ހދ. ނޮޅިވަރަންފަރު ކައުންސިލްގެ ހުރި ކަންބޮޑުވުންތައް ނައިބު ރައީސް ހުސެއިން މުހައްމަދު ލަތީފްއަށް މިއަދު ހުށަހަޅުއްވައިފި އެވެ. 

ރައީސް އޮފީހުން ބުނީ ރައީސުލްޖުމްހޫރިއްޔާގެ ނައިބު ރައީސް މިއަދު އެ އޮފީހުގައި ނޮޅިވަރަންފަރު ކައުންސިލާ ބައްދަލުކުރައްވައި, އެ ރަށުގެ ތަރައްގީގެ މުހިންމު ކަންކަމާ ގުޅޭ ގޮތުން މަޝްވަރާކުރައްވާފައިވާ ކަމަށެވެ.

އެ ބައްދަލުކުރެއްވުމުގައި ނޮޅިވަރަންފަރު ކައުންސިލުގެ މެންބަރުން އެ ރަށުގެ ތަރައްގީއަށް އެންމެ ބޭނުންވާ ކަންކަމާއި ކުރިމަތިވާ ގޮންޖެހުންތައް ނައިބު ރައީސްއާ ހިއްސާކުރެއްވި ކަމަށް ރައީސް އޮފީހުން ބުންޏެވެ.

އެ ރަށު ކައުންސިލުން ފާހަގަކުރި ކަންކަމަކީ;

1. ރަށު ސުކޫލުގެ ޖާގައިގެ ދަތިކަން ހުރުމުން ދިމާވާ ގޮންޖެހުންތައް
2. އަލައް އެޅުމަށް ހަމަ ޖެހިފައިވާ ކުލާސްރޫމްތަކުގެ މަސައްކަތް އަވަސްކޮށްދިނުން
3. އަލަށް ހަދާފައިވާ ހައުސިން ޔުނިޓުތަކުގެ ފެނާއި ނަރުދާމާގެ މައްސަލަ ހައްލުކޮށްދިނުން
4. ރަށުގައި ފަތުރުވެރިކަން ފުޅާކުރުން
5. ރަށުގައި ކުނި މެނޭޖުކުރާނެ ގޮތެއް ނެތުމުން ކުރިމަތިވާ ގޮންޖެހުންތައް
6. ސިއްހީ މަރުކަޒުގެ ހިދުމަތްތައް ރަނގަޅުކުރުން
7. ރަށުގައި އިތުރު މަސައްކަތްތަކެއް ފެށުމަށް ބޭނުންވާ ކަންކަން

ކައުންސިލުން ހުށަހެޅުއްވި ކަމަކަށް ސަމާލުކަން ދެއްވާނެ ކަމަށް ނައިބު ރައީސް ވިދާޅުވި ކަމަށް ރައީސް އޮފީހުން ބުންޏެވެ.

ކައުންސިލް މެންބަރުން ފާހަގަކުރެއްވި ކަންކަމަށް އަވަސް ހައްލެއް ހޯދުމަށް, ކަމާ ގުޅުންހުރި އިދާރާތަކާ މަޝްވަރާކޮށްގެން ކުރިއަށް ދެވޭނެ ކަމަށް ވެސް ނައިބު ރައީސް ވިދާޅުވި ކަމަށް ރައީސް އޮފީހުން ބުންޏެވެ.