މިނިސްޓްރީ އޮފް ޑިފެންސް އެންޑް ނޭޝަނަލް ސާވިސްގެ މަގާމަށް، އަލްފާޟިލް ހަސަން ރަޝީދު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އައްޔަންކުރައްވައިފި އެވެ.
އާ ވަޒީރަށް މަގާމުގެ ފަތްކޮޅު ދެއްވުމަށް ބޭއްވެވި ރަސްމިއްޔާތު އޮތީ ދެންމެގެ ވަގުތެއްގައި، ރައީސުލްޖުމްހޫރިއްޔާގެ އޮފީހުގަ އެވެ. މި ރަސްމިއްޔާތުގައި، ހަސަން ރަޝީދަށް ވަޒީރުންގެ މަޖިލީހުގެ މެންބަރުކަމުގެ ހުވައި ލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމް އެވެ. ހުވައި ކުރެއްވުމަށްފަހު، ވަޒީރުންގެ މަޖިލީހުގެ މެންބަރުންގެ ހުވައިގެ އިގްރާރުގައި ހަސަން ރަޝީދު ވަނީ ސޮއިކުރައްވާފަ އެވެ.
މި ބަދަލަކީ ސަރުކާރުގެ ހިންގުމުގެ އޮނިގަނޑަށް ގެންނެވި ބޮޑު އިސްލާހީ ބަދަލުތަކުގެ ތެރެއިން ގެނެވުނު ބަދަލެކެވެ. ޑިފެންސް މިނިސްޓަރުގެ މަގާމުގައި ކުރިން ހުންނެވި ގައްސާން މައުމޫން އިއްޔެ ވަނީ މަގާމުން އިސްތިއުފާ ދެއްވާފަ އެވެ. ގައްސާން މައުމޫންގެ އިތުރުން ކެބިނެޓުގެ 10 ވަޒީރަކު އިއްޔެ ވަނީ މަގާމުން އިސްތިއުފާ ދެއްވާފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ސަރުކާރުގެ މިނިސްޓްރީތަކުގެ އަދަދު 20 އަކުން 15 އަށް މަދުކުރައްވާފަ އެވެ. މި ބަދަލާއެކު މިނިސްޓްރީތަކުގެ އޮނިގަނޑަށާއި ބައެއް މިނިސްޓްރީތަކުގެ ނަންތަކަށް ވެސް ވަނީ ބޮޑެތި ބަދަލުތަކެއް ގެންނަވާފަ އެވެ.
