2026 ވަނަ ދިރާސީ އަހަރަށް ސަރުކާރު ސްކޫލްތަކުގެ އެލް.ކޭ.ޖީ އަދި ގްރޭޑް 1 އަށް ދަރިވަރުން ވެއްދުމަށް ތައުލީމީ ވުޒާރާއިން މިއަދު ހުޅުވާލައިފިއެވެ.
ތައުލީމީ ވުޒާރާއިން ވަނީ އެކަމަށް ހާއްސަކޮށް އޮންލައިން ފޯމެއް ހަދާފައެވެ. އެ ފޯމު މެދުވެރިކޮށް، ސަރުކާރު ސްކޫލްތަކުގެ އެލް.ކޭ.ޖީ އަދި ގްރޭޑް 1 އަށްދަރިވަރުން ވެއްދުމަށް ހުށަހެޅޭނެ ކަމަށް ވުޒާރާއިން ބުންޏެވެ.
މި ފުރުސަތު ހުޅުވާލާފައިވަނީ އަންނަ އޮގަސްޓް މަހުގެ 31 ގެ ނިޔަލަށެވެ.
މި އަހަރު އަލަށް މާލެ ސަރަހައްދަށް ގްރޭޑް 1 އަށް 2،000 އަށްވުރެ ގިނަ ދަރިވަރުން ވައްދާފައިވާ ކަމަށާއި އަލަށް މުޅި ރާއްޖެއިން 5000 އަށް ވުރެ ގިނަ ކުދިން ގްރޭޑް 1 އަށް ވައްދާފައިވާ ކަމަށް ވުޒާރާއިން މީގެ ކުރިން ބުނެފައިވެއެވެ. އަދި އަތޮޅުތެރޭގެ ސްކޫލުތަކުން މާލޭ ސަރަހައްދުގެ ސްކޫލުތަކަށް 1،200 އަށް ވުރެ ގިނަ ދަރިވަރުން ބަދަލުވެފައިވާ ކަމަށް ވެސް ވުޒާރާއިން ބުނެފައިވެއެވެ.
ޕްރީ ސްކޫލުން ފެށިގެން ގްރޭޑް 12 އާ ދެމެދުގައި 89،000 އަށްވުރެ ގިނަ ދަރިވަރުން މިއަހަރު ތައުލީމް ހާސިލްކުރަމުން އަންނަ ކަމަށް ވުޒާރާއިން ބުންޏެވެ. އޭގެ އިތުރުން 11،000 އެއްހާ ޓީޗަރުން މިފަހަރު ކިޔަވައިދެމުން އަންނަ ކަމަށާއި ސަރުކާރުގެ ސްކޫލްތަކުގައި 10،000 އަށްވުރެ ގިނަ ޓީޗަރުން ކިޔަވައިދޭ ކަމަށް ވުޒާރާއިން ބުންޏެވެ.
ބޮޑު ޗުއްޓީ ހުޅަނގު މޫސުމުގެ އެންމެ ގަދައަށް ވިއްސާރަކުރާ ޖޫން/ޖުލައިގައި ލިބޭތީ ބެލެނިވެރިންގެ ހުރި ކަންބޮޑުވުމާ އެކު، ރައީސް ޑރ. މުޙައްމަދު މުޢިއްޒު ވަނީ ދިރާސީ އާ އަހަރުގެ ކިޔެވުން ކުރިން އޮތް ގޮތަށް ޖެނުއަރީގައި ފަށައި ޑިސެމްބަރަށް ބަންދު ލިބޭ ގޮތަށް ބަދަލުކޮށްދެއްވާފައެވެ. އެ ބަދަލާއެކު އަންނަ އަހަރުން ފެށިގެން ދިރާސީ އާ އަހަރު ފެށޭނީ ޖެނުއަރީ މަހުގެ ތެރޭގައެވެ.
