މާލެ ސަރަހައްދުގެ މަގުތަކުގައި ބަރު އުޅަނދު ދުއްވުން މަނާ ގަޑިތަކެއް އިކޮނޮމިކް މިނިސްޓްރީން ކަނޑައަޅައިފި

މާލެ ސަރަހައްދުގެ މަގުތަކަކީ ހިނގާބިގާވެ އުޅޭ ފަރާތްތަކަށާއި އުޅަނދުތައް ދުއްވާ ފަރާތްތަކަށް ފަސޭހަ، ރައްކާތެރި ތަނަކަށް ހެދުމުގެ ގޮތުން، ހާއްސަކޮށް ދަރިވަރުންނާއި ބެލެނިވެރިންގެ ސަލާމަތަށްޓަކައި މުދާ އުފުލާ ބަރު އުޅަނދުފަހަރު ދުއްވުން މަނާ ގަޑިތަކެއް މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑުން ކަނޑައަޅައިފިއެވެ.

އިކޮނޮމިކް މިނިސްޓްރީން ނެރުއްވާފައިވާ އިއުލާނުގައި ބަޔާންކޮށްފައިވާ ގޮތުގައި، ސްކޫލް އޮންނަ ދުވަސްތަކުގައި ސްކޫލްތައް އާންމުކޮށް ފެށޭ ގަޑިއާއި ނިމޭ ގަޑިތަކުގައި، ސްކޫލްތައް ހުންނަ ސަރަހައްދުތަކުގައި ބަރު އުޅަނދުފަހަރު ދުއްވުމާއި މުދާ އުފުލުމަކީ މުޅިން މަނާކަމެކެވެ.

އެގޮތުން، 350 ކިލޯއަށްވުރެ މަތީގެ މުދާ އުފުލާ އުޅަނދުތަކާއި ފޯކްލިފްޓް، ޓްރަކް، ކްރޭން އަދި ޓްރެއިލަރ ފަދަ ބަރު އުޅަނދުފަހަރު ދުއްވުން މަނާ ގަޑިތަކުގެ ތެރޭގައި ހެނދުނު 06:00 އިން ހެނދުނު 08:30 އާ ހަމައަށް، ބޮޑުތަކުރުފާނު މަގު ފިޔަވައި މާލޭގެ އެހެނިހެން މަގުތަކާއި، ހުޅުމާލޭގެ މަގުތަކުގެ އިތުރުން ސިނަމާލެ ބުރިޖާއި ހައިވޭ ހިމެނެއެވެ. މީގެއިތުރުން ހެނދުނު 11:30 އިން މެންދުރު 01:30 އާ ދެމެދު ބޮޑުތަކުރުފާނު މަގު ފިޔަވައި މާލޭގެ އެހެނިހެން މަގުތަކާއި، ސިނަމާލެ ބުރިޖާއި ހައިވޭގައި ވެސް މިފަދަ އުޅަނދުތައް ދުއްވުމަކީ މަނާކަމެކެވެ.

އިކޮނޮމިކް މިނިސްޓްރީން ވަނީ މިފަދަ އުޅަނދުތައް ދުއްވާ ފަރާތްތަކުން ކަނޑައެޅިފައިވާ ގަޑިތަކަށް ހުރުމަތްތެރިކޮށް ހިތުމަށް އިލްތިމާސްކުރައްވާފައެވެ. އަދި މި އިއުލާނާ ހިލާފުވާ ފަރާތްތަކާމެދު އެއްގަމު ދަތުރުފަތުރުގެ ގާނޫނުގެ ދަށުން ފިޔަވަޅު އެޅޭނެކަމަށްވެސް މިނިސްޓްރީން ވަނީ ހާމަކުރައްވާފައެވެ.