުގައި ދިވެހި ފިލްމު ހަދާ ފަރާތްތަކުން ކޮޕީރައިޓް، އެއްބަސްވުންތައް، ފައިސާ ހޯދުން، އަދި އުފެއްދުންތެރިކަމުގެ މުދަލުގެ ހައްގުތައް ރައްކާތެރިކުރުމާ ގުޅޭގޮތުން ކުރިމަތިވާ ތަޖުރިބާތަކާ މެދު ވަނީ އަލިއަޅުވާލާފައެވެ. އަދި ރަވީގެ އަމިއްލަ މަސައްކަތުގެ ދާއިރާގެ ތަޖުރިބާއާއި ރާއްޖޭގެ މި ދާއިރާއާ ގުޅޭ ސީދާ މައުލޫމާތުތަކަށް ބިނާކޮށް، އޭނާ ދިވެހިރާއްޖޭގެ އޯޑިއޯ ވިޝުއަލް ދާއިރާގައި ހުރި ގޮންޖެހުންތަކާއި އަދި ބޭނުންނުކުރެވި ހުރި ފުރުސަތުތަކާއި ބެހޭގޮތުން މައުލޫމާތު ހިއްސާކޮށްފައިވެއެވެ.
ޔެސް ޓީވީ މެދުވެރިކޮށް ލައިވް ސްޓްރީމް ކުރި، ވައިޕޯއިން ދުނިޔޭގެ ފެންވަރުގައި ޑިސްޓްރިބިއުޓްކޮށްފައިވާ މި އެޕިސޯޑަކީ ވައިޕޯގެ "ރައިޓްސް، ކެމެރާ، އެކްޝަން"! އަދި "ފްރޮމް ސްކްރިޕްޓް ޓު ސްކްރީން" އިނީޝިއޭޓިވްސް އިން އިންސްޕަޔާވެގެން ކުރިއަށް ގެންދިޔަ އެޕިސޯޑެއް ކަމަށް ވުޒާރާއިން ބުންޏެވެ. އެކަމުގެ ސަބަބުން ދިވެހި އަޑު ބައިނަލްއަގްވާމީ ވާހަކައަކަށް ގެނެވުނުކަން ވުޒާރާއިން ފާހަގަކޮށްފައިވެއެވެ.
މެލޭޝިއާ (މިއުޒިކް އިންޑަސްޓްރީ)، ފިލިޕީންސް (އެނިމޭޝަން އިންޑަސްޓްރީ)، ސައުތު ކޮރެއާ (މިއުޒިކް އިންޑަސްޓްރީ) އަދި (ރާއްޖެ އޯޑިއޯވިޒުއަލް އިންޑަސްޓްރީ) ފަދަ ގައުމުތަކުގައި މި ސިލްސިލާ ކުރިއަށް ގެންދިއުމަށް ހަމަޖެހިފައިވާއިރު، އެހެން ގައުމުތަކުގައި ވެސް އިތުރު ލައިވް ޗެޓްތައް ބޭއްވުމަށް ހަމަޖެހިފައިވާ ކަމަށް ވުޒާރާއިން މައުލޫމާތުދީފައިވެ އެވެ.
ވުޒާރާއިން ބުނީ ވައިޕޯ ފީޗާގައި ރަވީ ހިމެނުމަކީ އޭނާގެ ފަރުދީ ހިއްސާގެ އިތުރުން ދުނިޔޭގެ މައިދާނުގައި ދިވެހި ހުނަރުވެރިންގެ އަގު ވަޒަންކުރުން އިތުރުވަމުންދާ ކަން ވެސް ހާމަކޮށްދޭ ކަމެއް ކަމަށެވެ. ރާއްޖޭގެ ގައުމީ އަމާޒަށް މި ބައިނަލްއަގްވާމީ ސްޕޮޓްލައިޓުން އެހީތެރިކަން ފޯރުކޮށްދެވިގެންދިޔައީ އުފެއްދުންތެރި އަދި ޑިޖިޓަލް އިގްތިސާދު ކުރިއަރުވައި، 2030 ވަނަ އަހަރާ ހަމައަށް ޖީ.ޑީ.ޕީގެ 15 އިންސައްތަ ހިއްސާކުރުމަށް ކުރެވިގެންދާ މަސައްކަތްތަކުގެ ތެރެއިން ކަމަށް ވުޒާރާއިން ބުންޏެވެ. އަދި މީގެ ސަބަބުން އުފެއްދުންތެރި ސިނާއަތްތައް ހަރުދަނާ ކުރުމަށް އިންޓެލެކްޗުއަލް ޕްރޮޕަޓީ ރިފޯމް ކުރުމާއި ގްލޯބަލް ޕާޓްނާޝިޕްތަކަށް ސްޓްރެޓެޖިކް ޑައިރެކްޝަންއަކަށް ގެންދިއުމަށް ވުޒާރާއިން ކުރަމުންގެންދާ މަސައްކަތް ދައްކުވައިދޭ ކަމަށް ވުޒާރާއިން ފާހަގަކޮށްފައިވެ އެވެ.
