މޯލްޑިވްސް ނޭޝަނަލް ސާވިސް ނުވަތަ ވަތަނީ ހިދުމަތުގެ ތަމްރީނުގެ ފުރަތަމަ ބުރަށް ބައިވެރިން ހޮވުމުގެ މަރުހަލާ ފަށައިފި އެވެ.
ޑިފެންސް މިނިސްޓްރީން މިއަދު ބުނީ ދިވެހި ގައުމިއްޔަތަށް ލޯބިކުރާ، ޒިންމާދާރު، ޖިސްމާނީ، ރޫހާނީ އަދި ނަފްސާނީ ގޮތުން ދުޅަހެޔޮ ދިވެހި ރައްޔިތެއް ބިނާކޮށް, މަސައްކަތަށް އަހުލުވެރި, އަހުލާގު ރަނގަޅު ހަރުދަނާ ޒުވާން ޖީލެއް ބިނާކުރެއްވުމަށް، ރައީސް ޑރ. މުހައްމަދު މުއިއްޒު އިސްނަންގަވައިގެން ރާއްޖޭގައި މުޅިން އަލަށް ފައްޓަވާ ވަތާނީ ހިދުމަތުގެ ތަމްރީނުގެ ފުރަތަމަ ބުރަށް ބައިވެރިން ހޮވުމުގެ މަރުހަލާ އިއްޔެ ފަށާފައިވާ ކަމަށެވެ.
އެ ތަމްރީނުގެ ފުރަތަމަ ބުރަށް ބައިވެރިން ހޮވުމުގެ މި މަރުހަލާ އެންމެ ފުރަތަމަ ފަށާފައި ވަނީ ކުޅުދުއްފުށި ސިޓީ އާއި އދ. މަހިބަދު އާއި ލ. ގަން އަދި އައްޑޫ ސިޓީ ހިތަދޫގައި ކަމަށް މިނިސްޓްރީން ބުންޏެވެ.
މިނިސްޓްރީން ބުނީ މި މަރުހަލާގައި ބައިވެރިން އިންޓަވިއު އާއި މެޑިކަލް ޓެސްޓްތަކާއި އެޕްޓިޓިއުޑް ޓެސްޓްގެ އިތުރުން ފިޓްނަސް ޓެސްޓްތައް ވެސް ފުރިހަމަކުރާނެ ކަމަށެވެ.
ވަތަނީ ހިދުމަތުގެ ތަމްރީނުގެ ފުރަތަމަ ބުރަށް 350 ބައިވެރިން ހޮވުމަށް ހަމަޖެހިފައިވާ ކަމަށް ވެސް މިނިސްޓްރީން ބުންޏެވެ.
ޑިފެންސް މިނިސްޓްރީގެ ބެލުމުގެ ދަށުން ކުރިއަށް ގެންދާ އެ ޕްރޮގްރާމް ރައީސް އިއުލާންކުރެއްވީ މިދިޔަ އަހަރުގެ ނަސްރުގެ ދުވަހު އެވެ.
މިދިޔަ އެއް މަސްދުވަހުގެ ތެރޭގައި އެ ޕްރޮގްރާމްގައި ބައިވެރިވުމަށް 1,244 ޒުވާނުން ކުރިމަތިލާފައިވެ އެވެ.
